വാഷിങ്ടൺ: ലോകത്തിലെ ഏറ്റവും വലിയ വിമാനവാഹിനിക്കപ്പലായ യു.എസ്.എസ് ജെറാൾഡ് ആർ. ഫോർഡ് മിഡിൽ ഈസ്റ്റിൽ നിന്ന് മടങ്ങി. യു.എസ്–ഇറാൻ ബന്ധത്തിൽ അനിശ്ചിതത്വം തുടരുന്ന സാഹചര്യത്തിലാണ് കപ്പൽ തിരിച്ചുപോകുന്നത്. 309 ദിവസത്തിലേറെ നീണ്ട റെക്കോർഡ് വിന്യാസത്തിന് ശേഷമാണ് ഈ നിർണ്ണായക നീക്കം.
അമേരിക്കയും ഇറാനും തമ്മിലുള്ള ഔദ്യോഗിക ചർച്ചകൾ നിലച്ച സാഹചര്യത്തിൽ, പാകിസ്താൻ വഴി ഇറാൻ പുതിയ സമാധാന നിർദ്ദേശം യു.എസിന് കൈമാറിയതായാണ് റിപ്പോർട്ടുകൾ. മിഡിൽ ഈസ്റ്റ് മേഖലയിലെ സംഘർഷം കുറയ്ക്കുന്നതിനും സമാധാനം പുനഃസ്ഥാപിക്കുന്നതിനുമായി ഈ നീക്കം ലക്ഷ്യമിടുന്നതായി ഇറാനിയൻ മാധ്യമങ്ങൾ സൂചിപ്പിക്കുന്നു.
വിമാനവാഹിനിക്കപ്പൽ മടങ്ങിയെങ്കിലും മേഖലയിലെ അമേരിക്കൻ സാന്നിധ്യം ശക്തമായി തുടരുകയാണ്. യു.എസ്.എസ് എബ്രഹാം ലിങ്കൺ, യു.എസ്.എസ് ജോർജ്ജ് എച്ച്.ഡബ്ല്യു. ബുഷ് എന്നീ രണ്ട് വിമാനവാഹിനിക്കപ്പലുകളും 20-ഓളം യുദ്ധക്കപ്പലുകളും ഇപ്പോഴും മിഡിൽ ഈസ്റ്റ് മേഖലയിൽ വിന്യസിച്ചിരിക്കുകയാണ്.
പത്തുമാസത്തിലേറെയായി കടലിൽ തുടരുന്ന ജെറാൾഡ് ആർ. ഫോർഡ് കരീബിയൻ മേഖലയിലെ വിവിധ സൈനിക ദൗത്യങ്ങളിലും പങ്കെടുത്തിരുന്നു. ലഹരിക്കടത്തുമായി ബന്ധപ്പെട്ട ബോട്ടുകൾക്കെതിരെ നടപടി, ഉപരോധം ലംഘിച്ച ടാങ്കറുകൾ തടയൽ തുടങ്ങിയ പ്രവർത്തനങ്ങളിലും കപ്പൽ പങ്കാളിയായി.
വിന്യാസത്തിനിടെ കപ്പലിൽ ചില സാങ്കേതിക പ്രശ്നങ്ങളും രേഖപ്പെടുത്തി. മാർച്ച് 12-ന് കപ്പലിലെ അലക്കുമുറിയിൽ ഉണ്ടായ തീപിടുത്തത്തിൽ രണ്ട് നാവികർക്ക് പരിക്കേറ്റിരുന്നു. കൂടാതെ കപ്പലിലെ ടോയ്ലറ്റ് സംവിധാനത്തിൽ ഉണ്ടായ തകരാറുകൾ കാരണം നാവികർക്ക് ബുദ്ധിമുട്ടുകൾ നേരിട്ടതായും റിപ്പോർട്ടുകളുണ്ട്.
നിലവിൽ കപ്പൽ അമേരിക്കയിലെ വിർജീനിയയിലെ നോർഫോക്ക് നേവൽ സ്റ്റേഷനിലേക്ക് മടങ്ങുകയാണ്. മെയ് മധ്യത്തോടെ അവിടെ എത്തുന്ന കപ്പലിൽ വ്യാപകമായ അറ്റകുറ്റപ്പണികൾ നടത്താനാണ് തീരുമാനം. ദീർഘകാല വിന്യാസത്തെ തുടർന്ന് കപ്പലിന് സമഗ്രമായ പരിപാലനം ആവശ്യമായതായി യു.എസ് പ്രതിരോധ വൃത്തങ്ങൾ വ്യക്തമാക്കി.
