2026 ആദ്യ പകുതിയിൽ എട്ടര ലക്ഷത്തിലധികം പരിശോധനകൾ പൂർത്തിയായി; നടപടിക്രമങ്ങൾ അഞ്ച് മുതൽ പത്ത് മിനിറ്റിനകം പൂർത്തിയാക്കാം.
ദുബായ്, ഓഗസ്റ്റ് 4, 2026: ദുബായിൽ ഡ്രൈവിംഗ് ലൈസൻസ് എടുക്കുന്നതിനും പുതുക്കുന്നതിനുമുള്ള സേവനങ്ങൾ കൂടുതൽ എളുപ്പമാക്കുന്നതിന്റെ ഭാഗമായി അംഗീകൃത കണ്ണ് പരിശോധനാ കേന്ദ്രങ്ങളുടെ എണ്ണത്തിൽ 30 ശതമാനം വർധനവ് വരുത്തി റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ.ടി.എ).
2026-ന്റെ ആദ്യ പകുതിയിൽ 100 പുതിയ കേന്ദ്രങ്ങൾക്ക് കൂടി അനുമതി നൽകിയതോടെ എമിറേറ്റിലുടനീളമുള്ള അംഗീകൃത കണ്ണ് പരിശോധനാ കേന്ദ്രങ്ങളുടെ ആകെ എണ്ണം 434 ആയി ഉയർന്നു.
പരിശോധനാ കേന്ദ്രങ്ങളുടെ എണ്ണം വർധിച്ചതോടെ റോഡ് ഉപയോക്താക്കൾക്ക് തടസ്സമില്ലാതെ സേവനങ്ങൾ ലഭ്യമാക്കാൻ സാധിക്കുന്നുണ്ടെന്ന് ആർ.ടി.എ വ്യക്തമാക്കുന്നു. 2026 ആദ്യ ആറു മാസത്തിനുള്ളിൽ മാത്രം 8,54,213 കണ്ണ് പരിശോധനകളാണ് പൂർത്തിയാക്കിയത്. 2025-ൽ ഒരു വർഷം കൊണ്ട് ആകെ 9,40,728 പരിശോധനകളാണ് രേഖപ്പെടുത്തിയിരുന്നത്.
സാധാരണയായി 5 മുതൽ 10 മിനിറ്റ് വരെ മാത്രമാണ് ഒരു വ്യക്തിയുടെ കണ്ണ് പരിശോധനയ്ക്ക് ആവശ്യമായി വരുന്നത്. പരിശോധനാ ഫലങ്ങൾ ആർ.ടി.എയുടെ ഡിജിറ്റൽ സിസ്റ്റത്തിലേക്ക് നേരിട്ട് ഘടിപ്പിച്ചിട്ടുള്ള ഇലക്ട്രോണിക് സംവിധാനം വഴി തത്സമയം കൈമാറും. ഇത് ഉപഭോക്താക്കൾക്ക് സമയലാഭവും സുതാര്യതയും ഉറപ്പാക്കുന്നു.
റോഡ് സുരക്ഷ ഉറപ്പാക്കുന്നതിന്റെ ഭാഗമായി ഡ്രൈവിംഗ് ലൈസൻസ് ഇഷ്യൂ ചെയ്യുന്നതിനും പുതുക്കുന്നതിനും കണ്ണ് പരിശോധന നിർബന്ധിത യോഗ്യതയാണ്. അംഗീകൃത ഒപ്റ്റിക്കൽ സെന്ററുകൾ, ഡ്രൈവിംഗ് ഇൻസ്റ്റിറ്റ്യൂട്ടുകൾ, ആർ.ടി.എ കസ്റ്റമർ ഹാപ്പിനസ് സെന്ററുകൾ എന്നിവ കേന്ദ്രീകരിച്ച് ഈ സേവനം ലഭ്യമാണ്.
പരിശോധന പൂർത്തിയാകുന്ന മുറയ്ക്ക് ഡിജിറ്റൽ ലൈസൻസ് സ്മാർട്ട്ഫോണിലെ ഡിജിറ്റൽ വാലറ്റിൽ ലഭ്യമാകും. ഭൗതിക കാർഡ് ആവശ്യമുള്ളവർക്ക് അത് പ്രത്യേകം അപേക്ഷിച്ചു വാങ്ങാനും സൗകര്യമുണ്ട്.
