ഡിജിറ്റൽ മാർക്കറ്റ്സ് ആക്ട് ലംഘിച്ച് തിരച്ചിൽ ഫലങ്ങളിലും ഗൂഗിൾ പ്ലേ സ്റ്റോറിലും അവിഹിത ഇടപെടൽ നടത്തിയതിനാണ് നടപടി.
ബ്രസ്സൽസ് : പ്ലേ സ്റ്റോറിലെ ആപ്പ് ഡെവലപ്പർമാർക്ക് നിയന്ത്രണം ഏർപ്പെടുത്തുകയും സ്വന്തം സേവനങ്ങൾക്ക് പ്ലേസ്മെന്റിൽ മുൻഗണന നൽകുകയും ചെയ്തതിന് സെർച്ച് ഭീമനായ ഗൂഗിളിന് 890 മില്യൺ യൂറോ (ഏകദേശം 1 ബില്യൺ ഡോളർ) പിഴ ചുമത്തി യൂറോപ്യൻ യൂണിയൻ.
ഡിജിറ്റൽ മത്സരനിയമങ്ങൾ (Digital Markets Act – DMA) ലംഘിച്ചതിന് യൂറോപ്യൻ കമ്മീഷൻ വ്യാഴാഴ്ചയാണ് ശിക്ഷാനടപടി പ്രഖ്യാപിച്ചത്. ഇതിൽ രണ്ട് പ്രധാന പിഴകളാണുള്ളത്: സെർച്ച് റിസൾട്ടുകളിൽ സ്വന്തം സേവനങ്ങൾ മുൻനിരയിൽ കാണിച്ചതിന് 460 മില്യൺ യൂറോയും, പ്ലേ സ്റ്റോറിലെ ആപ്പ് ഡെവലപ്പർമാർക്ക് മറ്റ് വിലക്കുറവുള്ള ഓഫറുകൾ ഉപഭോക്താക്കളെ അറിയിക്കുന്നതിൽ തടസ്സം നിന്നതിന് (ആന്റി-സ്റ്റിയറിംഗ്) 430 മില്യൺ യൂറോയുമാണ് പിഴ.
ഗൂഗിൾ സെർച്ചിൽ ഷോപ്പിംഗ്, ഹോട്ടൽ റിസർവേഷൻ, യാത്രാ വിവരങ്ങൾ, സ്പോർട്സ് ഫലങ്ങൾ എന്നിവ കാണിക്കുമ്പോൾ മത്സരക്കമ്പനികളെക്കാൾ സ്വന്തം സേവനങ്ങൾക്ക് കൂടുതൽ പ്രാധാന്യം നൽകിയതായി യൂറോപ്യൻ കമ്മീഷൻ അന്വേഷണത്തിൽ കണ്ടെത്തി. ഇതിനുപുറമേ, ഗൂഗിൾ പ്ലേ സ്റ്റോറിന് പുറത്തുള്ള കുറഞ്ഞ നിരക്കിലുള്ള സബ്സ്ക്രിപ്ഷനുകളെക്കുറിച്ച് ഉപഭോക്താക്കളെ അറിയിക്കുന്നതിൽ നിന്ന് ആപ്പ് ഡെവലപ്പർമാരെ ഗൂഗിൾ വിലക്കിയതായും കണ്ടെത്തിയിട്ടുണ്ട്.
“മികച്ച ഉൽപ്പന്നങ്ങൾ വിജയിക്കേണ്ടത് അവയുടെ ഗുണമേന്മ കൊണ്ടായിരിക്കണം, അല്ലാതെ സെർച്ച് എഞ്ചിൻ നടത്തുന്ന കമ്പനിയുടെ ഉടമസ്ഥതയിലുള്ളതായതുകൊണ്ടല്ല,” യൂറോപ്യൻ കമ്മീഷൻ എക്സിക്യൂട്ടീവ് വൈസ് പ്രസിഡന്റ് തെരേസ റിബേര വ്യക്തമാക്കി. ആപ്പ് സ്റ്റോർ ഉടമയ്ക്ക് ലാഭവിഹിതം ലഭിച്ചില്ലെങ്കിലും, ഏറ്റവും മികച്ച ഓഫറുകൾ എവിടെ ലഭ്യമാണെന്ന് അറിയാൻ യൂറോപ്യൻ ഉപഭോക്താക്കൾക്ക് അവകാശമുണ്ടെന്ന് അവർ കൂട്ടിച്ചേർത്തു.
നിയമലംഘനങ്ങൾ അവസാനിപ്പിച്ച് ഡിഎംഎ വ്യവസ്ഥകൾ പൂർണ്ണമായി പാലിക്കാൻ 60 ദിവസത്തെ സമയമാണ് ഗൂഗിളിന് യൂറോപ്യൻ കമ്മീഷൻ നൽകിയിരിക്കുന്നത്. അല്ലാത്തപക്ഷം കൂടുതൽ തുക ദൈനംദിന പിഴയായി നൽകേണ്ടിവരും.
അതേസമയം, യൂറോപ്യൻ യൂണിയന്റെ തീരുമാനത്തെ ഗൂഗിൾ ശക്തമായി എതിർത്തു. റിയൽ-ടൈം ഫ്ലൈറ്റ്, ഹോട്ടൽ വിവരങ്ങൾ നേരിട്ട് കാണിക്കുന്ന ജനപ്രിയ സേവനങ്ങൾ നീക്കം ചെയ്യാൻ യൂറോപ്യൻ യൂണിയന്റെ ഡിജിറ്റൽ നിയമങ്ങൾ തങ്ങളെ നിർബന്ധിതരാക്കുകയാണെന്ന് ഗൂഗിളിന്റെ ഗ്ലോബൽ അഫയേഴ്സ് പ്രസിഡന്റ് കെന്റ് വാക്കർ പറഞ്ഞു. തങ്ങളുടെ ഉപഭോക്താക്കൾക്ക് കൂടുതൽ ഗുണകരമായ ഉൽപ്പന്നങ്ങളുടെ നിലവാരം തകർക്കുന്നതാണ് ഈ തീരുമാനമെന്നും ഗൂഗിൾ ആരോപിച്ചു.
അമേരിക്കൻ സാങ്കേതിക കമ്പനികൾക്കെതിരെ യൂറോപ്യൻ യൂണിയൻ നടത്തുന്ന തുടർച്ചയായ ഇത്തരം നടപടികൾ യുഎസ്-ഇയു വ്യാപാര ബന്ധത്തിൽ വീണ്ടും അസ്വസ്ഥതകൾക്ക് വഴിവെച്ചിട്ടുണ്ട്.
