വിരുദുനഗർ: തമിഴ്നാട്ടിലെ വിരുദുനഗറിൽ പടക്ക നിർമ്മാണശാലയിൽ ഉണ്ടായ ശക്തമായ സ്ഫോടനത്തിൽ 19 തൊഴിലാളികൾ മരണപ്പെട്ടു. നിരവധി പേർക്ക് ഗുരുതരമായി പരിക്കേറ്റിട്ടുണ്ട്.
‘വനജ ഫയർ വർക്സ്’ എന്ന സ്ഥാപനത്തിൽ ശനിയാഴ്ച ഉണ്ടായ സ്ഫോടനം പ്രദേശത്തെ നടുക്കിയതാണ്. അപകടസമയത്ത് 50-ൽ അധികം തൊഴിലാളികൾ ഫാക്ടറിയിൽ ഉണ്ടായിരുന്നുവെന്നാണ് വിവരം. സ്ഫോടനത്തിന്റെ ആഘാതത്തിൽ ഫാക്ടറിയിലെ നാല് കെട്ടിടങ്ങൾ പൂർണ്ണമായും തകർന്നു.
ദൃക്സാക്ഷികളുടെ മൊഴിപ്രകാരം, പത്തു കിലോമീറ്റർ ദൂരത്തോളം പ്രകമ്പനം അനുഭവപ്പെട്ടത്ര ശക്തമായ സ്ഫോടനമാണ് ഉണ്ടായത്. പൊട്ടിത്തെറിയോടെ തീപിടിത്തവും വ്യാപക നാശനഷ്ടവും ഉണ്ടായി.
അഗ്നിശമന സേനയുടെ നേതൃത്വത്തിൽ അവശിഷ്ടങ്ങൾക്കിടയിൽ കുടുങ്ങിയവരെ കണ്ടെത്താനുള്ള തിരച്ചിൽ തുടരുകയാണ്. പരിക്കേറ്റവരിൽ ആറുപേരുടെ നില അതീവ ഗുരുതരമാണെന്നും ഇവരെ വിവിധ ആശുപത്രികളിൽ പ്രവേശിപ്പിച്ചതായും അധികൃതർ അറിയിച്ചു.
പ്രാഥമിക അന്വേഷണത്തിൽ, സുരക്ഷാ മാനദണ്ഡങ്ങൾ പാലിക്കാതെയാണ് ഫാക്ടറി പ്രവർത്തിച്ചിരുന്നതെന്ന സംശയം ഉയർന്നിട്ടുണ്ട്. ഇത് സംബന്ധിച്ച് വിശദമായ അന്വേഷണം ആരംഭിച്ചിട്ടുണ്ട്.
തമിഴ്നാട് മുഖ്യമന്ത്രി എം.കെ. സ്റ്റാലിൻ ദുരന്തത്തിൽ മരിച്ചവരുടെ കുടുംബങ്ങൾക്ക് അനുശോചനം രേഖപ്പെടുത്തി. പരിക്കേറ്റവർക്ക് മികച്ച ചികിത്സ ഉറപ്പാക്കുമെന്നും അധികൃതർ അറിയിച്ചു.
