ഷാർജ: പ്രവാസ ലോകത്തെയും കേരളത്തിലെയും ബിസിനസ് പ്രമുഖരെയും വളർന്നുവരുന്ന സംരംഭകരെയും ഒരേ വേദിയിൽ അണിനിരത്തി ഷാർജ എക്‌സ്‌പോ സെന്ററിൽ സംഘടിപ്പിച്ച ‘ഐപിഎ ഈഗിൾ ബിസ്‌കോൺ 2026 – സീസൺ 4’ ശ്രദ്ധേയമായി. കേരളത്തിന് പുറത്തുള്ള ലോകത്തിലെ ഏറ്റവും വലിയ ബിസിനസ് കൂട്ടായ്മകളിലൊന്നായ, സംരംഭകൻ റിയാസ് കിൽട്ടൻ ചെയർമാനായ ഇന്റർനാഷണൽ പ്രമോട്ടേഴ്‌സ് അസോസിയേഷനും (ഐപിഎ), പ്രമുഖ ബിസിനസ് കോച്ച് ഷമീം റഫീഖിന്റെ നേതൃത്വത്തിലുള്ള ഈഗിൾസ് ബിസിനസ് ശൃംഖലയും സംയുക്തമായി സംഘടിപ്പിച്ച ബിസിനസ് കോൺക്ലേവിൽ യുഎഇയിലെയും കേരളത്തിലെയും അഞ്ഞൂറിലധികം സംരംഭകർ പങ്കെടുത്തു. കെ.കെ. ഹാരിസ് സ്വാഗതം പറഞ്ഞ ചടങ്ങിൽ ഡാന്യൂബ് ഗ്രൂപ്പ് സ്ഥാപകനും ചെയർമാനുമായ റിസ്‌വാൻ സാജൻ മുഖ്യാതിഥിയായി പങ്കെടുത്തു. മുംബൈയിലെ ചേരികളിൽ നിന്നാരംഭിച്ച് ദുബായിലെ റിയൽ എസ്റ്റേറ്റ് സാമ്രാജ്യത്തിലേക്കുള്ള തന്റെ ജീവിതയാത്ര അദ്ദേഹം സദസ്സുമായി പങ്കുവെച്ചു. നികുതി ഭാരം കുറഞ്ഞതും നിയമപരമായി എല്ലാവർക്കും സമത്വം ഉറപ്പാക്കുന്നതുമായ ദുബായ് ലോകത്തിലെ ഏറ്റവും മികച്ച ബിസിനസ് സൗഹൃദ നഗരമാണെന്നും, സോഷ്യൽ മീഡിയയുടെ ആഗോള കണക്ടിവിറ്റി ബിസിനസ് വളർച്ചയ്ക്ക് എങ്ങനെ ഫലപ്രദമായി ഉപയോഗിക്കാമെന്നതും അദ്ദേഹം വിശദീകരിച്ചു.
പരിപാടിയുടെ ഭാഗമായി നടന്ന ‘സക്സസ് കേസ് സ്റ്റഡി’ സെഷനിൽ നെല്ലറ, ഡീപ് സീ ഫുഡ്‌സ്, ഹോട്ട്പാക്ക് എന്നീ സ്ഥാപനങ്ങളുടെ സാരഥികൾ തങ്ങളുടെ വിജയാനുഭവങ്ങൾ പങ്കുവെച്ചു. ഷംസുദ്ധീൻ, ഫസലു റഹ്മാൻ, എ.കെ. മൊയ്തുണ്ണി, അബ്ദുള്ള (നെല്ലറ), ഫഹിയാസ്, യൂസഫ്, ഹംസ കെ.കെ, ഹാരിസ് (ഡീപ് സീ), അബ്ദുൽ ജബ്ബാർ, സൈനുദ്ധീൻ പി.ബി, ജാസിർ, അന്വർ, നിജിബ സുലൈമാൻ (ഹോട്ട്പാക്ക്) എന്നിവർ സെഷനിൽ സംസാരിച്ചു. തുടർന്ന് നടന്ന ‘വോയ്‌സ് ഓഫ് ഇൻഡസ്ട്രി’ പാനൽ ചർച്ചയിൽ ഹാരിസ് കണ്ടമ്പാട്ട് (ക്ലിക്കോൺ സിഇഒ), ജെന്നി ജോസഫ് (ജെന്നി ഫ്ലവേഴ്സ്), നിജിൽ ഇബ്രാഹിംകുട്ടി (ബ്ലൂഡോട്ട് എയർ ആംബുലൻസ്), റഷീദ് വി.പി (ഇബ്ൻ ബത്തൂത്ത ഡ്രഗ് സ്റ്റോർ), സതീഷ് കുമാർ (കാലിക്കറ്റ് നോട്ട്ബുക്ക് റെസ്റ്റോറന്റ്) എന്നിവർ വിവിധ വ്യവസായ മേഖലകളിലെ അനുഭവങ്ങൾ പങ്കുവെച്ചു.
കേരളത്തിന്റെ സംരംഭകത്വ മേഖലയിലെ കരുത്തും വിജയഗാഥകളും വിളിച്ചോതിക്കൊണ്ട് നാട്ടിൽ നിന്നെത്തിയ യുവ സംരംഭകർ തങ്ങളുടെ വിജയരഹസ്യങ്ങളും അനുഭവങ്ങളും പങ്കുവെച്ചത് ചടങ്ങിന്റെ മറ്റൊരു ശ്രദ്ധേയ മുഹൂർത്തമായി. അറ്റ്‌ലസ് മഹാറാണി ഗ്രൂപ്പ് മാനേജിംഗ് ഡയറക്ടർ റിയാസ്, അക്കര ഗോൾഡ് മാനേജിംഗ് ഡയറക്ടർ ജോസഫ്, എൽസോൾ പവർ സൊല്യൂഷൻസ് മാനേജിംഗ് ഡയറക്ടർ ടിൻസു മാത്യു, കോമ്പറ്റീറ്റീവ് ക്രാക്കർ മാനേജിംഗ് ഡയറക്ടർ ആശ ബിനീഷ് എന്നിവർ വെല്ലുവിളികളെ അതിജീവിച്ചുള്ള തങ്ങളുടെ സംരംഭക യാത്രകൾ സദസ്സിനോട് പങ്കുവെച്ച് പുതിയ തലമുറയിലെ സംരംഭകർക്ക് മാർഗ്ഗനിർദ്ദേശവും പ്രചോദനവും നൽകി.
ഐപിഎ ചെയർമാൻ റിയാസ് കിൽട്ടൻ അധ്യക്ഷത വഹിച്ചു. ഐപിഎ ഫൗണ്ടർ എ.കെ. ഫൈസൽ ഐപിഎയുടെ ലക്ഷ്യങ്ങളും ദൗത്യങ്ങളും വിശദീകരിച്ചു. സമാപന സമ്മേളനത്തിൽ ഏരീസ് ഗ്രൂപ്പ് ചെയർമാൻ സോഹൻ റോയ് മുഖ്യപ്രഭാഷണം നടത്തി. മുൻ യുഎഇ മന്ത്രി ഡോ. മുഹമ്മദ് സയിദ് അൽ കിന്ദി വിശിഷ്ടാതിഥിയായി പങ്കെടുത്തു. ഐപിഎയുടെ പത്താം വാർഷികത്തോടനുബന്ധിച്ച് ലോഗോ പ്രകാശനവും നടന്നു. പരിപാടികളുടെ വിശദാംശങ്ങൾ ജനറൽ കൺവീനർ യൂനസ് തണൽ വിശദീകരിച്ചു. വിവിധ വിഭാഗങ്ങളിലായി പുരസ്കാര വിതരണവും സംഘടിപ്പിച്ചു. ഹോപ്പ് ചൈൽഡ് ക്യാൻസർ കെയർ ഫൗണ്ടേഷൻ ചെയർമാൻ ഹാരിസ് കാട്ടകത്തിനെ ചടങ്ങിൽ ആദരിച്ചു. ട്രഷറർ ഷാജി നെരിക്കൊലി, പ്രോഗ്രാം ജനറൽ കൺവീനർ ബിബി ജോൺ എന്നിവർ സംസാരിച്ചു. ഫൗണ്ടർ ഷാഫി അൽ മുർഷിദി, വൈസ് ചെയർമാൻ അയ്യൂബ് കല്ലട, ഡയറക്ടർ ബോർഡ് അംഗങ്ങളായ കബീർ ടെലികോൺ, നാഗരാജ് ഭീമാ ഗോൾഡ്, നൗഷീർ Nray എന്നിവരും ചടങ്ങിൽ പങ്കെടുത്തു. അന്തരിച്ച വ്യവസായി ഡോ. സി.ജെ. റോയ്ക്ക് ചടങ്ങിൽ അനുശോചനം രേഖപ്പെടുത്തി
