ദുബൈ: മാധ്യമപ്രവർത്തകരുടെ ക്ഷേമത്തിന് കൂടുതൽ കരുത്തായി കേരള പത്രപ്രവർത്തക യൂണിയൻ നടപ്പാക്കുന്ന ആരോഗ്യ ഇൻഷുറൻസ് പദ്ധതിയുമായി ബന്ധപ്പെട്ട് (KUWJ) മിഡിൽ ഈസ്റ്റ് കമ്മിറ്റിയും മലബാർ ഗോൾഡ് ആൻഡ് ഡയമണ്ട്സും തമ്മിൽ ധാരണാപത്രം കൈമാറി.
ദുബായിലെ മലബാർ ഗോൾഡ് ആൻഡ് ഡയമണ്ട്സിന്റെ ഇന്റർനാഷണൽ ഹെഡ്ക്വാർട്ടേഴ്സിൽ നടന്ന ചടങ്ങിലാണ് ധാരണാപത്രം കൈമാറിയത്. ചടങ്ങ് മലബാർ ഗോൾഡ് ആൻഡ് ഡയമണ്ട്സ് എംഡി ഷംലാൽ അഹമ്മദ് ഉദ്ഘാടനം ചെയ്തു.
യു.എ.ഇയിലെ മാധ്യമപ്രവർത്തകർക്ക് ആരോഗ്യ ഇൻഷുറൻസ് ഉറപ്പാക്കാൻ എല്ലാ പിന്തുണയും നൽകുമെന്ന് ഷംലാൽ അഹമ്മദ് അറിയിച്ചു. മലബാർ ഗോൾഡിന്റെ വളർച്ചയിൽ മാധ്യമങ്ങളുടെയും മാധ്യമപ്രവർത്തകരുടെയും പങ്ക് നിർണായകമാണെന്നും അദ്ദേഹം ചൂണ്ടിക്കാട്ടി.
കെ.യു.ഡബ്ല്യു.ജെ മിഡിൽ ഈസ്റ്റ് സെക്രട്ടറി ടി. ജമാലുദ്ദീൻ സ്വാഗതം പറഞ്ഞു. പ്രസിഡന്റ് മിന്റു പി. ജേക്കബ് അധ്യക്ഷത വഹിച്ചു. വൈസ് ചെയർമാൻ കെ.പി. അബ്ദുൽ സലാം ചടങ്ങിൽ സംസാരിച്ചു. ട്രഷറർ ടി.കെ. മനാഫ് നന്ദി രേഖപ്പെടുത്തി.
മാധ്യമപ്രവർത്തകർക്കായി നടപ്പാക്കുന്ന സമഗ്ര ആരോഗ്യ ഇൻഷുറൻസ് പദ്ധതിയുമായി ബന്ധപ്പെട്ട് മലബാർ ഗോൾഡ് തുടർച്ചയായി നാലാം വർഷമാണ് സഹകരിക്കുന്നത്.
ഇതോടെ, പ്രവാസി മാധ്യമപ്രവർത്തകരുടെ ആരോഗ്യ സുരക്ഷ ഉറപ്പാക്കുന്നതിൽ കെ.യു.ഡബ്ല്യു.ജെയും മലബാർ ഗോൾഡും ചേർന്ന് ശക്തമായ പിന്തുണ നൽകുന്ന സാഹചര്യമാണുണ്ടായത്.
