ദുബായ്: GCC മേഖലയിൽ ആദ്യമായാണ് ലോകമെമ്പാടുമുള്ള മലയാള കഥാകൃത്തുക്കളെ ഉൾപ്പെടുത്തി ഒരു വിപുലമായ കഥാമത്സരം സംഘടിപ്പിക്കുന്നത്. മാതൃഭൂമി ബുക്സും അക്കാഫ് ഇവന്റ്സും സംയുക്തമായി നടത്തുന്ന ഈ സാഹിത്യ സംരംഭം മലയാള സാഹിത്യരംഗത്ത് ശ്രദ്ധേയമായൊരു മുന്നേറ്റമായി വിലയിരുത്തപ്പെടുന്നു.
പ്രൊഫസർ വർഗീസ് ഉമ്മൻ സ്മാരക ക്യാഷ് പ്രൈസ് ഉൾപ്പെടുന്ന ഈ മത്സരത്തിന്റെ ഔദ്യോഗിക പ്രഖ്യാപനവും പോസ്റ്റർ പ്രകാശനവും നാളെ (മെയ് 1, വെള്ളിയാഴ്ച) വൈകിട്ട് 7 മണിക്ക് ദുബായിലെ അൽ നഹ്ദയിൽ പ്രവർത്തിക്കുന്ന അക്കാഫ് ഓഫീസിൽ വെച്ച് നടക്കും. ചടങ്ങിൽ മാതൃഭൂമി ബുക്സിന്റെയും അക്കാഫ് ഇവന്റ്സിന്റെയും പ്രതിനിധികൾ പങ്കെടുക്കും.
ലോകത്തിന്റെ വിവിധ ഭാഗങ്ങളിലായി താമസിക്കുന്ന മലയാളി കഥാകൃത്തുക്കൾക്ക് അവരുടെ സൃഷ്ടിപരമായ കഴിവുകൾ അവതരിപ്പിക്കാൻ മികച്ച വേദിയൊരുക്കുക എന്നതാണ് ഈ മത്സരത്തിന്റെ പ്രധാന ലക്ഷ്യം. പുതുമുഖങ്ങൾക്കും പരിചയസമ്പന്നരായ എഴുത്തുകാർക്കും ഒരുപോലെ അവസരം നൽകുന്ന തരത്തിലാണ് മത്സരത്തിന്റെ രൂപകൽപ്പന.
അക്കാഫ് സാഹിത്യ വിഭാഗത്തിന്റെ ജനറൽ കൺവീനർ അജിത് കണ്ടല്ലൂറും കോർഡിനേറ്റർ ദീപിക സുജിതും എല്ലാ അക്കാഫ് അംഗങ്ങളെയും ചടങ്ങിലേക്ക് സാദരം ക്ഷണിച്ചു. സാഹിത്യസ്നേഹികളും എഴുത്തുകാരും വലിയ തോതിൽ പങ്കെടുക്കുമെന്ന പ്രതീക്ഷയിലാണ് സംഘാടകർ.
