ഷാർജ: ഷാർജയിൽ വിദ്യാഭ്യാസ മേഖലയെ കൂടുതൽ ശക്തിപ്പെടുത്തുന്ന പുതിയ പദ്ധതിയുമായി ഷാർജ നിക്ഷേപ-വികസന അതോറിറ്റി (ഷുറൂഖ്) മുന്നോട്ട്. അമേരിക്കൻ പാഠ്യപദ്ധതി പിന്തുടരുന്ന അത്യാധുനിക ഹയർസെക്കൻഡറി സ്കൂൾ സ്ഥാപിക്കുന്നതിനായി സനം ഗ്രൂപ്പുമായി ഷുറൂഖ് കരാർ ഒപ്പുവെച്ചു. ഷാർജ സസ്റ്റെയിനബിൾ സിറ്റിയിലായിരിക്കും പുതിയ വിദ്യാഭ്യാസ കാമ്പസ് നിർമ്മിക്കുക.
35 വർഷത്തെ കരാറിന്റെ അടിസ്ഥാനത്തിൽ ഉമ്മു ഫനൈൻ/അൽ റുഖ അൽ ഹംറ പ്രദേശത്തെ 29,275 ചതുരശ്ര മീറ്റർ വിസ്തൃതിയുള്ള ഷുറൂഖിന്റെ ഭൂമിയിലാണ് സ്കൂൾ ഉയരുന്നത്. നഴ്സറി മുതൽ 12-ാം ക്ലാസ് വരെ ഏകദേശം 2435 വിദ്യാർഥികൾക്ക് ഇവിടെ പഠിക്കാനാകും. പദ്ധതിയിലൂടെ വരും വർഷങ്ങളിൽ 18.3 കോടി ദിർഹത്തിന്റെ നിക്ഷേപം ആകർഷിക്കാനാകുമെന്നാണ് പ്രതീക്ഷിക്കുന്നത്.
ആധുനിക വിദ്യാഭ്യാസ ആവശ്യങ്ങൾ മുൻനിർത്തിയാണ് പുതിയ കാമ്പസ് രൂപകൽപ്പന ചെയ്തിരിക്കുന്നത്. സ്മാർട്ട് ക്ലാസ് മുറികൾ, സയൻസ്-ടെക്നോളജി ലാബുകൾ, റോബോട്ടിക്സ്-എൻജിനീയറിങ് ലാബുകൾ, ഇന്നോവേഷൻ-മേക്കർ സ്പേസുകൾ, വിവിധ അക്കാദമിക് തലങ്ങൾക്ക് അനുയോജ്യമായ മൂന്ന് ലൈബ്രറികൾ എന്നിവ സ്കൂളിന്റെ പ്രധാന സവിശേഷതകളായിരിക്കും.
കുട്ടികളുടെ സർഗാത്മകതയും സഹകരണ മനോഭാവവും വളർത്താൻ ആർട്സ് സ്റ്റുഡിയോകൾ, ഓപ്പൺ ലേണിങ് ഹബുകൾ, ബ്ലാക്ക് ബോക്സ് തിയേറ്റർ, 500 സീറ്റുകളുള്ള മൾട്ടി പർപ്പസ് ഹാൾ എന്നിവയും കാമ്പസിൽ ഒരുക്കും. നഴ്സറി കുട്ടികൾക്കായി പ്രത്യേക സുരക്ഷാ സംവിധാനങ്ങളോടുകൂടിയ മേഖലകളും കൗൺസിലിങ് ഓഫിസുകളും തെറാപ്പി, സെൻസറി റൂമുകൾ, പ്രത്യേക ക്ലിനിക്കുകൾ എന്നിവയും പദ്ധതിയിൽ ഉൾപ്പെടുത്തിയിട്ടുണ്ട്.
കായിക വികസനത്തിനും പ്രത്യേക പ്രാധാന്യം നൽകുന്ന രീതിയിലാണ് പദ്ധതി തയ്യാറാക്കിയിരിക്കുന്നത്. ഇൻഡോർ സ്പോർട്സ് ഹാൾ, ഫുട്ബോൾ പിച്ച്, സ്വിമ്മിങ് പൂളുകൾ, റൂഫ് ടോപ്പ് വിനോദ കേന്ദ്രങ്ങൾ, കാൽനട പാതകൾ, ബോട്ടാണിക്കൽ ഗാർഡൻ എന്നിവയും ക്യാമ്പസിന്റെ ഭാഗമാകും.
ഷുറൂഖ് സി.ഇ.ഒ അഹമ്മദ് ഉബൈദുൽ ഖസീറിന്റെ സാന്നിധ്യത്തിൽ ഷുറൂഖ് ചീഫ് റിയൽ എസ്റ്റേറ്റ് ഓഫിസർ യൂസഫ് അൽ മുതവ്വയും സനം ഗ്രൂപ്പ് വൈസ് ചെയർമാനും സി.ഇ.ഒയുമായ ഡോ. സുലൈമാൻ താരിഖുൽ അബ്ദുൽ ജാദറും കരാറിൽ ഒപ്പുവെച്ചു.
ഷാർജയിൽ വേഗത്തിൽ വളരുന്ന റസിഡൻഷ്യൽ കമ്മ്യൂണിറ്റികളുടെ വിദ്യാഭ്യാസ ആവശ്യങ്ങൾ നിറവേറ്റുന്നതിനുള്ള പദ്ധതികളുടെ ഭാഗമായാണ് പുതിയ സ്കൂൾ വരുന്നതെന്ന് യൂസഫ് അൽ മുതവ്വ വ്യക്തമാക്കി. മികച്ച വിദ്യാഭ്യാസ സൗകര്യങ്ങൾ കുടുംബങ്ങളുടെ ജീവിത നിലവാരം ഉയർത്തുന്നതിൽ നിർണായകമാണെന്നും അദ്ദേഹം കൂട്ടിച്ചേർത്തു.
