അബുദാബിയിൽ നടന്ന ‘എഐ എവരിതിങ്’ ഉച്ചകോടിയിലാണ് പ്രഖ്യാപനം; ആഭ്യന്തര സാങ്കേതികവിദ്യകൾ വികസിപ്പിക്കാനും ആഗോള വിപണിയിലെത്തിക്കാനും മൂന്ന് ഘട്ടങ്ങളിലായുള്ള പദ്ധതി.
അബുദാബി —നിർണായക ഡിജിറ്റൽ സംവിധാനങ്ങളുടെ സുരക്ഷ ഉറപ്പാക്കുന്നതിനും തദ്ദേശീയ സൈബർ സുരക്ഷാ സാങ്കേതികവിദ്യകൾ പ്രോത്സാഹിപ്പിക്കുന്നതിനുമായി യുഎഇ സൈബർ സെക്യൂരിറ്റി കൗൺസിൽ ഐടി സേവന ദാതാക്കളായ എസ്‌സിസി മിഡിൽ ഈസ്റ്റുമായി സഹകരിച്ച് പുതിയ ‘സെന്റർ ഓഫ് എക്സലൻസ്’ സ്ഥാപിക്കുന്നു.
അബുദാബിയിൽ നടന്ന ‘എഐ എവരിതിങ്’ ഉച്ചകോടിയിലാണ് പുതിയ സംരംഭം പ്രഖ്യാപിച്ചത്. സർക്കാർ സ്ഥാപനങ്ങൾ, സ്വകാര്യ സംരംഭങ്ങൾ, സാങ്കേതിക വിദഗ്ധർ എന്നിവർക്ക് കൃത്രിമബുദ്ധി (എഐ) ഉൾപ്പെടെയുള്ള നൂതന സാങ്കേതികവിദ്യകൾ പ്രായോഗികമായി പരീക്ഷിക്കാനും അവ സുരക്ഷിതമായി നടപ്പിലാക്കാനുമുള്ള വേദിയായാണ് ഈ മികവിന്റെ കേന്ദ്രം പ്രവർത്തിക്കുക.
മൂന്ന് ഘട്ടങ്ങളായാണ് പദ്ധതി നടപ്പിലാക്കുന്നത്. ദേശീയതലത്തിൽ വൈദഗ്ധ്യം വികസിപ്പിക്കുകയാണ് ആദ്യ ഘട്ടത്തിന്റെ ലക്ഷ്യം. എഐ, ക്ലൗഡ് കംപ്യൂട്ടിങ്, ഡാറ്റാ മാനേജ്‌മെന്റ്, നിർണായക അടിസ്ഥാന സൗകര്യങ്ങളുടെ സംരക്ഷണം എന്നിവയിൽ പ്രത്യേക പരിശീലനവും പ്രായോഗിക ലാബ് സൗകര്യങ്ങളും ഇവിടെ ഒരുക്കും. പരീക്ഷണാടിസ്ഥാനത്തിൽ പ്രവർത്തിക്കുന്ന ഡിജിറ്റൽ സംവിധാനങ്ങളെ പൂർണതോതിൽ സുരക്ഷിതമായി ഉപയോഗിക്കാൻ സ്ഥാപനങ്ങളെ പ്രാപ്തരാക്കുകയാണ് ഈ ഘട്ടത്തിൽ ചെയ്യുന്നത്.
യുഎഇയിൽ വികസിപ്പിച്ചെടുക്കുന്ന സുരക്ഷാ ഉൽപന്നങ്ങളെ പിന്തുണയ്ക്കുന്ന സ്റ്റാർട്ടപ്പ് ഇൻകുബേറ്ററാണ് രണ്ടാം ഘട്ടം. പ്രാദേശികമായി വികസിപ്പിക്കുന്ന സൈബർ സൊല്യൂഷനുകൾ യഥാർത്ഥ തൊഴിൽ സാഹചര്യങ്ങളിൽ പരീക്ഷിച്ച് അവയുടെ കാര്യക്ഷമതയും സുരക്ഷയും ഉറപ്പുവരുത്തും.
മൂന്നാം ഘട്ടത്തിൽ, ഈ സാങ്കേതികവിദ്യകളെ അന്താരാഷ്ട്ര വിപണിയുമായി ബന്ധിപ്പിക്കും. യുഎഇയിൽ രൂപകൽപ്പന ചെയ്ത ആധുനിക സൈബർ സുരക്ഷാ ഉൽപന്നങ്ങൾക്ക് ആഗോളതലത്തിൽ ഉപഭോക്താക്കളെയും നിക്ഷേപ സാധ്യതകളെയും കണ്ടെത്താൻ ഈ ഘട്ടം വഴിയൊരുക്കും.
നിർമ്മിത ബുദ്ധിയും സൈബർ സുരക്ഷയും മുൻനിർത്തി ശക്തമായൊരു ഡിജിറ്റൽ സമ്പദ്‌വ്യവസ്ഥ കെട്ടിപ്പടുക്കുകയെന്ന യുഎഇയുടെ കാഴ്ചപ്പാടിന് ഈ കേന്ദ്രം വലിയ കരുത്താകുമെന്ന് യുഎഇ ഗവൺമെന്റ് സൈബർ സെക്യൂരിറ്റി മേധാവി ഡോ. മുഹമ്മദ് അൽ കുവൈത്തി വ്യക്തമാക്കി. സാങ്കേതികവിദ്യകൾ വെറുതെ പ്രദർശിപ്പിക്കുന്നതിന് അപ്പുറം, യഥാർത്ഥ വെല്ലുവിളികൾക്ക് പരിഹാരം കാണുന്ന സുരക്ഷിത സംവിധാനങ്ങൾ വിന്യസിക്കുകയാണ് സംരംഭത്തിന്റെ പ്രധാന ലക്ഷ്യമെന്ന് എസ്‌സിസി മിഡിൽ ഈസ്റ്റ് ചീഫ് എക്സിക്യൂട്ടീവ് ഡാനിയൽ വാലെ പറഞ്ഞു.
