പരമ്പരാഗത മലബാർ ലെയേർഡ് പൊറോട്ടയും പശ്ചിമേഷ്യൻ സുഗന്ധവ്യഞ്ജനക്കൂട്ടും സംയോജിപ്പിച്ച പുതിയ ഉൽപ്പന്നം വിപണിയിലെത്തി.
ദുബായ്, സെപ്റ്റംബർ 23 : ആഗോള സഅ്തർ ദിനത്തോടനുബന്ധിച്ച് പശ്ചിമേഷ്യൻ വിപണി ലക്ഷ്യമിട്ട് പുതിയ ‘സഅ്തർ പൊറോട്ട’ പുറത്തിറക്കി പ്രമുഖ റെഡി-ടു-കുക്ക് ബ്രാൻഡായ ഐഡി ഫ്രഷ് ഫുഡ് (iD Fresh Food).
പരമ്പരാഗത കേരളീയ ലെയേർഡ് പൊറോട്ടയിൽ അറബ് നാടുകളിലെ ജനപ്രിയ സുഗന്ധവ്യഞ്ജനക്കൂട്ടായ സഅ്തർ ചേർത്താണ് പുതിയ ഉൽപ്പന്നം തയ്യാറാക്കിയിരിക്കുന്നത്. അറബ് മേഖലയിലെ തനതു രുചിയായ കാട്ടുതുളസി (തൈം), എള്ള്, ഉണങ്ങിയ സുമക് എന്നിവ ചേർത്താണ് സഅ്തർ നിർമ്മിക്കുന്നത്. യുഎഇയിലെ വിവിധ സംസ്കാരങ്ങളിലുള്ള ഉപഭോക്താക്കളെ ഒരേപോലെ ആകർഷിക്കുന്ന തരത്തിലാണ് ഈ ഫ്യൂഷൻ വിഭവം രൂപകൽപ്പന ചെയ്തിരിക്കുന്നത്.
പ്രിസർവേറ്റീവുകൾ, കൃത്രിമ നിറങ്ങൾ, സ്വാദുകൾ, എമൽസിഫയറുകൾ എന്നിവ പൂർണ്ണമായും ഒഴിവാക്കുന്ന തങ്ങളുടെ ‘ക്ലീൻ-ലേബൽ’ നയം ഈ ഉൽപ്പന്നത്തിലും കർശനമായി പാലിച്ചിട്ടുണ്ടെന്ന് കമ്പനി വ്യക്തമാക്കി. ഹമ്മസ്, ലബ്ന എന്നിവക്കൊപ്പമോ പരമ്പരാഗത കറികൾക്കൊപ്പമോ കഴിക്കാൻ അനുയോജ്യമായ രീതിയിലാണ് ഇത് അവതരിപ്പിച്ചിട്ടുള്ളത്.
2013-ലാണ് ബംഗളൂരു ആസ്ഥാനമായി പ്രവർത്തിക്കുന്ന ഐഡി ഫ്രഷ് ഫുഡ് യുഎഇ വിപണിയിൽ പ്രവർത്തനം ആരംഭിക്കുന്നത്. ദോശ, ഇഡ്ഡലി മാവ് വിതരണത്തിലൂടെ ഗൾഫിലെ പ്രവാസി മലയാളികൾക്കിടയിൽ സ്വീകാര്യത നേടിയ കമ്പനി, പിന്നീട് വിവിധ ഉൽപ്പന്നങ്ങളുമായി ജിസിസി വിപണിയിൽ സാന്നിധ്യം വിപുലീകരിക്കുകയായിരുന്നു.
യുഎഇയിലെ തിരഞ്ഞെടുത്ത പ്രമുഖ ഹൈപ്പർമാർക്കറ്റുകളിലും നൂൺ (Noon) ഉൾപ്പെടെയുള്ള ഇ-കൊമേഴ്സ് പ്ലാറ്റ്ഫോമുകളിലും ഉൽപ്പന്നം ലഭ്യമാണ്.
2005-ൽ പി.സി. മുസ്തഫയും സഹോദരങ്ങളും ചേർന്ന് ബെംഗളൂരുവിൽ തുടക്കം കുറിച്ച ഐഡി ഫ്രഷ് ഫുഡ്, ഇന്ന് പ്രീംജിഇൻവെസ്റ്റ് ഉൾപ്പെടെയുള്ള ആഗോള നിക്ഷേപകരുടെ പിന്തുണയോടെ ഇന്ത്യ, യുഎഇ, അമേരിക്ക, യുകെ എന്നീ രാജ്യങ്ങളിൽ പ്രവർത്തിക്കുന്നു. ചപ്പാത്തി, പനീർ, ഫിൽട്ടർ കോഫി ഡികോക്ഷൻ, വിവിധയിനം പൊറോട്ടകൾ തുടങ്ങിയവയാണ് കമ്പനിയുടെ പ്രധാന ഉൽപ്പന്നങ്ങൾ.
