ദുബായ്: വേനൽ അവധിക്കാലത്ത് യുഎഇയിലേക്ക് യാത്ര ചെയ്യുന്നവർ ലഗേജ് പാക്ക് ചെയ്യുന്നതിന് മുമ്പ് കസ്റ്റംസ് നിയമങ്ങൾ അറിഞ്ഞിരിക്കണം. ചില വസ്തുക്കൾക്ക് പൂർണ വിലക്കുള്ളതിനാൽ, നിയമം ലംഘിച്ചാൽ പിഴയും മറ്റ് നിയമനടപടികളും നേരിടേണ്ടി വരാം.
വ്യക്തിഗത ഉപയോഗത്തിനുള്ള സാധനങ്ങൾ യാത്രക്കാർക്ക് കൊണ്ടുവരാം. എന്നാൽ, യുഎഇ നിയമപ്രകാരം നിരോധിച്ചിരിക്കുന്ന വസ്തുക്കൾ ലഗേജിൽ ഉൾപ്പെടുത്താൻ പാടില്ല.
മയക്കുമരുന്നുകളും സൈക്കോട്രോപിക് മരുന്നുകളും, വ്യാജ കറൻസികൾ, അശ്ലീല ഉള്ളടക്കങ്ങൾ, ചൂതാട്ടവുമായി ബന്ധപ്പെട്ട വസ്തുക്കൾ, അനുമതിയില്ലാത്ത ആയുധങ്ങൾ, സ്ഫോടക വസ്തുക്കൾ, അപകടകാരിയായ രാസവസ്തുക്കൾ എന്നിവ യുഎഇയിലേക്ക് കൊണ്ടുവരാൻ പാടില്ല. ഇവ ലഗേജിൽ കണ്ടെത്തിയാൽ, കർശന നിയമനടപടികൾ നേരിടേണ്ടി വരും.
ചില മരുന്നുകൾക്കും പ്രത്യേക നിയന്ത്രണമുണ്ട്. ഡോക്ടറുടെ കുറിപ്പോ ആവശ്യമായ അനുമതിയോ ഇല്ലാതെ ചില മരുന്നുകൾ കൊണ്ടുവരുന്നത് നിയമപ്രശ്നങ്ങൾക്ക് ഇടയാക്കാം. അതിനാൽ, മരുന്നുകൾ കൈവശം വയ്ക്കുന്നവർ ആവശ്യമായ രേഖകൾ കരുതണം.
അതേസമയം, ഭക്ഷ്യവസ്തുക്കൾ, പുകയില ഉൽപ്പന്നങ്ങൾ, മദ്യം എന്നിവയ്ക്കും നിശ്ചിത പരിധികൾ ബാധകമാണ്. ഈ പരിധികൾ പാലിക്കാത്തവർക്കെതിരെ വിമാനത്താവള കസ്റ്റംസ് അധികൃതർ നടപടി സ്വീകരിക്കും.
യാത്രയ്ക്ക് മുമ്പ് യുഎഇയുടെ കസ്റ്റംസ് നിയമങ്ങൾ പരിശോധിച്ച് ലഗേജ് തയ്യാറാക്കുന്നത് അനാവശ്യ ബുദ്ധിമുട്ടുകൾ ഒഴിവാക്കാൻ സഹായിക്കും.
