ദുബൈ: കോട്ടുമല ബാപ്പു മുസ്ലിയാർ മെമ്മോറിയൽ എക്സലൻസ് അവാർഡിന് വേണ്ടി യു.എ.ഇ റഹ്മാനീസ് സംഘടിപ്പിച്ച അറബി കവിത രചനാ മത്സര വിജയികളെ പ്രഖ്യാപിച്ചു. സിബ്ഗത്തുല്ലാഹ് ഹുദവി, മുഹമ്മദ് അൻസാർ റഹ്മാനി, മുഹമ്മദ് ശഫീഅ് ഹുദവി എന്നിവർ യഥാക്രമം ആദ്യമൂന്ന് സ്ഥാനങ്ങൾ കരസ്ഥമാക്കി.
ദുബൈയിൽ വച്ചുനടന്ന ചടങ്ങിൽ അബ്ദുൽ ഹമീദ് ഫൈസി അമ്പലക്കടവ് ഫല പ്രഖ്യാപനം നടത്തി. ‘സമസ്ത’ എന്ന വിഷയത്തിൽ നടന്ന മത്സരത്തിലെ വിജയികൾക്ക് 20000,10000,5000 രൂപയും പ്രശസ്തി പത്രവും നൽകപ്പെടുന്നതാണ്. പ്രമുഖ പണ്ഡിതരും സമസ്ത കേന്ദ്ര മുശാവറ അംഗങ്ങളുമായ അബ്ദുസ്സലാം ബാഖവി വടക്കേക്കാട്, ബശീർ അബ്ദുല്ല ഫൈസി ചീക്കോന്ന്, ഡോ.സി.കെ അബ്ദുറഹ്മാൻ ഫൈസി അരിപ്ര എന്നിവരടങ്ങുന്ന ജൂറിയാണ് വിജയികളെ തെരഞ്ഞെടുത്തത്.
നൂറ്റാണ്ടു തികയുന്ന സമസ്തയെ അന്താരാഷ്ട്ര തലത്തിൽ പരിചയപ്പെടുത്തുകയും അറബി ഭാഷയിൽ കഴിവുള്ള പ്രതിഭകളെ പ്രോത്സാഹിപ്പിക്കുകയും സുപ്രഭാതം സ്ഥാപക ചെയർമാനും സമസ്തക്കും സമൂഹത്തിനും വലിയ സംഭാവനകളർപ്പിക്കുകയും ചെയ്ത കോട്ടുമല ബാപ്പു മുസ്ലിയാരുടെ ഓർമകൾ നിലനിറുത്തുകയും ചെയ്യുക എന്ന ലക്ഷ്യത്തോടെയാണ് മത്സരം നടത്തപ്പെട്ടത്.
അടുത്ത മാസം കടമേരിയിൽ നടക്കുന്ന കോട്ടുമല ബാപ്പു മുസ്ലിയാർ സ്മാരക തിയോപാർക്ക് ഉദ്ഘാടന സംഗമത്തിൽ വച്ച് വിജയികൾക്കുള്ള അവാർഡുകൾ വിതരണം ചെയ്യുന്നതാണ്. ഫല പ്രഖ്യാപന ചടങ്ങിൽ അബ്ദുൽ ജലീൽ ദാരിമി, ഷൗക്കത്തലി ഹുദവി, സൂപ്പി ഹാജി കടവത്തൂർ, ഹുസൈൻ ദാരിമി,പി.പി ഇബ്രാഹീം ഫൈസി,എം.എ സലാം റഹ്മാനി കൂട്ടാലുങ്ങൽ, അബ്ദുല്ല റഹ്മാനി വയനാട്, റഫീഖ് റഹ്മാനി മാപ്പാട്ടുകര, നാസർ റഹ്മാനി തിരുവള്ളൂർ സംബന്ധിച്ചു.
