അമ്പതിനായിരത്തിലധികം മാധ്യമപ്രവർത്തകരും ഫോർച്യൂൺ 500 കമ്പനികളും യുഎഇ കേന്ദ്രമാക്കി പ്രവർത്തിക്കുന്നു.
ദുബായ്, ജൂലൈ 3, 2026: സിനിമാ നിർമാണം, ഡിജിറ്റൽ ഗെയിമിങ്, പബ്ലിഷിങ് എന്നീ മേഖലകളിൽ കൈവരിച്ച വൻ വളർച്ചയോടെ യുഎഇ ആഗോള മാധ്യമ-വിനോദ വ്യവസായത്തിന്റെ പ്രധാന കേന്ദ്രമായി മാറുന്നു. ഔദ്യോഗിക കണക്കുകൾ പ്രകാരം പതിനായിരത്തിലധികം മാധ്യമ കമ്പനികളും 55,000-ത്തിലധികം ക്രിയേറ്റീവ് പ്രൊഫഷണലുകളും നിലവിൽ യുഎഇയിൽ പ്രവർത്തിക്കുന്നുണ്ട്. ലോകപ്രശസ്തമായ ഫോർച്യൂൺ 500 മാധ്യമ കമ്പനികളിൽ 60 ശതമാനവും തങ്ങളുടെ പ്രാദേശിക ആസ്ഥാനമായി തെരഞ്ഞെടുത്തിരിക്കുന്നത് യുഎഇയെയാണ്.
വിജ്ഞാനാധിഷ്ഠിത സമ്പദ്വ്യവസ്ഥ ശക്തിപ്പെടുത്തുന്നതിന്റെ ഭാഗമായി മാധ്യമ-വിനോദ മേഖലകളിൽ വലിയ നിക്ഷേപങ്ങളാണ് യുഎഇ നടത്തിവരുന്നത്. അന്താരാഷ്ട്ര തലത്തിലുള്ള വൻകിട സിനിമാ ചിത്രീകരണങ്ങൾക്ക് വേദിയായതോടെ രാജ്യത്തെ ബോക്സ് ഓഫീസ് വരുമാനം 2025-ൽ 734 മില്യൺ ദിർഹമായി ഉയർന്നു.
ഇതോടൊപ്പം വലിയ വളർച്ച കൈവരിച്ച വീഡിയോ ഗെയിമിങ് മേഖലയുടെ മൂല്യം 2.7 ബില്യൺ ദിർഹത്തിലെത്തി. സാംസ്കാരിക-സാഹിത്യ മേഖലകളിലും രാജ്യം മികച്ച നേട്ടമാണ് കൊയ്തത്. ഏകദേശം 1.2 മില്യൺ പുതിയ പുസ്തകങ്ങളും പ്രസിദ്ധീകരണങ്ങളുമാണ് യുഎഇയിൽ നിന്ന് പുറത്തിറങ്ങിയത്.
മാധ്യമ മേഖലയെ കേവലം വിവരവിനിമയ ഉപാധിയായല്ല, മറിച്ച് രാജ്യത്തിന്റെ സോഫ്റ്റ് പവറും നിക്ഷേപ സാധ്യതകളും വർദ്ധിപ്പിക്കുന്ന സാമ്പത്തിക സ്രോതസ്സായാണ് യുഎഇ ഭരണകൂടം കാണുന്നത്. വ്യവസായ സൗഹൃദ അന്തരീക്ഷവും മികച്ച ഡിജിറ്റൽ ഇൻഫ്രാസ്ട്രക്ചറും വഴി ആഗോള തലത്തിലുള്ള പ്രതിഭകളെയും കമ്പനികളെയും ആകർഷിക്കാൻ രാജ്യത്തിന് സാധിക്കുന്നുണ്ട്. ഭാവി മുന്നിൽക്കണ്ടുകൊണ്ടുള്ള യുഎഇ നേതൃത്വത്തിന്റെ തന്ത്രപരമായ ദീർഘവീക്ഷണമാണ് ഈ നേട്ടങ്ങൾക്ക് പിന്നിലെന്ന് വിലയിരുത്തപ്പെടുന്നു.
