ഒമ്പതാമത് ഷാർജ ഇൻവെസ്റ്റ്‌മെന്റ് ഫോറത്തിൽ വെബ്‌പോർട്ടലുകളായ ബയൂത്ത്, പ്രോപ്പർട്ടി ഫൈൻഡർ, ടൗൺ പ്ലാനിംഗ് വകുപ്പ് എന്നിവരുമായി സഹകരിച്ച് പ്രവർത്തിക്കുന്ന പുതിയ സംരംഭം പ്രഖ്യാപിച്ചു.
ഷാർജ, ഒക്ടോബർ 14, 2026 : ഷാർജയിൽ വ്യവസായ, വാണിജ്യ സംരംഭങ്ങൾ ആരംഭിക്കാൻ ആഗ്രഹിക്കുന്ന നിക്ഷേപകർക്കായി ആർട്ടിഫിഷ്യൽ ഇന്റലിജൻസ് അധിഷ്ഠിത പ്ലാറ്റ്‌ഫോമായ ‘നജ്‌ം’ (Najm) ഷാർജ എഫ്.ഡി.ഐ ഓഫീസ് (ഇൻവെസ്റ്റ് ഇൻ ഷാർജ) പുറത്തിറക്കി.
ജവാഹർ റിസപ്ഷൻ ആൻഡ് കൺവെൻഷൻ സെന്ററിൽ ആരംഭിച്ച ഒമ്പതാമത് ഷാർജ ഇൻവെസ്റ്റ്‌മെന്റ് ഫോറത്തിന്റെ ഉദ്ഘാടന വേദിയിലാണ് അത്യാധുനിക എഐ ഏജന്റ് അനാവരണം ചെയ്തത്. ഷാർജ ഡെപ്യൂട്ടി റൂളർ ഷെയ്ഖ് അബ്ദുള്ള ബിൻ സലിം ബിൻ സുൽത്താൻ അൽ ഖാസിമി, ഷാർജ ഇൻവെസ്റ്റ്‌മെന്റ് ആൻഡ് ഡെവലപ്‌മെന്റ് അതോറിറ്റി (ഷുറൂഖ്) ചെയർപേഴ്‌സൺ ഷെയ്ഖാ ബുദൂർ ബിന്ത് സുൽത്താൻ അൽ ഖാസിമി എന്നിവരുടെ സാന്നിധ്യത്തിലായിരുന്നു പ്രഖ്യാപനം.
നിക്ഷേപകർ നേരിടുന്ന പ്രധാന വെല്ലുവിളിയായ കൃത്യമായ വിവരശേഖരണത്തിന് ശാശ്വത പരിഹാരം കാണുകയാണ് നജ്‌മിലൂടെ ലക്ഷ്യമിടുന്നത്. പദ്ധതിയുടെ വ്യാപ്തി, നിക്ഷേപ തുക, ആവശ്യമായ സ്ഥലപരിമിതി എന്നിവ ചാറ്റ്ബോക്സിൽ രേഖപ്പെടുത്തിയാൽ നിമിഷങ്ങൾക്കകം അനുയോജ്യമായ ഭൂമിയും ഫാക്ടറികളും ലൈസൻസിങ് നിർദേശങ്ങളും ലഭ്യമാകും.
ശരിയായ സമയത്ത് നിക്ഷേപകന് കൃത്യമായ മാർഗനിർദേശം ഉറപ്പാക്കുകയാണ് തങ്ങളുടെ ലക്ഷ്യമെന്ന് ഇൻവെസ്റ്റ് ഇൻ ഷാർജ സിഇഒ മുഹമ്മദ് ജുമ അൽ മുഷറഖ് വ്യക്തമാക്കി. യുറോപ്യൻ കമ്പനിക്ക് 15 കോടി ദിർഹം (150 ദശലക്ഷം ദിർഹം) ചെലവിൽ 50,000 ചതുരശ്രയടി വിസ്തീർണമുള്ള ഫാക്ടറി സ്ഥാപിക്കാനുള്ള ക്രമീകരണങ്ങൾ നജ്‌മിലൂടെ ലൈവായി പ്രദർശിപ്പിച്ചാണ് അദ്ദേഹം ഇതിന്റെ പ്രവർത്തനക്ഷമത വിശദീകരിച്ചത്.
വിശ്വാസയോഗ്യമായ വിവരങ്ങൾ തത്സമയം നൽകാനായി മൂന്ന് പ്രധാന കരാറുകളിലും ഇൻവെസ്റ്റ് ഇൻ ഷാർജ ഒപ്പുവെച്ചു. ഷാർജ ടൗൺ പ്ലാനിംഗ് ആൻഡ് സർവേ ഡിപ്പാർട്ട്‌മെന്റ്, പ്രമുഖ റിയൽ എസ്റ്റേറ്റ് പോർട്ടലുകളായ പ്രോപ്പർട്ടി ഫൈൻഡർ, ബയൂത്ത് എന്നിവരുമായാണ് ധാരണാപത്രം ഒപ്പുവെച്ചത്. പ്രോപ്പർട്ടി പോർട്ടലുകളിലെ ഔദ്യോഗിക ലിസ്റ്റിംഗുകൾ എപിഐ (API) സാങ്കേതികവിദ്യ വഴി നജ്‌മുമായി നേരിട്ട് ബന്ധിപ്പിക്കും.
ആദ്യഘട്ടത്തിൽ വ്യാവസായിക ഭൂമി, വെയർഹൗസുകൾ, ഫാക്ടറികൾ എന്നിവ കണ്ടെത്താനാണ് മുൻഗണന നൽകുന്നത്. രണ്ടാം ഘട്ടത്തിൽ വിദ്യാഭ്യാസം, ആരോഗ്യം, സ്വകാര്യ ആശുപത്രികൾ, ക്ലിനിക്കുകൾ, സാങ്കേതിക സ്ഥാപനങ്ങൾ തുടങ്ങിയ മേഖലകളിലേക്കും നജ്‌മിന്റെ സേവനം വ്യാപിപ്പിക്കുമെന്ന് അധികൃതർ അറിയിച്ചു.
