അബൂദബി: റമദാൻ മാസത്തിലെ വെള്ളിയാഴ്ചകളിൽ രാജ്യത്തെ സ്കൂളുകളിൽ പഠനം ഓൺലൈനായി നടത്തുമെന്ന് UAE Ministry of Education അറിയിച്ചു. വിദ്യാർത്ഥികൾക്കും അധ്യാപകർക്കും സൗകര്യപ്രദമായ രീതിയിൽ റമദാനിലെ ആരാധനാ-കുടുംബ പ്രവർത്തനങ്ങൾക്ക് സമയം കണ്ടെത്താൻ ഈ ക്രമീകരണം സഹായകമാകുമെന്നാണ് വിലയിരുത്തൽ.
പുതിയ സംവിധാനപ്രകാരം റമദാൻ മാസത്തിലെ എല്ലാ വെള്ളിയാഴ്ചകളിലും ക്ലാസുകൾ ദൂരപഠന രീതിയിലായിരിക്കും. മറ്റു പ്രവൃത്തിദിവസങ്ങളിൽ സ്കൂൾ സമയം ചുരുക്കിയ സമയക്രമത്തിലായിരിക്കും തുടരുക.
വിദ്യാഭ്യാസ പ്രവർത്തനങ്ങളിൽ തടസമില്ലാതെ മതാചാരങ്ങൾ അനുഷ്ഠിക്കാൻ അവസരം ഒരുക്കുന്നതാണ് തീരുമാനത്തിന്റെ ലക്ഷ്യമെന്ന് മന്ത്രാലയം വ്യക്തമാക്കി. വിദ്യാർത്ഥികളുടെ ഹാജർ, അസൈൻമെന്റുകൾ, ഓൺലൈൻ പഠനക്രമം എന്നിവ സംബന്ധിച്ച വിശദമായ മാർഗനിർദേശങ്ങൾ സ്കൂളുകൾക്ക് കൈമാറിയിട്ടുണ്ട്.
സ്വകാര്യവും സർക്കാർ സ്കൂളുകളും മന്ത്രാലയത്തിന്റെ നിർദേശപ്രകാരം ഓൺലൈൻ പഠന സൗകര്യങ്ങൾ ഒരുക്കണം. സാങ്കേതിക സംവിധാനങ്ങൾ ഉറപ്പാക്കുകയും പഠന നിലവാരം നിലനിർത്തുകയും ചെയ്യണമെന്ന് അധികൃതർ നിർദേശിച്ചു.
റമദാൻ മാസത്തിൽ പൊതുവെ സ്കൂൾ സമയക്രമത്തിൽ ഇളവുകൾ അനുവദിക്കുന്ന പതിവിന്റെ ഭാഗമായാണ് പുതിയ തീരുമാനവും.
