ഷെയ്ഖ് ഖലീഫ സ്ട്രീറ്റിൽ ടയറുകളുടെ കമ്പനത്തിലൂടെ ബീഥോവന്റെ സംഗീതമുതിർക്കുന്ന 750 മീറ്റർ റോഡ് ഒരുങ്ങി.
ഫുജൈറ: പ്രവാസലോകത്തിന് വീണ്ടുമൊരു അഭിമാന നിമിഷം സമ്മാനിച്ച് ലോകത്തിലെ ഏറ്റവും നീളമേറിയ മ്യൂസിക്കൽ സ്ട്രീറ്റ് (സംഗീത റോഡ്) എന്ന ഗിന്നസ് വേൾഡ് റെക്കോർഡ് സ്വന്തമാക്കി യുഎഇയിലെ ഫുജൈറ എമിറേറ്റ്. ഫുജൈറ നഗരത്തിന്റെ പ്രവേശന കവാടത്തിലുള്ള ഷെയ്ഖ് ഖലീഫ സ്ട്രീറ്റിൽ സജ്ജീകരിച്ച 750 മീറ്റർ നീളമുള്ള പ്രത്യേക റോഡാണ് ഈ അപൂർവ നേട്ടം കൈവരിച്ചത്. ദൈനംദിന യാത്രാവേളകളെ ജനങ്ങൾക്ക് ആസ്വാദ്യകരമായ സാംസ്കാരിക അനുഭവമാക്കി മാറ്റുകയാണ് ഈ പുതിയ പദ്ധതിയിലൂടെ ലക്ഷ്യമിടുന്നത്.
ഫുജൈറ അമീരി കോർട്ടിൽ നടന്ന പ്രൗഢഗംഭീരമായ ചടങ്ങിൽ ഫുജൈറ കിരീടാവകാശി ഷെയ്ഖ് മുഹമ്മദ് ബിൻ ഹമദ് അൽ ശർഖി ഔദ്യോഗിക ഗിന്നസ് വേൾഡ് റെക്കോർഡ് സർട്ടിഫിക്കറ്റ് ഏറ്റുവാങ്ങി. ഫുജൈറ ഫൈൻ ആർട്സ് അക്കാദമിയിലെ വിദഗ്ധ സംഘമാണ് ഈ വേറിട്ട കലാവിരുന്ന് റോഡിൽ യാഥാർത്ഥ്യമാക്കിയത്.
റോഡിൽ പ്രത്യേകം സ്പീക്കറുകൾ സ്ഥാപിച്ചല്ല ഇവിടെ സംഗീതം കേൾപ്പിക്കുന്നത് എന്നതാണ് ഈ പാതയുടെ പ്രധാന സവിശേഷത. റോഡിന്റെ ഉപരിതലത്തിൽ (അസ്ഫാൽറ്റ്) കൃത്യമായ അകലത്തിൽ നിർമ്മിച്ചിരിക്കുന്ന പ്രത്യേക ചാലുകളിലൂടെ വാഹനങ്ങൾ കടന്നുപോകുമ്പോൾ, ടയറുകൾ തമ്മിലുണ്ടാകുന്ന ഘർഷണവും കമ്പനവും വഴിയാണ് സംഗീതം പുറപ്പെടുവിിക്കുന്നത്. വിഖ്യാത പാശ്ചാത്യ സംഗീതജ്ഞൻ ബീഥോവന്റെ നൈന്ത് സിംഫണിയുടെ (Ninth Symphony) ഈണമാണ് ഈ റോഡിലൂടെ യാത്ര ചെയ്യുമ്പോൾ ഡ്രൈവർമാർക്ക് അനുഭവവേദ്യമാകുക. വിനോദസഞ്ചാര സാധ്യതകൾ വർദ്ധിപ്പിക്കുന്നതിനൊപ്പം ഡ്രൈവർമാരിൽ ജാഗ്രത ഉറപ്പുവരുത്താനും ഈ ക്രമീകരണം സഹായിക്കും.
പദ്ധതിക്ക് പിന്നിൽ പ്രവർത്തിച്ച ഫുജൈറ ഫൈൻ ആർട്സ് അക്കാദമി ഭാരവാഹികളെയും സാങ്കേതിക പ്രവർത്തകരെയും കിരീടാവകാശി അഭിനന്ദിച്ചു. അടിസ്ഥാന സൗകര്യ വികസനത്തോടൊപ്പം കലയും സംഗീതവും കോർത്തിണക്കുന്നത് ജനങ്ങളുടെ ജീവിതനിലവാരം ഉയർത്തുമെന്നും പൊതുസ്ഥലങ്ങളെ സവിശേഷമായ സാംസ്കാരിക കേന്ദ്രങ്ങളാക്കി മാറ്റുമെന്നും അദ്ദേഹം പറഞ്ഞു.
ഫുജൈറ ഭരണാധികാരിയും യുഎഇ സുപ്രീം കൗൺസിൽ അംഗവുമായ ഷെയ്ഖ് ഹമദ് ബിൻ മുഹമ്മദ് അൽ ശർഖിയുടെ ദീർഘവീക്ഷണത്തോടെയുള്ള നിർദ്ദേശങ്ങളുടെ അടിസ്ഥാനത്തിലാണ് എമിറേറ്റിൽ ഇത്തരം സർഗ്ഗാത്മക പദ്ധതികൾ നടപ്പിലാക്കുന്നത്. അക്കാദമിക്ക് സർക്കാർ നൽകുന്ന തുടർച്ചയായ പിന്തുണയ്ക്ക് ഫുജൈറ ഫൈൻ ആർട്സ് അക്കാദമി ഡയറക്ടർ ജനറൽ അലി ഉബൈദ് അൽ ഹഫിതി ചടങ്ങിൽ നന്ദി അറിയിച്ചു.
