മെത്രാപ്പോലീത്തൻ പൗരോഹിത്യത്തിന്റെ ഇരുപതാം വാർഷിക വേളയിൽ കുര്യാക്കോസ് മോർ യൗസേബിയോസ് തിരുമേനിയെ ആദരിച്ചു
അബുദാബി — യുഎഇയിലെ യാക്കോബായ സുറിയാനി സഭയുടെ മേഖല വൈദിക യോഗം ഓഗസ്റ്റ് 24, 25 തീയതികളിൽ അബുദാബി സെന്റ് സ്റ്റീഫൻസ് യാക്കോബായ സുറിയാനി പള്ളിയിൽ നടന്നു. യുഎഇ മേഖല പാത്രിയാർക്കൽ വികാരി കുര്യാക്കോസ് മോർ യൗസേബിയോസ് മെത്രാപ്പോലീത്തയുടെ അധ്യക്ഷതയിലാണ് രണ്ടുദിവസം നീണ്ടുനിന്ന സമ്മേളനം സംഘടിപ്പിച്ചത്.
സമ്മേളനത്തിൽ യുഎഇയിലെ വിവിധ ഇടവകകളിൽ സേവനമനുഷ്ഠിക്കുന്ന വൈദികർ പങ്കെടുത്തു. മഹാപൗരോഹിത്യത്തിന്റെ ഇരുപതാം വാർഷികം ആഘോഷിച്ച കുര്യാക്കോസ് മോർ യൗസേബിയോസ് തിരുമേനിയെ ചടങ്ങിൽ പ്രത്യേക ഉപഹാരം നൽകി വൈദിക സമൂഹം ആദരിച്ചു.
നല്ല ശമര്യക്കാരന്റെ ഉപമയെ ആസ്പദമാക്കി, കഷ്ടപ്പാടുകൾ അനുഭവിക്കുന്നവരെ വഴിയരികിൽ നിന്ന് ശുശ്രൂഷാ കേന്ദ്രത്തിലേക്ക് കൈപിടിച്ചുയർത്തുന്ന പ്രയാണമാണ് ഒരു പുരോഹിതന്റെ ജീവിതമെന്ന് അധ്യക്ഷ പ്രസംഗത്തിൽ മോർ യൗസേബിയോസ് തിരുമേനി ഓർമ്മിപ്പിച്ചു.
ഷാർജ പള്ളി വികാരിയും സോണൽ വൈസ് പ്രസിഡന്റുമായ ഫാ. ബിനു അമ്പാട്ട്, ദുബായ് പള്ളി വികാരി ഫാ. ജോജോ സക്കറിയ, വൈദിക സംഘം വൈസ് പ്രസിഡന്റും അബുദാബി പള്ളി വികാരിയുമായ ഫാ. ജിജു എൻ. ജോൺ, അൽ ഐൻ പള്ളി വികാരി ഫാ. വിബിൻ കുരുമോളത്ത് എന്നിവർ സമ്മേളനത്തെ അഭിസംബോധന ചെയ്ത് സംസാരിച്ചു.
ഗൾഫ് മേഖലയിലെ യാക്കോബായ സുറിയാനി സഭാ വിശ്വാസികളുടെ ആത്മീയവും സാമൂഹികവുമായ പ്രവർത്തനങ്ങൾ ഏകോപിപ്പിക്കുന്നതിന്റെ ഭാഗമായാണ് മേഖല വൈദിക യോഗം ചേർന്നത്.
