ദുബായ്: മ്യൂസിയം ഓഫ് ദി ഫ്യൂച്ചർ ആരംഭിച്ച വ്യത്യസ്തമായ തൊഴിൽ അന്വേഷണ പദ്ധതിയായ ‘ഫ്യൂച്ചർ പെർഫെക്ട്സ്’ വലിയ ശ്രദ്ധ നേടുന്നു. പദ്ധതി ആരംഭിച്ച് വെറും 48 മണിക്കൂറിനുള്ളിൽ 20,000-ത്തിലധികം അപേക്ഷകളാണ് ലഭിച്ചത്. ഔദ്യോഗിക വെബ്സൈറ്റ് 42,000 തവണ സന്ദർശിക്കപ്പെട്ടതായും മ്യൂസിയം അധികൃതർ അറിയിച്ചു.
2026 ഒക്ടോബർ 21-നാണ് പദ്ധതി ആരംഭിച്ചത്. 2027-ൽ പുതിയ രൂപത്തിലും അനുഭവങ്ങളിലുമായി വീണ്ടും തുറക്കാനൊരുങ്ങുന്ന മ്യൂസിയത്തിലെ സന്ദർശക അനുഭവങ്ങൾ കൂടുതൽ മികച്ചതാക്കുന്നതിനായി അനുയോജ്യരായ വ്യക്തികളെ കണ്ടെത്തുകയാണ് ലക്ഷ്യം.
പരമ്പരാഗത നിയമന രീതികളിൽനിന്ന് വ്യത്യസ്തമായി, ഉദ്യോഗാർഥികളുടെ സർട്ടിഫിക്കറ്റുകൾക്കും മുൻകാല തൊഴിൽപരിചയത്തിനും പകരം ഭാവനാശേഷി, ജിജ്ഞാസ, വൈകാരിക ബുദ്ധി, ഊഷ്മളമായ പെരുമാറ്റം, സാഹചര്യങ്ങളോട് പൊരുത്തപ്പെടാനുള്ള കഴിവ് തുടങ്ങിയ മാനുഷിക ഗുണങ്ങൾക്കാണ് പദ്ധതിയിൽ മുൻഗണന നൽകുന്നത്. മ്യൂസിയത്തിലോ കസ്റ്റമർ സർവീസ് മേഖലയിലോ മുൻപരിചയം നിർബന്ധമില്ലെന്നതും പ്രത്യേകതയാണ്.
മാനുഷിക കഴിവുകൾക്ക് പ്രാധാന്യം
സിവിയിൽ രേഖപ്പെടുത്തിയിട്ടുള്ള യോഗ്യതകൾക്കപ്പുറം വ്യക്തികളുടെ കഴിവുകളും സാധ്യതകളും തിരിച്ചറിയുന്ന തൊഴിൽ അവസരങ്ങളോടുള്ള താൽപര്യമാണ് ആദ്യ 48 മണിക്കൂറിലെ പ്രതികരണം വ്യക്തമാക്കുന്നതെന്ന് മ്യൂസിയം ഓഫ് ദി ഫ്യൂച്ചറിന്റെ ചീഫ് ഓപ്പറേറ്റിങ് ഓഫീസർ അസ്സ അൽ നുഐമി പറഞ്ഞു.
പരമ്പരാഗത തൊഴിൽമാർഗങ്ങൾക്കപ്പുറമുള്ള കഴിവുകളെ തിരിച്ചറിയുന്നതിൽ ദുബായ് എന്നും വിശ്വസിച്ചിട്ടുണ്ടെന്നും ‘ഫ്യൂച്ചർ പെർഫെക്ട്സ്’ ആ സമീപനത്തിന്റെ പ്രായോഗിക രൂപമാണെന്നും അവർ വ്യക്തമാക്കി. അറിവ് മാത്രം ഭാവി രൂപപ്പെടുത്താൻ മതിയാകില്ലെന്നും ആ അറിവ് മറ്റുള്ളവർക്ക് മനസ്സിലാകുന്ന രീതിയിൽ കൈമാറാനുള്ള കഴിവും പ്രധാനമാണെന്നും അവർ കൂട്ടിച്ചേർത്തു.
ലഭിച്ച അപേക്ഷകൾ മ്യൂസിയത്തിന്റെ റിക്രൂട്ട്മെന്റ് സംഘം പരിശോധിച്ചുതുടങ്ങി. പ്രാഥമിക വിലയിരുത്തലുകൾക്കും ചുരുക്കപ്പട്ടിക തയ്യാറാക്കുന്നതിനും ശേഷം വിദഗ്ധ സമിതിക്ക് മുന്നിൽ നേരിട്ടുള്ള ഓഡിഷനുകളും നടക്കും.
തിരഞ്ഞെടുക്കപ്പെടുന്നവർ മ്യൂസിയത്തിന്റെ സന്ദർശക അനുഭവ വിഭാഗത്തിൽ മുഴുവൻ സമയ ജീവനക്കാരായി പ്രവർത്തിക്കും. ശാസ്ത്രം, സാങ്കേതികവിദ്യ, പ്രകൃതി, സമൂഹം, ഭാവി തുടങ്ങിയ വിഷയങ്ങളുമായി സന്ദർശകരെ കൂടുതൽ അർഥവത്തായ രീതിയിൽ ബന്ധിപ്പിക്കുകയാണ് ഇവരുടെ പ്രധാന ചുമതല.
നവംബർ 8 വരെ അപേക്ഷിക്കാം
താൽപര്യമുള്ളവർക്ക് 2026 നവംബർ 8 വരെ അപേക്ഷ സമർപ്പിക്കാം. ഔദ്യോഗിക വെബ്സൈറ്റായ futureperfects.ae വഴിയാണ് അപേക്ഷിക്കേണ്ടത്.
പരമ്പരാഗത യോഗ്യതകൾക്കപ്പുറം വ്യക്തിത്വത്തിനും മാനുഷിക കഴിവുകൾക്കും പ്രാധാന്യം നൽകുന്ന ഈ പദ്ധതി, ഭാവിയിലെ തൊഴിൽ മേഖലയിൽ പുതിയൊരു മാതൃക അവതരിപ്പിക്കുമെന്നാണ് പ്രതീക്ഷ.
