ഫുജൈറ: ഇൻകാസ് ഫുജൈറയുടെ നേതൃത്വത്തിൽ സംഘടിപ്പിച്ച ഇൻകാസ്–ഉമ്മൻചാണ്ടി എക്സലൻസ് അവാർഡ് 2026 വിതരണച്ചടങ്ങ് ഫുജൈറ ഹൈൽ മീഡിയ പാർക്ക് കൺവെൻഷൻ സെന്ററിൽ നടന്നു. ഫുജൈറയും ഈസ്റ്റ് കോസ്റ്റ് മേഖലയിലുമുള്ള ഇന്ത്യൻ സ്കൂളുകളിലെ മികച്ച വിദ്യാർഥികൾ, അധ്യാപകർ, ബിസിനസ് രംഗത്ത് മികവ് തെളിയിച്ച വ്യക്തികൾ എന്നിവരെ ചടങ്ങിൽ ആദരിച്ചു.
150-ലധികം വിദ്യാർഥികൾക്കും അധ്യാപകർക്കും വിവിധ മേഖലകളിൽ മികച്ച പ്രകടനം കാഴ്ചവെച്ച വ്യക്തികൾക്കുമാണ് അവാർഡുകൾ സമ്മാനിച്ചത്. മൂവാറ്റുപുഴ എം.എൽ.എ ഡോ. മാത്യു കുഴൽനാടൻ ചടങ്ങ് ഉദ്ഘാടനം ചെയ്തു. വിദ്യാഭ്യാസ മികവും സാമൂഹിക മുന്നേറ്റവും പ്രോത്സാഹിപ്പിക്കുന്നതിന് പ്രവാസി സംഘടനകൾ നടത്തുന്ന ഇത്തരം പ്രവർത്തനങ്ങൾ ഏറെ മാതൃകാപരമാണെന്ന് അദ്ദേഹം അഭിപ്രായപ്പെട്ടു.
ഇൻകാസ് ഫുജൈറ പ്രസിഡന്റ് ജോജു മാത്യു അധ്യക്ഷത വഹിച്ചു. ചടങ്ങിൽ കൺവീനർ ഉസ്മാൻ ചൂരക്കോട് ആമുഖ പ്രഭാഷണം നടത്തി. ഇൻകാസ് ഫുജൈറ ജനറൽ സെക്രട്ടറി ലെസ്റ്റിൻ ഉണ്ണി സ്വാഗതവും മനു ജോൺ നന്ദിയും രേഖപ്പെടുത്തി.
പരിപാടിയിൽ ഇൻകാസ് ഫുജൈറ ട്രഷറർ ജിതേഷ് നമ്പറോൺ, ജനറൽ സെക്രട്ടറി പി.സി. ഹംസ, ഇൻകാസ് യു.എ.ഇ വർക്കിങ് പ്രസിഡന്റ് യേശുശീലൻ, സംഘടന ചുമതലയുള്ള ജനറൽ സെക്രട്ടറി സഞ്ജു പിള്ള, കെ.സി. അബൂബക്കർ, വൈസ് പ്രസിഡന്റ് അശോക് കുമാർ, ജനറൽ സെക്രട്ടറി ബി.എ. നാസർ, ഇൻകാസ് ഫുജൈറ വർക്കിങ് പ്രസിഡന്റ് ജി. പ്രകാശ്, നാസർ പറമ്പൻ, വൈസ് പ്രസിഡന്റ് ആനന്ദകുട്ടൻ, സെക്രട്ടറിമാരായ ഷജിൽ വടക്കേക്കണ്ടി, അനീഷ് മുക്കത്ത്, ഷാജി പൂക്കോട്, ജോയിന്റ് ട്രഷറർ മനാഫ്, സെൻട്രൽ കമ്മിറ്റി സെക്രട്ടറിമാരായ നാസർ പാണ്ടിക്കാട്, സുബൈർ ഇ.ടി., സെബാസ്റ്റ്യൻ, എക്സിക്യൂട്ടീവ് മെമ്പർ അഡ്വ. നസറുദ്ധീൻ എന്നിവരടക്കം നിരവധി നേതാക്കളും പ്രവർത്തകരും പങ്കെടുത്തു.
വിവിധ ജില്ലാ പ്രസിഡന്റുമാരും ഇൻകാസ് ഭാരവാഹികളും ചടങ്ങിൽ സാന്നിധ്യമറിയിച്ചു. അവാർഡ് വിതരണത്തിനൊപ്പം സംഘടിപ്പിച്ച കലാപരിപാടികളും ശ്രദ്ധേയമായി. ജവഹർ ചിൽഡ്രൻസ് ക്ലബ്ബിലെ കുട്ടികൾ അവതരിപ്പിച്ച നൃത്തപരിപാടി ചടങ്ങിന് കൂടുതൽ നിറം പകർന്നു.
പ്രവാസി സമൂഹത്തിലെ വിദ്യാഭ്യാസ മികവും സാമൂഹിക സംഭാവനകളും അംഗീകരിക്കുന്നതിനുള്ള വേദിയായി മാറിയ ഇൻകാസ്–ഉമ്മൻചാണ്ടി എക്സലൻസ് അവാർഡ് ചടങ്ങ് വലിയ ജനപങ്കാളിത്തത്തോടെയാണ് സമാപിച്ചത്.
