യുദ്ധത്തിന്റെ പേരിൽ യുഎസ് പ്രതിരോധ സെക്രട്ടറി പീറ്റ് ഹെഗ്സെത്തിനെതിരെ രാഷ്ട്രീയ നീക്കം ശക്തമാകുന്നതിനിടെയാണ് വാഷിങ്ടണിന്റെ പുതിയ താക്കീത്
വാഷിങ്ടൺ, യുണൈറ്റഡ് സ്റ്റേറ്റ്സ് — ഇറാന് നേരെ കൂടുതൽ ശക്തമായ സൈനിക നടപടികൾ ഉണ്ടായേക്കുമെന്ന മുന്നറിയിപ്പുമായി യുഎസ് പ്രസിഡന്റ് ഡൊണാൾഡ് ട്രംപ്. ഇറാന്റെ ബാക്കി ഭാഗങ്ങൾ നശിപ്പിക്കേണ്ടി വന്നേക്കാമെന്ന് പറഞ്ഞ ട്രംപ്, രാജ്യം കനത്ത തിരിച്ചടി നേരിടേണ്ടി വരുമെന്ന് വ്യക്തമാക്കിയെങ്കിലും ആക്രമണത്തിന്റെ കൂടുതൽ വിശദാംശങ്ങൾ വെളിപ്പെടുത്തിയില്ല.
ഇറാൻ യുദ്ധത്തിന്റെ പേരിൽ യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് ഇരുപക്ഷത്തുനിന്നും കടുത്ത രാഷ്ട്രീയ സമ്മർദ്ദം നേരിടുന്ന സാഹചര്യത്തിലാണ് ട്രംപിന്റെ പ്രതികരണം. ഹെഗ്സെത്തിനെതിരെ കോൺഗ്രസിൽ ഇംപീച്ച്മെന്റ് നടപടികൾക്ക് ഡെമോക്രാറ്റുകൾ നീക്കം നടത്തുമ്പോൾ, ഇടക്കാല തെരഞ്ഞെടുപ്പിലെ തിരിച്ചടിക്ക് കാരണം യുദ്ധമാണെന്ന വിമർശനവുമായി റിപ്പബ്ലിക്കൻമാരും രംഗത്തുണ്ട്. എന്നാൽ ഇംപീച്ച്മെന്റ് ഭീഷണികൾക്കിടയിലും ഹെഗ്സെത്തിനെ പിന്തുണച്ച ട്രംപ്, ഇറാനിലും വെനസ്വേലയിലും യുഎസ് നടത്തിയ സൈനിക നീക്കങ്ങളെ പ്രശംസിച്ചു.
മറുവശത്ത് മേഖലയിലെ സംഘർഷാവസ്ഥ ലഘൂകരിക്കുന്നതിനായുള്ള നയതന്ത്ര നീക്കങ്ങൾ ഇറാൻ ഊർജ്ജിതമാക്കിയിട്ടുണ്ട്. ഇറാൻ വിദേശകാര്യ മന്ത്രി അബ്ബാസ് അരഗ്ചി ഗൾഫ് രാജ്യങ്ങളിലെ വിദേശകാര്യ മന്ത്രിമാരുമായി സുരക്ഷാ സാഹചര്യങ്ങളും ചർച്ച ചെയ്തു. ഇറാന്റെ സുരക്ഷാ മേധാവിയുമായി റഷ്യൻ പ്രസിഡന്റ് വ്ളാദിമിർ പുടിൻ മോസ്കോയിൽ കൂടിക്കാഴ്ച നടത്തി.
അതേസമയം, സൗദി അറേബ്യയെ ലക്ഷ്യമിട്ട് ഹൂതികൾ നടത്തിയ ആക്രമണശ്രമം സൈന്യം പരാജയപ്പെടുത്തി. നജ്റാൻ, മദീന മേഖലകളെ ലക്ഷ്യമാക്കി വന്ന ബാലിസ്റ്റിക് മിസൈലും കിഴക്കൻ പ്രവിശ്യക്ക് മുകളിലൂടെയെത്തിയ ഡ്രോണും സൗദി വ്യോമപ്രതിരോധ സേന തകർത്തു.
