കണ്ണൂർ: എൽ.ഡി.എഫിന്റെ ഔദ്യോഗിക തെരഞ്ഞെടുപ്പ് പ്രചാരണത്തിന് തുടക്കമിട്ട് മുഖ്യമന്ത്രി പിണറായി വിജയന്റെ റോഡ് ഷോ കണ്ണൂർ വിമാനത്താവളത്തിൽ നിന്ന് ആരംഭിച്ചു. വിമാനത്താവളം മുതൽ പിണറായി വരെയായി പ്രവർത്തകർ മുഖ്യമന്ത്രിയെ അനുഗമിക്കുന്നു.
വലിയ ആവേശത്തോടെയാണ് പ്രവർത്തകർ മുഖ്യമന്ത്രിയെ വരവേറ്റത്. പാർട്ടിക്കുള്ളിൽ സ്ഥാനാർഥി സംബന്ധമായ ചർച്ചകളും ചില അസംതൃപ്തികളും നിലനിൽക്കുന്നതിനിടെയാണ് പിണറായി വിജയൻ നേരിട്ട് പ്രചാരണ രംഗത്തിറങ്ങുന്നത്. എന്നാൽ പ്രശ്നങ്ങൾ പരിഹരിച്ച് മുന്നോട്ട് പോകാനാണ് നേതൃത്വത്തിന്റെ നീക്കമെന്ന് പ്രവർത്തകർ പറയുന്നു.
“നമ്മൾ ഒന്നിച്ച് ഇറങ്ങുകയല്ലേ” എന്ന ടാഗ് ലൈനിലാണ് കണ്ണൂരിൽ പ്രചാരണ പ്രവർത്തനങ്ങൾ ആരംഭിച്ചിരിക്കുന്നത്. പിണറായി വിജയനെതിരെ മത്സരിക്കാൻ ആരെത്തുമെന്ന കാര്യവും രാഷ്ട്രീയ വൃത്തങ്ങളിൽ ശ്രദ്ധ നേടുകയാണ്.
തുടർഭരണം ലക്ഷ്യമിട്ട് സി.പി.എം പ്രചാരണത്തിന് തുടക്കം കുറിച്ചിരിക്കുകയാണ്. റോഡ് ഷോയ്ക്ക് ശേഷം മുഖ്യമന്ത്രി മാധ്യമങ്ങളെ കാണാനാണ് സാധ്യത. മണ്ഡലത്തിലെ വിവിധ ഭാഗങ്ങളിൽ കുടുംബയോഗങ്ങളും സംഘടിപ്പിക്കപ്പെടും. ഈ യോഗങ്ങളിലൂടെ ജനങ്ങളുമായി നേരിട്ട് സംവദിക്കുമെന്നും നേതാക്കൾ അറിയിച്ചു.
