അന്താരാഷ്ട്ര ട്രാവൽ എക്സിബിഷൻ സെപ്റ്റംബർ 8 മുതൽ 10 വരെ റിയാദ് ഫ്രണ്ടിൽ; 6,500-ലധികം സന്ദർശകരെയും 150 ആഗോള ബയർമാരെയും പ്രതീക്ഷിക്കുന്നു
റിയാദ് — സെപ്റ്റംബർ 2, 2026 : ആഗോള യാത്രാ-വിനോദസഞ്ചാര മേഖലയിലെ പ്രമുഖ വാണിജ്യ കൂട്ടായ്മയായ ‘വേൾഡ് ട്രാവൽ മാർക്കറ്റ് (ഡബ്ല്യുടിഎം) സ്പോട്ട്‌ലൈറ്റ് റിയാദിന്റെ’ പ്രഥമ പതിപ്പിൽ സൗദി ടൂറിസം മന്ത്രാലയം തന്ത്രപ്രധാന പങ്കാളിയാകും. സെപ്റ്റംബർ 8 മുതൽ 10 വരെ റിയാദ് ഫ്രണ്ട് എക്സിബിഷൻ ആൻഡ് കൺവെൻഷൻ സെന്ററിലാണ് പ്രദർശനം നടക്കുന്നത്.
ആർഎക്സ് ഗ്ലോബൽ സംഘടിപ്പിക്കുന്ന ഈ ത്രിദിന ബിസിനസ് മേളയിൽ ലോകമെമ്പാടുമുള്ള 6,500-ലധികം വ്യാപാര പ്രതിനിധികളും തിരഞ്ഞെടുത്ത 150 രാജ്യാന്തര ബയർമാരും പങ്കെടുക്കും. ഏവിയേഷൻ, ആതിഥേയത്വം, ട്രാവൽ ടെക്നോളജി, ടൂർ ഓപ്പറേറ്റർമാർ എന്നിവരുൾപ്പെടെയുള്ള മേഖലകളിലെ പ്രമുഖ നിക്ഷേപകരും ഭരണാധികാരികളും ഒരുമിക്കുന്ന വേദിയാകും ഇത്.
വിഷൻ 2030-ന്റെ ഭാഗമായി വിനോദസഞ്ചാര മേഖലയെ സമ്പദ്‌വ്യവസ്ഥയുടെ പ്രധാന വരുമാന സ്രോതസ്സാക്കി മാറ്റുന്ന സൗദി അറേബ്യയുടെ വികസന ലക്ഷ്യങ്ങൾക്ക് കരുത്തുപകരാൻ ഈ പങ്കാളിത്തം വഴിയൊരുക്കുമെന്ന് അധികൃതർ വ്യക്തമാക്കി. മൊത്ത ആഭ്യന്തര ഉൽപ്പാദനത്തിന്റെ (ജിഡിപി) 10 ശതമാനം ടൂറിസത്തിൽ നിന്ന് ലഭ്യമാക്കുക, പ്രതിവർഷം 15 കോടി (150 ദശലക്ഷം) ആഭ്യന്തര-വിദേശ സന്ദർശകരെ സ്വീകരിക്കുക എന്നിവയാണ് രാജ്യം മുന്നോട്ടുവെക്കുന്ന പ്രധാന ലക്ഷ്യങ്ങൾ.
സൗദി വിപണിയെ രാജ്യാന്തര തലത്തിൽ കൂടുതൽ ഉയർത്തിക്കാട്ടാനും ആഗോള നിക്ഷേപങ്ങളെ രാജ്യത്തേക്ക് ആകർഷിക്കാനും ഈ വേദി സഹായിക്കുമെന്ന് ആർഎക്സ് റീജിയണൽ പോർട്ട്‌ഫോളിയോ ഡയറക്ടർ ഡാനിയൽ കർട്ടിസ് ചൂണ്ടിക്കാട്ടി.
ലണ്ടനിലെ ഡബ്ല്യുടിഎം, ദുബായിലെ അറേബ്യൻ ട്രാവൽ മാർക്കറ്റ് (എടിഎം) എന്നിവയ്ക്ക് സമാനമായ ആഗോള വിപണി സാധ്യതകൾ സൗദി തലസ്ഥാനത്തും യാഥാർഥ്യമാക്കുകയാണ് ഇതിലൂടെ ലക്ഷ്യമിടുന്നത്.
