ദുബായ് ∙ യുഎഇയിൽ ഈ ആഴ്ച കാലാവസ്ഥയിൽ വലിയ മാറ്റങ്ങൾ ഉണ്ടാകുമെന്ന് മുന്നറിയിപ്പ്. മഴ, മൂടൽമഞ്ഞ്, ശക്തമായ കാറ്റ് എന്നിവ അടുത്ത ദിവസങ്ങളിൽ രാജ്യത്തിന്റെ വിവിധ ഭാഗങ്ങളിൽ അനുഭവപ്പെടുമെന്നാണ് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചത്.
ഇന്ന് മുതൽ വെള്ളിയാഴ്ച വരെ ഭാഗികമായി മേഘാവൃതമായ ആകാശവും ഇടയ്ക്കിടെ മഴയും പ്രതീക്ഷിക്കുന്നു. തീരദേശ, കിഴക്കൻ, തെക്കൻ മേഖലകളിൽ നേരിയതോ മിതമായതോ ആയ മഴയ്ക്ക് സാധ്യതയുണ്ടെന്ന് അധികൃതർ അറിയിച്ചു.
രാത്രികാലങ്ങളിൽ ഈർപ്പം വർധിക്കുന്നതിനാൽ ചില പ്രദേശങ്ങളിൽ മൂടൽമഞ്ഞ് രൂപപ്പെടാൻ സാധ്യതയുണ്ട്. ഇത് ദൂരക്കാഴ്ച കുറയ്ക്കുന്നതിനാൽ ഡ്രൈവർമാർ പ്രത്യേക ജാഗ്രത പാലിക്കണമെന്ന് മുന്നറിയിപ്പ് നൽകിയിട്ടുണ്ട്.
ബുധനാഴ്ചയോടെ കാറ്റിന്റെ വേഗം വർധിക്കുമെന്നാണ് പ്രവചനം. പൊടിക്കാറ്റിനും ദൂരക്കാഴ്ച കുറയുന്നതിനും ഇത് കാരണമാകാം. കടൽ അതീവ പ്രക്ഷുബ്ധമാകാൻ സാധ്യതയുള്ളതിനാൽ മത്സ്യബന്ധനത്തിനും കടൽയാത്രകൾക്കും നിയന്ത്രണം ഏർപ്പെടുത്താൻ സാധ്യതയുണ്ട്.
വ്യാഴം, വെള്ളി ദിവസങ്ങളിൽ കാലാവസ്ഥ ഭാഗികമായി മേഘാവൃതമായിരിക്കുമെങ്കിലും ശക്തമായ കാറ്റ് തുടരുമെന്നാണ് മുന്നറിയിപ്പ്. ആഴ്ച അവസാനത്തോടെ താപനില ഉയരാനിടയുണ്ടെന്നും കാലാവസ്ഥാ വ്യതിയാനങ്ങൾ കണക്കിലെടുത്ത് പൊതുജനങ്ങൾ മുൻകരുതൽ സ്വീകരിക്കണമെന്നും അധികൃതർ നിർദേശിച്ചു.
English Summary : UAE to experience rain, fog, and strong winds throughout the week.
Authorities warn of low visibility, rough seas, and changing weather conditions.
