അബുദാബി: രാജ്യത്തിന്റെ പരമാധികാരത്തിനും ദേശീയ സുരക്ഷയ്ക്കും നേരെ ഇറാൻ വിദേശകാര്യ മന്ത്രാലയം നടത്തിയ പ്രസ്താവനകളെയും ഭീഷണികളെയും യുഎഇ ശക്തമായി അപലപിച്ചു. യുഎഇയുടെ സ്വതന്ത്രമായ തീരുമാനങ്ങളെയും ആഭ്യന്തര സുരക്ഷയെയും ചോദ്യം ചെയ്യുന്ന തരത്തിലുള്ള അവകാശവാദങ്ങൾ പൂർണ്ണമായും തള്ളിക്കളയുന്നതായി വിദേശകാര്യ മന്ത്രാലയം പ്രസ്താവനയിൽ വ്യക്തമാക്കി.
യുഎഇയുടെ രാജ്യാന്തര പ്രതിരോധ പങ്കാളിത്തങ്ങളും മറ്റ് രാജ്യങ്ങളുമായുള്ള ബന്ധങ്ങളും രാജ്യത്തിന്റെ പരമാധികാരത്തിൽപ്പെട്ട കാര്യമാണ്. ഇതിനെ മറ്റൊരു രാജ്യവും ഭീഷണിപ്പെടുത്താനുള്ള ഒഴികഴിവായി ഉപയോഗിക്കാൻ അവകാശമില്ല. ജനവാസ കേന്ദ്രങ്ങൾക്കോ ജനങ്ങൾക്കോ രാജ്യത്തിന്റെ സുരക്ഷയ്ക്കോ ഭീഷണിയാകുന്ന തരത്തിലുള്ള ഇറാന്റെ നിലപാടുകൾ ഒട്ടും അംഗീകരിക്കാനാവില്ലെന്നും വ്യക്തമാക്കി.
നല്ല അയൽപക്ക ബന്ധങ്ങൾക്കും രാജ്യാന്തര നിയമങ്ങൾക്കും ഐക്യരാഷ്ട്രസഭയുടെ ചട്ടങ്ങൾക്കും വിരുദ്ധമാണ് ഇത്തരം പെരുമാറ്റങ്ങൾ. ശത്രുതാപരമായ നീക്കങ്ങളിൽ നിന്ന് രാജ്യത്തെ സംരക്ഷിക്കാനും പരമാധികാരം നിലനിർത്താനുമുള്ള അവകാശം യുഎഇക്കുണ്ട്. സമ്മർദ്ദ തന്ത്രങ്ങളോ പക്ഷപാതപരമായ പ്രസ്താവനകളോ ഭീഷണികളോ തങ്ങളുടെ നിലപാടുകളിൽ നിന്ന് രാജ്യത്തെ പിന്നോട്ടടിപ്പിക്കില്ലെന്നും കൂട്ടിച്ചേർത്തു. യുഎസ്-ഇസ്രയേൽ-ഇറാൻ വെടിനിർത്തൽ നിലവിൽ വന്ന പശ്ചാത്തലത്തിലുള്ള മേഖലയിലെ പുതിയ സംഭവവികാസങ്ങളെ രാജ്യം സസൂക്ഷ്മം നിരീക്ഷിച്ചു വരികയാണ്.
