ദുബായ്: മിഡിൽ ഈസ്റ്റിലെ ഏറ്റവും സ്വാധീനശേഷിയുള്ള മാർക്കറ്റിംഗ് നേതാക്കളെ ഉൾപ്പെടുത്തി ഫോർബ്സ് മിഡിൽ ഈസ്റ്റ് പ്രസിദ്ധീകരിച്ച ‘Most Influential CMOs 2026’ പട്ടികയിൽ ഇടം നേടി മലയാളി മാർക്കറ്റിംഗ് പ്രൊഫഷണലായ വി. നന്ദകുമാർ. ലുലു ഗ്രൂപ്പിന്റെ മാർക്കറ്റിംഗ് ആൻഡ് കമ്മ്യൂണിക്കേഷൻസ് ഡയറക്ടറായ അദ്ദേഹം, മിഡിൽ ഈസ്റ്റിലെ പ്രമുഖ കോർപ്പറേറ്റ് സ്ഥാപനങ്ങളിലെ മാർക്കറ്റിംഗ് മേധാവികൾക്കൊപ്പം പട്ടികയിൽ ഇടം നേടിയാണ് ഈ നേട്ടം സ്വന്തമാക്കിയത്.
അഞ്ച് വർഷത്തിലൊരിക്കൽ പ്രസിദ്ധീകരിക്കുന്ന ഈ പ്രത്യേക പട്ടികയിൽ വിവിധ മേഖലകളിൽ പ്രവർത്തിക്കുന്ന 101 പ്രമുഖ മാർക്കറ്റിംഗ് പ്രൊഫഷണലുകളെയാണ് ഫോർബ്സ് മിഡിൽ ഈസ്റ്റ് തെരഞ്ഞെടുത്തത്. ADNOC, e&, Dubai Holding, Abu Dhabi Islamic Bank, Al-Futtaim Group, DIFC Dubai, Cleveland Clinic Abu Dhabi, Qatar Financial Centre, LuLu Group തുടങ്ങിയ മിഡിൽ ഈസ്റ്റിലെ വമ്പൻ സ്ഥാപനങ്ങളിലെ മാർക്കറ്റിംഗ് നേതാക്കളാണ് പട്ടികയിൽ ഉൾപ്പെട്ടിരിക്കുന്നത്.
തിരുവനന്തപുരം സ്വദേശിയായ വി. നന്ദകുമാറിന് ഇതാദ്യമായല്ല ഈ അംഗീകാരം ലഭിക്കുന്നത്. 2020-ൽ ഫോർബ്സ് മിഡിൽ ഈസ്റ്റ് പ്രസിദ്ധീകരിച്ച സമാന പട്ടികയിലും അദ്ദേഹം ഇടം നേടിയിരുന്നു. 2020-ലും 2026-ലും ഈ അംഗീകാരം നേടുന്ന ഏക മലയാളിയെന്ന പ്രത്യേകതയും അദ്ദേഹത്തിനുണ്ട്. രണ്ട് പതിപ്പുകളിലും ഇടംനേടിയതിലൂടെ മിഡിൽ ഈസ്റ്റിലെ മാർക്കറ്റിംഗ് രംഗത്തെ അദ്ദേഹത്തിന്റെ സ്ഥിരതയാർന്ന മികവും സ്വാധീനവും വീണ്ടും അടിവരയിടപ്പെടുകയാണ്.
മൂന്ന് പതിറ്റാണ്ടിലേറെ നീണ്ട മാധ്യമ, മാർക്കറ്റിംഗ്, കോർപ്പറേറ്റ് കമ്മ്യൂണിക്കേഷൻസ് രംഗത്തെ അനുഭവസമ്പത്തുള്ള നന്ദകുമാർ കഴിഞ്ഞ 26 വർഷമായി ലുലു ഗ്രൂപ്പിനൊപ്പമാണ് പ്രവർത്തിക്കുന്നത്. ലുലു ഗ്രൂപ്പ് ചെയർമാൻ എം.എ. യൂസഫലിയുടെ അടുത്ത സഹപ്രവർത്തകനായ അദ്ദേഹം, ഗ്രൂപ്പിന്റെ വളർച്ചയിലും ആഗോള ബ്രാൻഡ് വികസനത്തിലും നിർണായക പങ്കുവഹിച്ചിട്ടുണ്ട്.
മിഡിൽ ഈസ്റ്റിലും ഇന്ത്യയിലുമായി ലുലു ഗ്രൂപ്പ് നടപ്പാക്കിയ നിരവധി പ്രധാന പദ്ധതികൾ, പുതിയ സംരംഭങ്ങൾ, ബ്രാൻഡ് പ്രചാരണ കാമ്പെയ്നുകൾ, സാമൂഹിക പ്രതിബദ്ധതാ പദ്ധതികൾ, കോർപ്പറേറ്റ് സംരംഭങ്ങൾ എന്നിവയുടെ ആസൂത്രണത്തിലും നടപ്പാക്കലിലും വി. നന്ദകുമാർ സജീവ സാന്നിധ്യമായിരുന്നു. കേരളവുമായി ബന്ധപ്പെട്ട ലുലു ഗ്രൂപ്പിന്റെ വിവിധ പദ്ധതികളിലും അദ്ദേഹത്തിന്റെ പങ്കാളിത്തം ശ്രദ്ധേയമാണ്.
നിലവിൽ ലുലു ഗ്രൂപ്പിന്റെ ആഗോള മാർക്കറ്റിംഗ്, കമ്മ്യൂണിക്കേഷൻസ് പ്രവർത്തനങ്ങൾക്ക് നേതൃത്വം നൽകുന്ന അദ്ദേഹം, ബ്രാൻഡ് മാനേജ്മെന്റ്, ഡിജിറ്റൽ മാർക്കറ്റിംഗ്, ഇ-കൊമേഴ്സ്, കോർപ്പറേറ്റ് കമ്മ്യൂണിക്കേഷൻസ് എന്നീ മേഖലകളിൽ നൽകിയ സംഭാവനകളിലൂടെ ശ്രദ്ധേയനാണ്.
മിഡിൽ ഈസ്റ്റ് മേഖലയെ അടിസ്ഥാനമാക്കി തയ്യാറാക്കിയ പട്ടികയിൽ ഈജിപ്ത്, യുഎഇ, സൗദി അറേബ്യ എന്നീ രാജ്യങ്ങളിലെ മാർക്കറ്റിംഗ് മേധാവികളാണ് കൂടുതൽ ഇടം നേടിയത്. 21 ഈജിപ്ഷ്യൻ, 13 എമിറാത്തി, 12 സൗദി പ്രൊഫഷണലുകൾ പട്ടികയിൽ ഉൾപ്പെട്ടപ്പോൾ ഇന്ത്യക്കാരുടെ എണ്ണം താരതമ്യേന കുറവായിരുന്നു. അത്തരമൊരു പട്ടികയിൽ മലയാളിയായ വി. നന്ദകുമാർ ഇടം നേടിയിരിക്കുന്നത് പ്രവാസി മലയാളി സമൂഹത്തിനും കേരളത്തിനും അഭിമാനകരമായ നേട്ടമായാണ് വിലയിരുത്തപ്പെടുന്നത്.
