ലിഡാർ, നിർമ്മിതബുദ്ധി സാങ്കേതികവിദ്യകൾ ഉപയോഗിച്ച് നടത്തുന്ന അത്യാധുനിക സർവേയിലൂടെ റോഡ് ശൃംഖലയുടെ കാവൽ ഉറപ്പാക്കി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി.
ദുബായ്, യു.എ.ഇ.:ദുബായിലെ റോഡ് അടിസ്ഥാനസൗകര്യങ്ങളുടെ ഗുണനിലവാരം അളക്കുന്ന അസറ്റ് കണ്ടീഷൻ ഇൻഡെക്സിൽ (എ.സി.ഐ) 95 ശതമാനം നേട്ടത്തോടെ ആഗോളതലത്തിൽ മുൻനിരയിലെത്തി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർ.ടി.എ).
അടിസ്ഥാനസൗകര്യ വികസനത്തിലും പരിപാലനത്തിലും ആർ.ടി.എ നടപ്പിലാക്കുന്ന മുൻകരുതൽ പ്രവർത്തനങ്ങളുടെയും ഡിജിറ്റൽ സംവിധാനങ്ങളുടെയും കൃത്യതയാണ് ഈ വൻ നേട്ടത്തിന് പിന്നിൽ. നഗരത്തിന്റെ ഭാവി വികസന ലക്ഷ്യങ്ങൾക്ക് അനുയോജ്യമായ രീതിയിലാണ് റോഡ് ശൃംഖലയുടെ പ്രവർത്തനക്ഷമത അതോറിറ്റി വിലയിരുത്തുന്നത്.
റോഡുകളുടെ നിർമ്മാണ രീതി, അവയുടെ കാലപ്പഴക്കം, കേടുപാടുകൾ എന്നിവ കൃത്യമായി പരിശോധിച്ച് 0 മുതൽ 100 വരെയുള്ള സ്കോറിലേക്ക് മാറ്റുന്ന ശാസ്ത്രീയ രീതിയാണ് അസറ്റ് കണ്ടീഷൻ ഇൻഡെക്സ്. ഈ വിവരങ്ങൾ ഉപയോഗിച്ച് അറ്റകുറ്റപ്പണികൾ എപ്പോൾ വേണമെന്ന് കൃത്യമായി തീരുമാനിക്കാനും സാമ്പത്തിക നഷ്ടം ഒഴിവാക്കാനും അതോറിറ്റിക്ക് സാധിക്കുന്നു.
അഞ്ചു പ്രധാന മേഖലകളിലെ മികച്ച പ്രകടനമാണ് ആർ.ടി.എയെ ഈ നേട്ടത്തിന് അർഹമാക്കിയത്: റോഡ് ശൃംഖലയുടെ പൂർണ്ണമായ കവറേജ്, കൃത്യമായ ഡാറ്റ ശേഖരണം, ലിഡാർ (LiDAR), ആർട്ടിഫിഷ്യൽ ഇന്റലിജൻസ് സാങ്കേതികവിദ്യകളുടെ ഉപയോഗം, വാർഷിക പരിശോധനകൾ, ജിയോഗ്രാഫിക് ഇൻഫർമേഷൻ സിസ്റ്റവുമായുള്ള (GIS) സംയോജനം.
ഗതാഗത തടസ്സങ്ങളുണ്ടാക്കാതെ റോഡുകളുടെ നിലവാരം പരിശോധിക്കാൻ പ്രത്യേക വാഹനങ്ങളിൽ ഘടിപ്പിച്ച ലിഡാർ സാങ്കേതികവിദ്യയാണ് ആർ.ടി.എ ഉപയോഗിക്കുന്നത്. റോഡ് ഉപരിതലം, ട്രാഫിക് സിഗ്നലുകൾ, സൈൻ ബോർഡുകൾ, ലൈറ്റുകൾ, സുരക്ഷാ ബാരിയറുകൾ തുടങ്ങി 38-ലധികം ഘടകങ്ങൾ വാഹനം ഓടിച്ചിടുമ്പോൾ തന്നെ ഡിജിറ്റലായി സർവേ ചെയ്യാൻ ഈ സംവിധാനത്തിലൂടെ സാധിക്കും.
പരമ്പരാഗത പരിശോധനാ രീതികളേക്കാൾ 95 ശതമാനം വരെ കൃത്യത നൽകുന്നതാണ് ഈ ഡിജിറ്റൽ സംവിധാനം. ഹൈവേകളിൽ ജീവനക്കാരുടെ സുരക്ഷ ഉറപ്പാക്കാനും വേഗത്തിൽ വിവര ശേഖരണം നടത്താനും ഇതിലൂടെ സാധിക്കുന്നുണ്ട്.
അമേരിക്കയിലെ വിവിധ സ്റ്റേറ്റുകൾ, സിംഗപ്പൂർ, ജപ്പാൻ, ചൈന, ഓസ്ട്രേലിയ, ഫ്രാൻസ്, സ്വീഡൻ എന്നീ രാജ്യങ്ങളിലെ മികച്ച ഗതാഗത മാതൃകകൾ വിലയിരുത്തിയാണ് ആർ.ടി.എ ഈ സംവിധാനം വികസിപ്പിച്ചെടുത്തത്. ശേഖരിക്കുന്ന ഡാറ്റ ജിയോഗ്രാഫിക് ഇൻഫർമേഷൻ സിസ്റ്റവുമായി ബന്ധിപ്പിക്കുന്നതിലൂടെ വലിയ കേടുപാടുകൾ ഉണ്ടാകുന്നതിന് മുൻപ് തന്നെ റോഡുകൾ പുനരുദ്ധരിക്കാൻ സാധിക്കുന്നു.
