കോൺസ്റ്റന്റ് f/2.8 അപ്പർച്ചറും ഇൻ-ബിൽറ്റ് 1.4x ടെലികൺവെർട്ടറുമുള്ള ലോകത്തിലെ ആദ്യ സൂം ലെൻസ് വിപണിയിൽ
ദുബായ് — പ്രൊഫഷണൽ സ്പോർട്സ്, ആക്ഷൻ ഫോട്ടോഗ്രാഫർമാർക്കായി അത്യാധുനിക ടെലിഫോട്ടോ സൂം ലെൻസ് അവതരിപ്പിച്ച് നിക്കോൺ. ഫുൾ-ഫ്രെയിം മിറർലെസ് ക്യാമറകൾക്കായുള്ള ‘നിക്കോർ Z 120-300mm f/2.8 TC VR S’ ലെൻസാണ് നിക്കോൺ മിഡിൽ ഈസ്റ്റ് ഔദ്യോഗികമായി പുറത്തിറക്കിയത്. കോൺസ്റ്റന്റ് f/2.8 മാക്സിമം അപ്പർച്ചറിനൊപ്പം ഇൻ-ബിൽറ്റ് 1.4x ടെലികൺവെർട്ടർ ഉൾപ്പെടുത്തിയ ലോകത്തിലെ ആദ്യ ഇന്റർചേഞ്ചബിൾ സൂം ലെൻസാണിത്.
നിക്കോണിന്റെ പ്രീമിയം ‘എസ്-ലൈൻ’ (S-Line) വിഭാഗത്തിൽ ഉൾപ്പെടുന്ന ഈ ലെൻസ് 120-300mm ഫോക്കൽ ലെങ്ത് പരിധി നൽകുന്നു. ലെൻസിലെ സ്വിച്ച് ഉപയോഗിച്ച് ഒറ്റ നീക്കത്തിലൂടെ ഇതിന്റെ പരിധി 420mm (f/4) വരെ വർധിപ്പിക്കാം. ലെൻസുകൾ മാറി ഘടിപ്പിക്കാതെ തന്നെ അതിവേഗ കായിക മത്സരങ്ങൾ, വൈൽഡ് ലൈഫ് രംഗങ്ങൾ എന്നിവ കൃത്യതയോടെ ഒപ്പിയെടുക്കാൻ ഇത് ഫോട്ടോഗ്രാഫർമാരെ സഹായിക്കും.
മുൻ തലമുറ ലെൻസായ എഎഫ്-എസ് നിക്കോർ 120-300mm മോഡലിനേക്കാൾ 515 ഗ്രാം ഭാരക്കുറവോടെ, 2,735 ഗ്രാമിലാണ് പുതിയ ലെൻസ് രൂപകൽപ്പന ചെയ്തിരിക്കുന്നത്. ഇത് ക്യാമറ കൈകാര്യം ചെയ്യുന്നത് കൂടുതൽ എളുപ്പമാക്കുന്നു.
വേഗത്തിൽ ചലിക്കുന്ന അത്‌ലറ്റുകൾ, വാഹനങ്ങൾ, പക്ഷികൾ എന്നിവയെ കൃത്യമായി പിന്തുടർന്ന് ഫോക്കസ് ചെയ്യാൻ നിക്കോണിന്റെ ‘സിൽക്കി സ്വിഫ്റ്റ് വിസിഎം’ (SSVCM) ഓട്ടോഫോക്കസ് സംവിധാനം ഇതിൽ സജ്ജീകരിച്ചിട്ടുണ്ട്. സ്റ്റേഡിയം ഫ്ലഡ്‌ലൈറ്റുകൾ, ശക്തമായ സൂര്യപ്രകാശം എന്നിവ മൂലമുണ്ടാകുന്ന ഫ്ലെയർ, ഗോസ്റ്റിങ് എന്നിവ തടയാൻ മെസോ അമോർഫസ് കോട്ടിങ്, ആർനിയോ (ARNEO) കോട്ടിങ് സാങ്കേതികവിദ്യകളും നൽകിയിരിക്കുന്നു. സിൻക്രോ വിആർ പിന്തുണയുള്ള ക്യാമറകളിൽ 6.5 സ്റ്റോപ്പ് വരെ വൈബ്രേഷൻ റിഡക്ഷനും ലഭ്യമാകും.
ഫോക്കസിങ്ങിലും സൂമിങ്ങിലും ലെൻസിന്റെ നീളത്തിൽ മാറ്റം വരാത്ത ഇന്റേണൽ സൂം-ഫോക്കസ് മെക്കാനിസമാണ് ലെൻസിന്റെ മറ്റൊരു പ്രത്യേകത. കഠിനമായ കാലാവസ്ഥയെ പ്രതിരോധിക്കുന്ന ഡസ്റ്റ്-ഡ്രിപ്പ് റെസിസ്റ്റന്റ് സീലിങ്, ആർക്കാ-സ്വിസ് ക്വിക്ക് റിലീസ് ട്രൈപോഡ് കോളർ, ഫ്രണ്ട്-റിയർ ഫിൽട്ടർ സംവിധാനങ്ങൾ എന്നിവയോടെയാണ് ലെൻസ് എത്തുന്നത്.
