അൽ ഐൻ: ഈദുല് അദ്ഹ ആഘോഷങ്ങൾക്ക് മുന്നോടിയായി യുഎഇയിലെ വിവിധ നഗരങ്ങൾ ആഘോഷ അലങ്കാരങ്ങളാലും പ്രത്യേക സേവന സംവിധാനങ്ങളാലും നിറഞ്ഞു. റോഡുകളും പൊതു ഇടങ്ങളും ആയിരക്കണക്കിന് അലങ്കാര ലൈറ്റുകളാൽ മിനുങ്ങുമ്പോൾ, പൊതുജന സുരക്ഷയും ആരോഗ്യ മാനദണ്ഡങ്ങളും ഉറപ്പാക്കാൻ മുനിസിപ്പാലിറ്റികൾ വിപുലമായ ഒരുക്കങ്ങളാണ് പൂർത്തിയാക്കിയിരിക്കുന്നത്.
അൽ ഐൻ നഗരസഭ നഗരമൊട്ടാകെ ഈദ് അലങ്കാര പ്രവർത്തനങ്ങൾ പൂർത്തിയായതായി അറിയിച്ചു. പ്രധാന റോഡുകളിലും ജംഗ്ഷനുകളിലുമായി ഏകദേശം 98 കിലോമീറ്റർ ദൂരത്തിൽ 1,400ഓളം അലങ്കാര ലൈറ്റുകളാണ് സ്ഥാപിച്ചിരിക്കുന്നത്. ഈദ് ആശംസകൾ ഉൾക്കൊള്ളുന്ന ലൈറ്റിംഗ് ഡിസൈനുകൾ അൽ ഐന്റെ പ്രകൃതി സൗന്ദര്യത്തെ പ്രതിഫലിപ്പിക്കുന്ന തരത്തിലാണ് ഒരുക്കിയതെന്ന് പദ്ധതി മാനേജർ എൻജിനീയർ മൊസ അൽ മുഹൈരി വ്യക്തമാക്കി.
പരിസ്ഥിതി സൗഹൃദവും വൈദ്യുതി ലാഭവും ഉറപ്പാക്കുന്ന സാങ്കേതിക വിദ്യകൾ ഉപയോഗിച്ചാണ് ലൈറ്റുകൾ സ്ഥാപിച്ചിരിക്കുന്നത്. കണ്ണിന് സൗഹൃദപരമായ ശാന്ത നിറങ്ങൾ ഉപയോഗിച്ച് നഗരത്തിന് ആഘോഷഭാവം നൽകുകയാണ് ലക്ഷ്യമെന്നും അധികൃതർ അറിയിച്ചു.
അതേസമയം ദിബ്ബ അൽ ഹിസ്ന് മുനിസിപ്പാലിറ്റി ഈദിനോടനുബന്ധിച്ച് പ്രത്യേക പ്രവർത്തന പദ്ധതി നടപ്പാക്കിയതായി അറിയിച്ചു. നഗരത്തിലെ മാർക്കറ്റുകൾ, പൊതുസ്ഥലങ്ങൾ, അറവുശാലകൾ എന്നിവിടങ്ങളിൽ സുരക്ഷയും ശുചിത്വവും ഉറപ്പാക്കാൻ ശക്തമായ പരിശോധനകളാണ് നടക്കുന്നത്.
ഈദ് ഖുർബാനിക്കായി മുനിസിപ്പൽ അറവുശാലകളുടെ പ്രവർത്തന ശേഷി വർധിപ്പിച്ചിട്ടുണ്ടെന്നും എല്ലാ അറുക്കലുകളും വെറ്ററിനറി ഡോക്ടർമാരുടെ മേൽനോട്ടത്തിലും ആരോഗ്യ മാനദണ്ഡങ്ങൾ പാലിച്ചുമാത്രമേ അനുവദിക്കൂവെന്നും അധികൃതർ വ്യക്തമാക്കി. ലൈസൻസില്ലാത്ത കശാപ്പുകാരെ ആശ്രയിക്കരുതെന്ന് പൊതുജനങ്ങൾക്ക് മുന്നറിയിപ്പും നൽകി.
മാർക്കറ്റുകൾ, ഭക്ഷണശാലകൾ, ബാർബർ ഷോപ്പുകൾ, ബ്യൂട്ടി സലൂണുകൾ എന്നിവിടങ്ങളിൽ പരിശോധന സംഘങ്ങൾ നിരീക്ഷണം ശക്തമാക്കിയിട്ടുണ്ട്. കൂടാതെ ഈദ് കാലയളവിൽ അറവുശാലകളും പൊതുസ്ഥലങ്ങളും 24 മണിക്കൂറും ശുചീകരിക്കുകയും അണുനശീകരണം നടത്തുകയും ചെയ്യും.
ദിബ്ബ അൽ ഹിസ്നിലെ ഈദ് നമസ്കാര മൈതാനങ്ങളും പ്രത്യേകമായി സജ്ജമാക്കിയിട്ടുണ്ട്. നഗരത്തിലെ റോഡുകളിലും പൊതു സ്ക്വയറുകളിലും ആഘോഷ ലൈറ്റുകൾ സ്ഥാപിച്ച് സ്വദേശികൾക്കും സന്ദർശകർക്കും ആഘോഷാന്തരീക്ഷം ഒരുക്കിയിരിക്കുകയാണ്.
അജ്മാനിലും വലിയ രീതിയിലുള്ള ഈദ് അലങ്കാരങ്ങളാണ് ഒരുക്കിയിരിക്കുന്നത്. നഗരത്തിലെ റോഡുകൾ, പാർക്കുകൾ, പൊതുസ്ഥലങ്ങൾ എന്നിവിടങ്ങളിൽ ഏകദേശം 1,500ഓളം അലങ്കാര ലൈറ്റുകളും ഈദ് സന്ദേശ ബോർഡുകളും സ്ഥാപിച്ചു.
ഈദ് അവധിക്കാലത്ത് അജ്മാനിൽ പൊതുപാർക്കിങ് സൗജന്യമായിരിക്കുമെന്നും മേയ് 29 വരെ ഈ സൗകര്യം തുടരുമെന്നും അജ്മാൻ മുനിസിപ്പാലിറ്റിയും പ്ലാനിങ് വകുപ്പും അറിയിച്ചു. പാർക്കുകളും വിനോദകേന്ദ്രങ്ങളും അവധി ദിവസങ്ങളിൽ മുഴുവൻ സന്ദർശകർക്കായി തുറന്നിരിക്കുമെന്നും അധികൃതർ വ്യക്തമാക്കി.
