‘കഥകളാൽ നിർമ്മിതം’ എന്ന പ്രമേയത്തിൽ 45-ാമത് പതിപ്പ് എക്സ്പോ സെന്ററിൽ; 1,500 സാംസ്കാരിക പരിപാടികളുമായി അക്ഷരോത്സവം.
ഷാർജ, ഒക്ടോബർ 13, 2026 : ലോകത്തെ ഏറ്റവും വലിയ പുസ്തകമേളകളിലൊന്നായ ഷാർജ രാജ്യാന്തര പുസ്തകോത്സവത്തിന്റെ (SIBF 2026) 45-ാമത് പതിപ്പ് നവംബർ 4 മുതൽ 15 വരെ ഷാർജ എക്സ്പോ സെന്ററിൽ അരങ്ങേറും. 124 രാജ്യങ്ങളിൽ നിന്നായി 2,673 പ്രസാധകരും വിതരണക്കാരും അണിനിരക്കുന്ന മേളയിൽ 1,500 സാംസ്കാരിക പരിപാടികൾ സംഘടിപ്പിക്കും.
‘മേഡ് ഓഫ് സ്റ്റോറീസ്’ (Made of Stories – കഥകളാൽ നിർമ്മിതം) എന്ന പ്രമേയത്തിലാണ് ഇത്തവണത്തെ പുസ്തകോത്സവം അരങ്ങേറുന്നതെന്ന് ഷാർജ ബുക്ക് അതോറിറ്റി (SBA) ആസ്ഥാനത്ത് ചേർന്ന വാർത്താസമ്മേളനത്തിൽ അധികൃതർ വ്യക്തമാക്കി. 25 രാജ്യങ്ങളിൽ നിന്നുള്ള 106 പ്രമുഖ എഴുത്തുകാരും ചിന്തകരും കലാകാരന്മാരും മേളയുടെ ഭാഗമാകും.
അറബ് ലോകത്തുനിന്നുള്ള 1,151 പ്രസാധകരും 1,122 അന്താരാഷ്ട്ര പ്രസാധകരുമാണ് മേളയിലെത്തുന്നത്. വായനയും പുസ്തകങ്ങളും വഴി മനുഷ്യവികസനവും സംസ്കാരങ്ങളുടെ കൂടിച്ചേരലും സാധ്യമാക്കുക എന്ന ഷാർജ ഭരണാധികാരിയും സുപ്രീം കൗൺസിൽ അംഗവുമായ ഡോ. ശൈഖ് സുൽത്താൻ ബിൻ മുഹമ്മദ് അൽ ഖാസിമിയുടെ സാംസ്കാരിക വീക്ഷണമാണ് മേളയെ നയിക്കുന്നതെന്ന് ഷാർജ ബുക്ക് അതോറിറ്റി സിഇഒ അഹമ്മദ് ബിൻ റക്കാദ് അൽ അമേരി പറഞ്ഞു. ഷാർജ ബുക്ക് അതോറിറ്റി ചെയർപേഴ്‌സൺ ശൈഖ ബുദൂർ ബിന്ത് സുൽത്താൻ അൽ ഖാസിമിയുടെ മേൽനോട്ടത്തിൽ ആഗോള പ്രസാധന രംഗത്തിന്റെ തലസ്ഥാനമായി ഷാർജ മാറിയെന്നും അദ്ദേഹം വ്യക്തമാക്കി.
ഇത്തവണത്തെ ‘ഗസ്റ്റ് ഓഫ് ഓണർ’ (Guest of Honour) പദവി ഒമാൻ സുൽത്താനേറ്റിനാണ്. 41 എഴുത്തുകാരും കവികളും ഉൾപ്പെടെ 50 അംഗ സാംസ്കാരിക പ്രതിനിധി സംഘമാണ് ഒമാനിൽ നിന്ന് എത്തുന്നത്. 15 സാംസ്കാരിക സെഷനുകളും 20 കലാപരിപാടികളും ഒമാൻ പവലിയനിൽ അരങ്ങേറുമെന്ന് ഒമാൻ സാംസ്കാരിക, കായിക, യുവജന മന്ത്രാലയ ഡയറക്ടർ അഹമ്മദ് ബിൻ സൗദ് അൽ റവാഹി അറിയിച്ചു. പ്രശസ്ത ഒമാനി എഴുത്തുകാരൻ സഹ്റാൻ അൽ ഖാസിമി, കവി ഹസ്സൻ അൽ മത്രൂഷി തുടങ്ങിയവർ പങ്കെടുക്കും.
രാജ്യാന്തര തലത്തിൽ ശ്രദ്ധേയരായ എഴുത്തുകാരും സാമൂഹിക പ്രവർത്തകരും ഇത്തവണ ഷാർജയിലെത്തും. ഇന്റർനാഷണൽ ബുക്കർ പുരസ്കാര ജേതാവായ പരിഭാഷക ഡെയ്‌സി റോക്ക്‌വെൽ, കേരള നിയമസഭയിലെ പ്രതിപക്ഷ നേതാവ് വി.ഡി. സതീശൻ, അമേരിക്കൻ-കനേഡിയൻ എഴുത്തുകാരൻ ജോൺ വെയ്‌ലന്റ്, നൈജീരിയൻ സാഹിത്യകാരി എൻനെഡി ഒകോറഫോർ, ബ്രിട്ടീഷ് ക്രൈം നോവലിസ്റ്റ് ക്ലെയർ മക്കിന്റോഷ്, ചൈനീസ് എഴുത്തുകാരൻ ലിയു ഷെൻയുൻ, ഫിലിപ്പിനോ ചരിത്രകാരൻ ആംബെത് ആർ. ഒകാംപോ തുടങ്ങിയവർ അതിഥികളായെത്തും. കൂടാതെ മൊറോക്കൻ ചിന്തകൻ ഡോ. സഈദ് യക്തീൻ, ലബനീസ് നാടകകൃത്ത് റഫീഖ് അലി അഹമ്മദ്, കുവൈത്തി നോവലിസ്റ്റ് സൗദ് അൽസനൂസി എന്നിവരും അറബ് സാഹിത്യ സംവാദങ്ങൾക്ക് നേതൃത്വം നൽകും.
പ്രസാധന രംഗത്തെ വാണിജ്യ സാധ്യതകളും പകർപ്പവകാശ വിനിമയങ്ങളും ചർച്ച ചെയ്യുന്ന രാജ്യാന്തര പബ്ലിഷേഴ്സ് കോൺഫറൻസ് നവംബർ 1 മുതൽ 3 വരെ നടക്കും. അങ്കോള, കംബോഡിയ, ബെലാറസ് ഉൾപ്പെടെ 9 രാജ്യങ്ങൾ ഇത്തവണ ആദ്യമായി പങ്കാളികളാകും. ആർട്ടിഫിഷ്യൽ ഇന്റലിജൻസ്, ഓഡിയോ പുസ്തകങ്ങൾ, ട്രാൻസ്‌ലേഷൻ ഗ്രാന്റുകൾ എന്നിവ കോൺഫറൻസിൽ ചർച്ചയാകും. ഒക്ടോബർ 31-ന് ന്യൂയോർക്ക് യൂണിവേഴ്സിറ്റിയുമായി സഹകരിച്ച് നടത്തുന്ന പബ്ലിഷേഴ്സ് ട്രെയിനിങ് പ്രോഗ്രാമിൽ 200-ലധികം പ്രസാധകർ പങ്കെടുക്കും.
നവംബർ 7 മുതൽ 10 വരെ കുറ്റാന്വേഷണ-ത്രില്ലർ സാഹിത്യകാരന്മാരുടെ കൂട്ടായ്മയായ ‘ത്രില്ലർ ഫെസ്റ്റ്’ നടക്കും. സന്ദർശകരുടെ അനുഭവങ്ങൾ തത്സമയം കവിതകളാക്കി മാറ്റുന്ന ‘പോയറ്റ്സ് കോർണർ’, കുട്ടികൾക്കായി തൊഴിൽ പരിചയം നൽകുന്ന ‘ഫ്യൂച്ചർ ഹാൻഡ്‌സ് ഡിസ്ട്രിക്റ്റ്’ എന്നിവയാണ് ഇത്തവണത്തെ പ്രധാന ആകർഷണങ്ങൾ. നവംബർ 7 മുതൽ 9 വരെ അമേരിക്കൻ ലൈബ്രറി അസോസിയേഷനുമായി സഹകരിച്ച് ലൈബ്രറി കോൺഫറൻസും സംഘടിപ്പിച്ചിട്ടുണ്ട്.
സന്ദർശകരുടെ തിരക്ക് കണക്കിലെടുത്ത് വിപുലമായ പാർക്കിങ്, ഗതാഗത സൗകര്യങ്ങളാണ് ഷാർജ റോഡ്സ് ആൻഡ് ട്രാൻസ്പോർട്ട് അതോറിറ്റിയുമായി സഹകരിച്ച് ഒരുക്കുന്നത്.
