ഫുജൈറ: സാമ്പത്തിക പ്രതിസന്ധികളോ പ്രതികൂല സാഹചര്യങ്ങളോ എന്തുതന്നെയായാലും ലുലു ഗ്രൂപ്പിലെ ജീവനക്കാർക്ക് കൃത്യസമയത്ത് ശമ്പളം ഉറപ്പാക്കുമെന്ന് ചെയർമാൻ എം.എ. യൂസഫലി. ഫുജൈറയിൽ മാധ്യമപ്രവർത്തകരോട് സംസാരിക്കവേയാണ് ജീവനക്കാരുടെ ക്ഷേമത്തിന് മുൻഗണന നൽകുന്ന തന്റെ നിലപാട് അദ്ദേഹം ആവർത്തിച്ചത്.
ഏത് പ്രതിസന്ധി ഘട്ടത്തിലും പതറാതെ നിൽക്കുക എന്നത് ഒരു സ്ഥാപനത്തിന്റെ കടമയാണെന്ന് അദ്ദേഹം പറഞ്ഞു. ഉപഭോക്താക്കൾക്ക് ആവശ്യസാധനങ്ങൾ മുടക്കമില്ലാതെ എത്തിക്കുന്നതിനോടൊപ്പം തന്നെ പ്രധാനമാണ് ജീവനക്കാരുടെ കാര്യങ്ങൾ നോക്കുന്നതും. കോവിഡ് മഹാമാരിയുടെ കാലത്ത് ലോകമെമ്പാടുമുള്ള പല കമ്പനികളും ശമ്പളം വെട്ടിക്കുറച്ചപ്പോൾ ലുലു ഗ്രൂപ്പ് ഒരു രൂപ പോലും കുറച്ചിരുന്നില്ലെന്ന് അദ്ദേഹം ഓർമ്മിപ്പിച്ചു.
”കയ്യിൽ പണമില്ലാത്ത സാഹചര്യം വന്നാൽ പോലും ബാങ്കിൽ നിന്ന് വായ്പ എടുത്താണെങ്കിലും ജീവനക്കാർക്ക് കൃത്യസമയത്ത് ശമ്പളം നൽകും. കൊറോണ കാലത്ത് ഇത്തരത്തിൽ ബാങ്ക് ലോൺ എടുത്ത് ശമ്പളം നൽകിയ സാഹചര്യമുണ്ടായിട്ടുണ്ട്,” – യൂസഫലി വ്യക്തമാക്കി.
തന്റെ സ്ഥാപനത്തിൽ ജോലി ചെയ്യുന്നവരുടെ കുടുംബങ്ങൾ നാട്ടിൽ കഴിയുന്നത് ഇവിടുത്തെ ശമ്പളം പ്രതീക്ഷിച്ചാണെന്നും, ആ പ്രതീക്ഷകൾക്ക് മങ്ങലേൽപ്പിക്കാൻ താൻ ആഗ്രഹിക്കുന്നില്ലെന്നും അദ്ദേഹം കൂട്ടിച്ചേർത്തു. ജീവനക്കാർക്ക് നൽകുന്ന ഈ ഉറപ്പ് ലുലു ഗ്രൂപ്പിന്റെ മാനുഷിക പരിഗണനയുടെയും വിശ്വാസ്യതയുടെയും അടയാളമായി മാറുകയാണ്.
