അബൂദബി: ഇത്തിഹാദ് എയർവേയ്സിൽ യാത്ര ചെയ്യുന്നവർക്ക് കൂടുതൽ സൗകര്യങ്ങളുമായി പുതിയ പ്രഖ്യാപനം. അബൂദബി സിറ്റി, മുസ്സഫ, അൽ ഐൻ എന്നിവിടങ്ങളിലെ മൊറാഫിക്ക് സിറ്റി ചെക്ക്-ഇൻ കേന്ദ്രങ്ങളിൽ നിന്ന് ചെക്ക്-ഇൻ നടപടികൾ പൂർത്തിയാക്കുന്ന യാത്രക്കാർക്ക് ഇനി മുതൽ ടിക്കറ്റിൽ അനുവദിച്ചിരിക്കുന്ന ബാഗേജ് പരിധിക്ക് പുറമെ മൂന്ന് കിലോ അധിക ബാഗേജ് സൗജന്യമായി കൊണ്ടുപോകാൻ സാധിക്കും.
യാത്രക്കാർക്ക് കൂടുതൽ സൗകര്യപ്രദമായ യാത്രാനുഭവം നൽകുന്നതിനായി അവതരിപ്പിച്ചിരിക്കുന്ന ഈ പ്രത്യേക ആനുകൂല്യം ആഗസ്റ്റ് 16 വരെ യാത്ര ചെയ്യുന്നവർക്കാണ് ലഭ്യമാകുക. കൂടാതെ ഇത്തിഹാദ് ഗസ്റ്റ് കാർഡ് ഉള്ള യാത്രക്കാർക്ക് 1000 അധിക മൈൽസ് പോയിന്റുകളും ലഭിക്കും.
അബൂദബി സിറ്റിയിലെ മിന ക്രൂസ് ടെർമിനലിൽ 24 മണിക്കൂറും സിറ്റി ചെക്ക്-ഇൻ സേവനം ലഭ്യമാണ്. മുറൂർ റോഡിൽ മദീന സായിദ് ഷോപ്പിങ് മാളിന് എതിർവശത്തുള്ള ഇത്തിഹാദ് ഓഫീസിൽ രാവിലെ 10 മണി മുതൽ രാത്രി 10 മണിവരെയും സേവനം ലഭിക്കും. മുസ്സഫ ഷാബിയ 11-ലും അൽ ഐനിലെ കുവൈത്താത്ത് ലുലു മാളിലും രാവിലെ 10 മണി മുതൽ രാത്രി 10 മണിവരെ സിറ്റി ചെക്ക്-ഇൻ സൗകര്യം ഒരുക്കിയിട്ടുണ്ട്.
യാത്രയ്ക്കു 24 മണിക്കൂർ മുൻപ് മുതൽ നാല് മണിക്കൂർ മുൻപ് വരെ യാത്രക്കാർക്ക് സിറ്റി ടെർമിനലിൽ ചെക്ക്-ഇൻ നടപടികൾ പൂർത്തിയാക്കാം. ലഗേജ് ഇവിടെ തന്നെ കൈമാറി ബോർഡിങ് പാസ് വാങ്ങി വിമാനത്താവളത്തിലെത്തുന്നവർക്ക് നീണ്ട നിരകൾ ഒഴിവാക്കി നേരിട്ട് സെക്യൂരിറ്റി പരിശോധനയിലേക്ക് കടക്കാൻ സാധിക്കുന്നതാണ് ഈ സംവിധാനത്തിന്റെ പ്രധാന നേട്ടം.
സേവന നിരക്കായി മുതിർന്നവരിൽ നിന്ന് 35 ദിർഹവും കുട്ടികളിൽ നിന്ന് 25 ദിർഹവും രണ്ട് വയസ്സിന് താഴെയുള്ള കുട്ടികൾക്ക് 15 ദിർഹവും ഈടാക്കും. വിമാനത്താവളങ്ങളിലെ തിരക്ക് കുറയ്ക്കുന്നതിനും യാത്രക്കാരുടെ യാത്രാനടപടികൾ കൂടുതൽ വേഗത്തിലും സൗകര്യപ്രദമായും പൂർത്തിയാക്കുന്നതിനുമാണ് സിറ്റി ചെക്ക്-ഇൻ സംവിധാനം നടപ്പിലാക്കിയിരിക്കുന്നതെന്ന് അധികൃതർ അറിയിച്ചു.
കൂടുതൽ വിവരങ്ങൾക്ക് മൊറാഫിക്ക് ഔദ്യോഗിക വെബ്സൈറ്റ് സന്ദർശിക്കാം.
