കോഴിക്കോട്: നിയമസഭ തെരഞ്ഞെടുപ്പിനായി ആർ.ജെ.ഡി സ്ഥാനാർഥി പട്ടിക പ്രഖ്യാപിച്ചു. സംസ്ഥാന അധ്യക്ഷൻ എം.വി. ശ്രേയാംസ് കുമാർ മത്സരരംഗത്ത് നിന്ന് മാറിനിൽക്കുന്നതാണ് പട്ടികയിലെ പ്രധാന പ്രത്യേകത.
കൽപറ്റയിൽ പി.കെ. അനിൽകുമാറും വടകരയിൽ എം.കെ. ഭാസ്കരനും കൂത്തുപറമ്പിൽ പി.കെ. പ്രവീണുമാണ് ആർ.ജെ.ഡി സ്ഥാനാർഥികൾ. ശ്രേയാംസ് കുമാർ നേരത്തെ നാലുതവണ മത്സരിച്ച കൽപറ്റ മണ്ഡലത്തിലാണ് ഇക്കുറി അനിൽകുമാറിനെ രംഗത്തിറക്കിയത്.
വയനാട് ഡി.സി.സി സെക്രട്ടറിയായും ഐ.എൻ.ടി.യു.സി സംസ്ഥാന ജനറൽ സെക്രട്ടറിയായും പ്രവർത്തിച്ചിരുന്ന അനിൽകുമാർ അഞ്ചുവർഷം മുമ്പാണ് കോൺഗ്രസ് വിട്ട് ആർ.ജെ.ഡിയിൽ ചേർന്നത്. കൽപറ്റ മുൻ ബ്ലോക്ക് പഞ്ചായത്ത് പ്രസിഡന്റും ജില്ല പഞ്ചായത്ത് അംഗവുമായിരുന്ന അദ്ദേഹം മുതിർന്ന കോൺഗ്രസ് നേതാവ് പി.കെ. ഗോപാലന്റെ മകനുമാണ്.
മറ്റുള്ള നേതാക്കൾക്ക് അവസരം നൽകുന്നതിനായാണ് താൻ മത്സരരംഗത്ത് നിന്ന് മാറിനിൽക്കുന്നതെന്ന് ശ്രേയാംസ് കുമാർ വ്യക്തമാക്കി. കൽപറ്റയിൽ രണ്ട് തവണ വിജയിച്ച അനുഭവവുമുള്ള നേതാവാണ് അദ്ദേഹം.
കൂത്തുപറമ്പിൽ സ്ഥാനാർഥിയായ പി.കെ. പ്രവീൺ, എം.എൽ.എ കെ.പി. മോഹനന്റെ സഹോദരപുത്രനാണ്. കഴിഞ്ഞ തവണ പാനൂർ നഗരസഭ കൗൺസിലറായിരുന്ന അദ്ദേഹം നിലവിൽ കേരള ഓട്ടോമൊബൈൽ ലിമിറ്റഡ് ഡയറക്ടറാണ്. വടകരയിൽ മത്സരിക്കുന്ന എം.കെ. ഭാസ്കരൻ ആർ.ജെ.ഡി ജില്ലാ പ്രസിഡന്റാണ്.
