ഇസ്മായിൽ സൈബാരിയിലൂടെ മൊറോക്കോ മുന്നിലെത്തിയെങ്കിലും വിനീഷ്യസ് ജൂനിയറിന്റെ വെടിയുണ്ട ഷോട്ടിൽ ബ്രസീൽ സമനില പിടിച്ചു.
ന്യൂയോർക്ക്: ലോകമെമ്പാടുമുള്ള ഫുട്ബോൾ ആരാധകർ കാത്തിരുന്ന ഫിഫ ലോകകപ്പ് ഗ്രൂപ്പ് സി പോരാട്ടത്തിൽ കരുത്തരായ ബ്രസീലിനും മൊറോക്കോയ്ക്കും സമനിലപ്പൂട്ട്. ന്യൂയോർക്ക് ന്യൂജേഴ്സി സ്റ്റേഡിയത്തിൽ നിറഞ്ഞുകവിഞ്ഞ ഗാലറിയെ സാക്ഷിയാക്കി നടന്ന മത്സരത്തിൽ ഇരു ടീമുകളും ഓരോ ഗോൾ വീതം നേടി പിരിയുകയായിരുന്നു. അവസാന നിമിഷം വരെ ആവേശം നിറഞ്ഞ പോരാട്ടത്തിൽ ഗോൾകീപ്പർമാരുടെ ഉജ്ജ്വല പ്രകടനമാണ് ഇരുപക്ഷത്തിനും ജയം നിഷേധിച്ചത്.
ഖത്തർ ലോകകപ്പിൽ സെമിഫൈനലിൽ പ്രവേശിച്ച് ചരിത്രം കുറിച്ച മൊറോക്കോയാണ് മത്സരത്തിൽ ആദ്യം ലീഡെടുത്തത്. റയൽ മാഡ്രിഡ് താരം ബ്രാഹിം ഡയസിന്റെ മാന്ത്രിക പാസാണ് ഗോളിന് വഴിയൊരുക്കിയത്. ബ്രസീൽ പ്രതിരോധത്തെ കീറിമുറിച്ച് ബോക്സിലേക്ക് എത്തിയ പന്ത് തട്ടിയെടുത്ത്, മുന്നോട്ട് കയറിവന്ന ബ്രസീലിയൻ ഗോളി അലിസൺ ബെക്കറുടെ തലയ്ക്ക് മുകളിലൂടെ മൊറോക്കോ താരം ഇസ്മായിൽ സൈബാരി ചിപ്പ് ചെയ്ത് വലയിലാക്കുകയായിരുന്നു.
എന്നാൽ, അഞ്ച് വട്ട ലോകചാമ്പ്യന്മാരായ കാനറികൾ തളർന്നില്ല. ഗോൾ വഴങ്ങി മിനിറ്റുകൾക്കകം വിനീഷ്യസ് ജൂനിയറിലൂടെ ബ്രസീൽ തിരിച്ചടിച്ചു. ബോക്സിന്റെ ഇടതുഭാഗത്ത് നിന്നും ബ്രൂണോ ഗ്വിമാരസ് നൽകിയ പാസ് സ്വീകരിച്ച വിനീഷ്യസ്, പ്രതിരോധ താരങ്ങളെ വെട്ടിച്ച് ഇൻസൈഡ് കട്ട് ചെയ്ത് തൊടുത്ത പവർഫുൾ ഷോട്ട് മൊറോക്കോ ഗോളി യാസിൻ ബോണോയെ കാഴ്ചക്കാരനാക്കി വലയിൽ പതിച്ചു.
രണ്ടാം പകുതിയിൽ ഇരു ടീമുകളുടെയും ഗോൾകീപ്പർമാർ തമ്മിലുള്ള ലോകോത്തര പോരാട്ടത്തിനാണ് സ്റ്റേഡിയം സാക്ഷ്യം വഹിച്ചത്. ആദ്യ പകുതി അവസാനിക്കുന്നതിന് തൊട്ടുമുമ്പ് ലൂക്കാസ് പക്വേറ്റയുടെ കണ്ണഞ്ചിക്കുന്ന അക്രോബാറ്റിക് സിസർ കട്ട് ഷോട്ട് ഇടത്തോട്ട് ഡൈവ് ചെയ്ത് ബോണോ അവിശ്വസനീയമാംവിധം രക്ഷപ്പെടുത്തി. പിന്നീട് വിനീഷ്യസിന്റെ പാസിൽ നിന്നും റാഫീന്യ തൊടുത്ത മറ്റൊരു ഗോൾശ്രമവും ബോണോയുടെ കരുത്തിൽ മൊറോക്കോ പ്രതിരോധിച്ചു.
മറുഭാഗത്ത് ബ്രസീലിയൻ ഗോളി അലിസണും ഒട്ടും പിന്നിലായിരുന്നില്ല. മത്സരത്തിന്റെ ഇഞ്ചുറി ടൈമിൽ മൊറോക്കോയുടെ നീൽ എൽ ഐനൂയി ബോക്സിന് പുറത്തുനിന്ന് തൊടുത്ത ലോങ് റേഞ്ചർ അലിസൺ പറന്നുതടുത്തു. റീബൗണ്ടിൽ നിന്നും ആയൂബ് അമൈമൗനി ഗോൾ നേടാൻ ശ്രമിച്ചെങ്കിലും അതിവേഗ റിഫ്ലെക്സിലൂടെ അലിസൺ പന്ത് കൈപ്പിടിയിലൊതുക്കി ബ്രസീലിന്റെ രക്ഷകനായി.
ഈ സമനിലയോടെ ഗ്രൂപ്പ് സിയിലെ പോരാട്ടങ്ങൾ പ്രവചനാതീതമായി മാറി. മികച്ച പ്രകടനം പുറത്തെടുത്തിട്ടും ജയം കൈപ്പിടിയിലൊതുക്കാൻ കഴിയാത്തതിന്റെ നിരാശയിലാണ് ഇരു ടീമുകളും കളം വിട്ടത്.
