ദുബായ്: പശ്ചിമേഷ്യയിൽ യുദ്ധഭീതിയുടെ നിഴൽ പടർന്നുനിൽക്കുമ്പോഴും കേരളത്തിലെ തിരഞ്ഞെടുപ്പ് ആവേശത്തിന് തെല്ലും കുറവില്ലെന്ന് തെളിയിച്ച് പ്രവാസി ലോകം. നാദാപുരം മണ്ഡലം യു.ഡി.എഫ് സ്ഥാനാർഥി കെ.എം. അഭിജിത്തിന്റെ തിരഞ്ഞെടുപ്പ് പ്രചാരണാർത്ഥം യു.എ.ഇ കെഎംസിസി കോർഡിനേഷൻ കമ്മിറ്റി ദുബായിൽ സംഘടിപ്പിച്ച കൺവൻഷൻ പ്രവർത്തകരുടെ വൻ പങ്കാളിത്തം കൊണ്ട് ശ്രദ്ധേയമായി. മണ്ഡലത്തിലെ വികസന മുരടിപ്പിന് അറുതി വരുത്താൻ മാറ്റം അനിവാര്യമാണെന്ന പ്രഖ്യാപനവുമായി നൂറുകണക്കിന് പ്രവർത്തകരാണ് കൺവൻഷനിൽ അണിനിരന്നത്. നിലവിലെ രാഷ്ട്രീയ സാഹചര്യത്തിൽ പ്രവാസികളുടെ വോട്ടുകൾ നിർണ്ണായകമാണെന്ന തിരിച്ചറിവിലാണ് സംഘടനകൾ തങ്ങളുടെ പ്രവർത്തനം ഊർജ്ജിതമാക്കിയിരിക്കുന്നത്.
ഓൺലൈൻ വഴി പ്രവർത്തകരെ അഭിസംബോധന ചെയ്ത സ്ഥാനാർഥി കെ.എം. അഭിജിത്ത്, പ്രതികൂല സാഹചര്യത്തിലും പ്രവാസികൾ കാട്ടുന്ന ആവേശം വലിയ പ്രതീക്ഷ നൽകുന്നതാണെന്ന് വ്യക്തമാക്കി. യുദ്ധഭീതിയുള്ള സാഹചര്യത്തിലും നാദാപുരം മണ്ഡലത്തിന്റെ സമഗ്രമായ മാറ്റത്തിനായി ത്യാഗങ്ങൾ സഹിച്ചും നാട്ടിലെത്തി വോട്ട് രേഖപ്പെടുത്താൻ തയ്യാറാകുന്ന ഓരോ പ്രവാസിയും ജനാധിപത്യത്തിന്റെ കാവലാളുകളാണെന്ന് അദ്ദേഹം കൂട്ടിച്ചേർത്തു. നാദാപുരത്തിന്റെ വികസന സ്വപ്നങ്ങൾക്ക് ചിറകുനൽകാൻ യു.ഡി.എഫ് പ്രതിജ്ഞാബദ്ധമാണെന്നും സ്ഥാനാർഥി ഉറപ്പുനൽകി. മണ്ഡലത്തിലെ അടിസ്ഥാന സൗകര്യ വികസനവും പ്രവാസികളുടെ ക്ഷേമവും മുൻനിർത്തിയുള്ള പദ്ധതികളാണ് താൻ വിഭാവനം ചെയ്യുന്നതെന്നും അദ്ദേഹം സൂചിപ്പിച്ചു.
നാദാപുരം മണ്ഡലം യു.ഡി.എഫ് ചെയർമാൻ സൂപ്പി നരിക്കാട്ടേരി കൺവൻഷൻ ഓൺലൈനായി ഉദ്ഘാടനം ചെയ്തു. ഇത്തവണ നാദാപുരത്ത് യു.ഡി.എഫിന് മികച്ച വിജയം ഉറപ്പാണെന്നും പ്രവാസലോകത്തുനിന്ന് ലഭിക്കുന്ന അഭൂതപൂർവ്വമായ പിന്തുണ ആത്മവിശ്വാസം വർധിപ്പിക്കുന്നുണ്ടെന്നും അദ്ദേഹം പറഞ്ഞു. കോഓർഡിനേഷൻ കമ്മിറ്റി പ്രസിഡന്റ് കെ.പി. മുഹമ്മദ് ചടങ്ങിൽ അധ്യക്ഷത വഹിച്ചു. നാദാപുരത്തിന്റെ വികസന കുതിപ്പിന് പ്രവാസികളുടെ നിസ്സീമമായ സഹകരണം എന്നും കൂടെയുണ്ടാകുമെന്ന് അദ്ദേഹം തന്റെ അധ്യക്ഷ പ്രസംഗത്തിൽ ഓർമ്മിപ്പിച്ചു. തിരഞ്ഞെടുപ്പ് അടുക്കുന്നതോടെ കൂടുതൽ പ്രവാസികളെ നാട്ടിലെത്തിക്കാനുള്ള വിപുലമായ ക്രമീകരണങ്ങൾ നടന്നു വരുന്നതായും ഭാരവാഹികൾ അറിയിച്ചു.
ഹാരിസ് കയ്യാല സ്വാഗതം ആശംസിച്ച ചടങ്ങിൽ പ്രമുഖ നേതാക്കളായ സി.വി.എം. വാണിമേൽ, ഇസ്മായിൽ ഏറാമല, സൂപ്പി പാതിരിപ്പറ്റ എന്നിവർ സംസാരിച്ചു. യു.കെ. റാഷിദ് ജാതിയേരി, ഇസ്മായിൽ ഇളമടത്തിൽ, ശിഹാബ് സി.പി., റാഷിദ് പൊന്നാണ്ടി തുടങ്ങിയവരും വിവിധ സംഘടനകളെ പ്രതിനിധീകരിച്ച് റഫീഖ് മട്ടന്നൂർ (ഇൻകാസ്), പ്രകാശ് മേപ്പയ്യൂര് എന്നിവരും രാഷ്ട്രീയ സാഹചര്യം വിശദീകരിച്ചു. ഷംസീർ നാദാപുരം, ബി.എ. നാസർ, ടി.കെ. അബ്ബാസ് എന്നിവരുൾപ്പെടെയുള്ള നേതാക്കൾ തിരഞ്ഞെടുപ്പ് പ്രവർത്തനങ്ങളുടെ ഏകോപനം വിലയിരുത്തി. ടി.കെ. അബ്ബാസ് നന്ദി പ്രകാശിപ്പിച്ചതോടെ ആവേശോജ്ജ്വലമായ കൺവൻഷന് തിരശ്ശീല വീണു.
