അഹമ്മദാബാദ്: കഴിഞ്ഞ ജൂണിൽ അഹമ്മദാബാദിൽ തകർന്ന എയർഇന്ത്യയുടെ ബോയിങ് 787 ഡ്രീംലൈനർ വിമാനത്തിന് സർവീസിൽ ഉൾപ്പെടുത്തിയ സമയം മുതൽ തന്നെ വിവിധ സാങ്കേതിക തകരാറുകൾ ഉണ്ടായിരുന്നുവെന്ന് യുഎസ് ആസ്ഥാനമായുള്ള ഫൗണ്ടേഷൻ ഫോർ ഏവിയേഷൻ സേഫ്റ്റി (FOS) പുറത്തുവിട്ട റിപ്പോർട്ട്. എന്നാൽ, വിമാനത്തിന്റെ എൻജിനുകളിലേക്ക് ഇന്ധനം നൽകുന്ന ഫ്യുവൽ കൺട്രോൾ സ്വിച്ചുകൾ ഓഫായതാണ് അപകടത്തിന് കാരണമെന്നാണ് ഇന്ത്യയിലെ എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ (AAIB) പുറത്തിറക്കിയ പ്രാഥമിക റിപ്പോർട്ടിൽ വ്യക്തമാക്കിയിരുന്നത്.ബോയിങ് 787 ഡ്രീംലൈനർ വിമാനം തകർന്നുണ്ടായ അപകടത്തിൽ 260 പേരാണ് മരിച്ചത്. ഇത് ഇന്ത്യയിലെ ഏറ്റവും വലിയ വ്യോമയാന ദുരന്തങ്ങളിലൊന്നായി മാറിയിരുന്നു.അമേരിക്ക, കാനഡ, ഓസ്ട്രേലിയ എന്നിവിടങ്ങളിലായി സർവീസ് നടത്തുന്ന 2000-ത്തിലധികം ബോയിങ് 787 വിമാനങ്ങളിൽ സാങ്കേതിക തകരാറുകൾ കണ്ടെത്തിയിട്ടുണ്ടെന്ന് FOS റിപ്പോർട്ട് അവകാശപ്പെടുന്നു. അപകടത്തിൽപ്പെട്ട ഡ്രീംലൈനർ 2013 അവസാനമാണ് ആദ്യമായി പറന്നത്. 2014 തുടക്കത്തിൽ എയർഇന്ത്യ ഈ വിമാനം സർവീസിൽ ഉൾപ്പെടുത്തിയതായും, ആദ്യദിവസം മുതൽ തന്നെ പ്രശ്നങ്ങൾ റിപ്പോർട്ട് ചെയ്തതായും റിപ്പോർട്ടിൽ പറയുന്നു.ഇലക്ട്രോണിക്സ്, സോഫ്റ്റ്വേർ തകരാറുകൾ, സർക്യൂട്ട് ബ്രേക്കറുകൾ ആവർത്തിച്ച് ട്രിപ്പ് ചെയ്യുന്നത്, വയറിങ് കേടുപാടുകൾ, പവർ സിസ്റ്റം ഘടകങ്ങൾ അമിതമായി ചൂടാകുന്നത് എന്നിവയാണ് പ്രധാന തകരാറുകളായി റിപ്പോർട്ടിൽ ചൂണ്ടിക്കാണിക്കുന്നത്.കൂടാതെ, 2022 ജനുവരിയിൽ ഉയർന്ന വോൾട്ടേജ് എൻജിൻ പവർ വിതരണം ചെയ്യുന്ന അഞ്ച് പാനലുകളിൽ ഒന്നായ P100 പവർ ഡിസ്ട്രിബ്യൂഷൻ പാനലിന് തീപിടിച്ച സംഭവവും റിപ്പോർട്ടിൽ പരാമർശിക്കുന്നു. ഇത് വിമാനത്തിന്റെ ഇലക്ട്രിക്കൽ സംവിധാനങ്ങളുമായി ബന്ധപ്പെട്ട ഗുരുതരമായ സുരക്ഷാ പ്രശ്നങ്ങളിലേക്കാണ് വിരൽ ചൂണ്ടുന്നതെന്ന് FOS വ്യക്തമാക്കുന്നു.അതേസമയം, AAIBയുടെ പ്രാഥമിക അന്വേഷണ റിപ്പോർട്ട് അപകടസമയത്ത് എൻജിൻ ഫ്യുവൽ സ്വിച്ചുകൾ പ്രവർത്തന നിലയിൽ നിന്ന് ഓഫായ നിലയിലേക്ക് മാറിയതിലാണ് കൂടുതൽ ശ്രദ്ധ കേന്ദ്രീകരിക്കുന്നത്. ഈ മാറ്റം എങ്ങനെ സംഭവിച്ചുവെന്നതും മനുഷ്യ പിഴവാണോ സാങ്കേതിക തകരാറാണോ എന്നതും വിശദമായ അന്വേഷണത്തിലൂടെ മാത്രമേ വ്യക്തമാകൂവെന്ന് അന്വേഷണ ഏജൻസികൾ അറിയിച്ചു.വിമാനാപകടവുമായി ബന്ധപ്പെട്ട അന്തിമ റിപ്പോർട്ട് പുറത്തുവരുന്നതുവരെ, ബോയിങ് 787 ഡ്രീംലൈനറുകളുടെ സുരക്ഷയും പരിപാലന നിലവാരവും സംബന്ധിച്ച ആശങ്കകൾ രാജ്യാന്തരതലത്തിൽ ശക്തമാകുന്ന സാഹചര്യമാണ് നിലവിലുള്ളത്.
