ഓപ്പറേഷൻ ഷെവൽറസ് നൈറ്റ് 3-ന്റെ ഭാഗമായി 4,450 ടൺ ഭക്ഷ്യസാധനങ്ങൾ ആകാശ-സമുദ്ര പാതകളിലൂടെ ഗാസയിലെത്തിക്കും
ദുബായ് : യുദ്ധക്കെടുതി അനുഭവിക്കുന്ന ഗാസയിലെ ജനങ്ങൾക്ക് 10 ദശലക്ഷം ഭക്ഷണപ്പൊതികൾ എത്തിക്കാനുള്ള ‘അഹമ്മദ് ബിൻ റാഷിദ് ഹ്യുമാനിറ്റേറിയൻ ബ്രിഡ്ജ്’ എയർലിഫ്റ്റ് ദൗത്യത്തിന് ദുബായ് അൽ മക്തൂം അന്താരാഷ്ട്ര വിമാനത്താവളത്തിൽ നിന്ന് തുടക്കമായി.
മുഹമ്മദ് ബിൻ റാഷിദ് അൽ മക്തൂം ഗ്ലോബൽ ഇനിഷ്യേറ്റീവ്‌സും (MBRGI) യുഎഇയുടെ ദുരിതാശ്വാസ ദൗത്യമായ ‘ഓപ്പറേഷൻ ഷെവൽറസ് നൈറ്റ് 3’യും സംയുക്തമായാണ് രക്ഷാദൗത്യം ഏകോപിപ്പിക്കുന്നത്. ഗാസയിലെ രൂക്ഷമായ ഭക്ഷ്യക്ഷാമത്തിന് അടിയന്തര പരിഹാരം കാണുകയാണ് സംരംഭത്തിന്റെ ലക്ഷ്യം.
ദുബായ് വേൾഡ് ട്രേഡ് സെന്ററിൽ നടന്ന വിപുലമായ ജനകീയ കൂട്ടായ്മയിലാണ് 10 ദശലക്ഷം ഭക്ഷണപ്പൊതികൾ സജ്ജീകരിച്ചത്. ജീവകാരുണ്യ പ്രവർത്തനങ്ങളിലൂടെ ശ്രദ്ധേയനായ പരേതനായ ഷെയ്ഖ് അഹമ്മദ് ബിൻ റാഷിദ് അൽ മക്തൂമിന്റെ സ്മരണാർത്ഥമാണ് ഈ സഹായപദ്ധതി നടപ്പാക്കുന്നത്. കായികതാരങ്ങളും സന്നദ്ധപ്രവർത്തകരും ഉൾപ്പെടെ സമൂഹത്തിലെ വിവിധ തുറകളിലുള്ളവർ ദുരിതാശ്വാസ പാക്കിംഗിൽ പങ്കാളികളായി.
വ്യോമ, സമുദ്ര മാർഗ്ഗങ്ങളിലൂടെ ഏഴ് ഘട്ടങ്ങളായാണ് ഭക്ഷ്യവസ്തുക്കൾ ഗാസയിലേക്ക് അയക്കുന്നത്. 450 ടൺ ഭക്ഷ്യവസ്തുക്കൾ ആറ് കാർഗോ വിമാനങ്ങളിലായി അടിയന്തരമായി എത്തിക്കും. ഇതിനുപുറമെ 4,000 ടൺ അവശ്യസാധനങ്ങൾ വഹിച്ചുകൊണ്ടുള്ള കൂറ്റൻ ചരക്കുകപ്പൽ സമുദ്രപാതയിലൂടെയും പുറപ്പെടും. ആകെ 4,450 ടൺ ഭക്ഷ്യധാന്യങ്ങളാണ് ഈ ദൗത്യത്തിലൂടെ പലസ്തീൻ ജനതയ്ക്ക് ലഭിക്കുക.
യുഎഇ റിലീഫ് ഓപ്പറേഷൻസ് ഡയറക്ടർ ഹമ്മൂദ് അൽ അഫാരി വിമാനത്താവളത്തിലെ പ്രവർത്തനങ്ങൾക്ക് നേതൃത്വം നൽകി. ദുരിതബാധിത മേഖലകളിലേക്ക് വേഗത്തിലും സുരക്ഷിതമായും സഹായം എത്തിക്കുന്നതിൽ യുഎഇ സന്നദ്ധസംഘങ്ങൾ പൂർണ്ണ സജ്ജരാണെന്ന് അദ്ദേഹം വ്യക്തമാക്കി.
യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ നിർദേശപ്രകാരം 2023 നവംബറിലാണ് ‘ഓപ്പറേഷൻ ഷെവൽറസ് നൈറ്റ് 3’ ആരംഭിച്ചത്. ഇതുവരെ 400 കോടിയിലധികം അമേരിക്കൻ ഡോളറിന്റെ (ഏകദേശം 4 ബില്യൺ ഡോളർ) സഹായമാണ് യുഎഇ ഗാസയിലേക്ക് എത്തിച്ചത്. അന്താരാഷ്ട്ര തലത്തിൽ ഗാസയ്ക്ക് ലഭിച്ച ആകെ സഹായത്തിന്റെ 46 ശതമാനത്തോളം വരുമിത്. 796 വിമാനങ്ങൾ, 25 കപ്പലുകൾ, 14,483 ട്രക്കുകൾ എന്നിവ വഴി 1,30,708 ടൺ അവശ്യവസ്തുക്കൾ ഇതിനകം പലസ്തീനിലെത്തിച്ചു.
ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂം സ്ഥാപിച്ച MBRGI, 2025-ൽ മാത്രം 122 രാജ്യങ്ങളിലായി 16.5 കോടി ജനങ്ങളിലേക്ക് 230 കോടി ദിർഹത്തിന്റെ സഹായമെത്തിച്ചിരുന്നു. തുടർന്നുള്ള ദിവസങ്ങളിലും അൽ മക്തൂം വിമാനത്താവളത്തിൽ നിന്നുള്ള വ്യോമ സർവീസുകൾ തുടരും.
