ദുബൈ: ചരിത്രം മാറ്റിയെഴുതപ്പെടുന്ന കാലഘട്ടത്തിൽ ‘ഒ എൽ എഫ്’ പോലുള്ള സാംസ്കാരിക വേദികൾക്കും സാഹിത്യ സംവാദങ്ങൾക്കും നിർണായക പങ്ക് വഹിക്കാനുണ്ടെന്ന് മുൻ മന്ത്രിയും മുൻ എംപിയുമായ പി.കെ. ശ്രീമതി ടീച്ചർ അഭിപ്രായപ്പെട്ടു. പ്രവാസലോകത്തെ ഏറ്റവും വലിയ മലയാള സാഹിത്യ സാംസ്കാരികോത്സവമായ ‘ഓർമ ലിറ്ററേച്ചർ ഫെസ്റ്റ് – ഒ എൽ എഫ് 2026’ ഉദ്ഘാടനം ചെയ്ത് സംസാരിക്കുകയായിരുന്നു അവർ.
ഓർമ്മകൾ മായ്ച്ചു കളയപ്പെടുന്ന പുതിയ രാഷ്ട്രീയ സാഹചര്യങ്ങളിൽ പുതുതലമുറ കാട്ടുന്ന ജാഗ്രതയുടെ അടയാളമാണ് ‘ഓർമ’യുടെ ഈ സാഹിത്യോത്സവമെന്ന് മുഖ്യാതിഥിയായ പ്രശസ്ത സാഹിത്യകാരൻ എം. മുകുന്ദൻ അഭിപ്രായപ്പെട്ടു.
ഫെബ്രുവരി 13ന് വൈകിട്ട് 9 മണിക്ക് നടന്ന ഉദ്ഘാടന സമ്മേളനത്തിൽ ഓർമ പ്രസിഡൻറ് നൗഫൽ പട്ടാമ്പി അധ്യക്ഷത വഹിച്ചു. ഫെബ്രുവരി 14, 15 തീയതികളിലായി നടക്കുന്ന സാഹിത്യ ചർച്ചകളും സാംസ്കാരിക സംവാദങ്ങളും വിവിധ വിഷയങ്ങളെ ആസ്പദമാക്കി സംഘടിപ്പിക്കപ്പെടും.
എഴുത്തുകാരൻ പി.എൻ. ഗോപീകൃഷ്ണൻ, കവി മ്യൂസ് മേരി ജോർജ്ജ്, മാധ്യമപ്രവർത്തകൻ അഭിലാഷ് മോഹൻ എന്നിവർ ഇത്തവണ അതിഥികളായി പങ്കെടുക്കും. കൂടാതെ, യു.എ.ഇയിൽ നിന്നുള്ള നിരവധി പ്രവാസ മലയാളി എഴുത്തുകാരും സാഹിത്യ-സാംസ്കാരിക പ്രവർത്തകരും വിവിധ സെഷനുകളിൽ സജീവ സാന്നിധ്യം രേഖപ്പെടുത്തും.
ഓർമ ജനറൽ സെക്രട്ടറി ഷിജു ബഷീർ സ്വാഗതം പറഞ്ഞ് പരിപാടി ആരംഭിച്ചു. പ്രവാസി ക്ഷേമനിധി ഡയറക്ടറും ലോക കേരള സഭാംഗവുമായ എൻ.കെ. കുഞ്ഞഹമ്മദ്, ഒ എൽ എഫ് ജനറൽ കൺവീനർ പ്രദീപ് തോപ്പിൽ, ഓർമ സാഹിത്യ വിഭാഗം കൺവീനർ അംബുജം സതീഷ് എന്നിവർ ആശംസകൾ അറിയിച്ചു. ഓർമ സെക്രട്ടറി കാവ്യ സനത് നന്ദി രേഖപ്പെടുത്തി.
