ദുബായ്: പ്രവാസത്തിന്റെ മണൽക്കാറ്റിലും മലയാളത്തിന്റെ കുളിർമ പടർത്തി അക്ഷരങ്ങളുടെയും ചിന്തകളുടെയും സൗന്ദര്യം പകർന്നുനൽകിയ പ്രിയ അധ്യാപകൻ മുരളി മംഗലത്തിന് ദുബായിൽ സാംസ്കാരിക ലോകം ഹൃദ്യമായ യാത്രയയപ്പ് നൽകി. ‘വാക്കിതൾ’ ഗ്രൂപ്പിന്റെ നേതൃത്വത്തിൽ ദുബായ് എം.എസ്.എസ് (MSS) ഹാളിൽ സംഘടിപ്പിച്ച ചടങ്ങ്, മുരളി മാസ്റ്ററുടെ 39 വർഷത്തെ സജീവ പ്രവാസ ജീവിതത്തിന്റെയും അധ്യാപന ജീവിതത്തിന്റെയും സ്മരണകൾ കൊണ്ട് സമ്പന്നമായിരുന്നു. സാംസ്കാരിക, മാധ്യമ, സാഹിത്യ രംഗത്തെ പ്രമുഖർ ഒത്തുചേർന്ന വേദിയിൽ പ്രവാസലോകത്തെ ഈ സാംസ്കാരിക മുഖത്തിന് ഊഷ്മളമായ യാത്രയയപ്പാണ് ലഭിച്ചത്.
കേവലം ക്ലാസ് മുറികളിലെ പാഠപുസ്തകങ്ങൾക്കപ്പുറം, ജീവിതം തന്നെ പാഠപുസ്തകമാക്കിയ അധ്യാപകനായിരുന്നു മുരളി മംഗലത്തെന്ന് ചടങ്ങിൽ പങ്കെടുത്തവർ അനുസ്മരിച്ചു. അജ്മാൻ അൽ അമീർ ഇംഗ്ലീഷ് സ്കൂളിലെയും ദുബായ് ന്യൂ ഇന്ത്യൻ മോഡൽ സ്കൂളിലെയും (NIMS) നൂറുകണക്കിന് വിദ്യാർത്ഥികൾക്ക് അദ്ദേഹം മലയാളത്തിന്റെ മാധുര്യം പകർന്നുനൽകി. ആയിരക്കണക്കിന് ശിഷ്യസമ്പത്തുള്ള അദ്ദേഹം, പ്രവാസ ലോകത്തെ ഒട്ടുമിക്ക സാഹിത്യ വേദികളിലും തന്റെ സജീവ സാന്നിധ്യം അറിയിച്ചിരുന്നു. അദ്ദേഹത്തിന്റെ സ്നേഹപൂർണ്ണമായ ഇടപെടലുകൾ ശിഷ്യർക്കും സുഹൃത്തുക്കൾക്കും എന്നും ഒരു താങ്ങായിരുന്നുവെന്ന് അനുഭവസ്ഥർ സാക്ഷ്യപ്പെടുത്തി.
മാധ്യമപ്രവർത്തകൻ സാദിഖ് കാവിൽ അധ്യക്ഷത വഹിച്ച ചടങ്ങിൽ പ്രവീൺ പാലക്കീൽ ഉദ്ഘാടനം നിർവ്വഹിച്ചു. സലീം അയ്യനത്ത് മുഖ്യപ്രഭാഷണം നടത്തി. തൃശ്ശൂർ വലപ്പാട് സ്വദേശിയായ മുരളി മാസ്റ്റർ എഴുത്തിലും പ്രസംഗത്തിലും ഒരുപോലെ മികവ് പുലർത്തിയ വ്യക്തിത്വമാണ്. ‘വാക്കിതൾ’ മുഖ്യകാര്യദർശി ബഷീർ തിക്കോടി ഉൾപ്പെടെയുള്ളവർ അദ്ദേഹത്തിന്റെ സാഹിത്യ സംഭാവനകളെ കുറിച്ച് സംസാരിച്ചു. പ്രവാസ സാഹിത്യവേദികളിൽ വേണ്ടത്ര പരിഗണിക്കപ്പെടാതെ പോയെങ്കിലും, സാധാരണക്കാരായ പ്രവാസികളുടെയും വിദ്യാർത്ഥികളുടെയും മനസ്സിൽ മുരളി മാസ്റ്റർക്ക് വലിയൊരു സ്ഥാനമുണ്ടെന്ന യാഥാർത്ഥ്യം ചടങ്ങിൽ ചർച്ചയായി.
ഭാഷാസ്നേഹവും സൗഹൃദവും ഒത്തുചേർന്ന വേദിയിൽ മുരളി മാസ്റ്റർ തന്റെ മറുപടി പ്രസംഗത്തിൽ പ്രവാസത്തോടും സഹപ്രവർത്തകരോടും നന്ദി രേഖപ്പെടുത്തി. അക്ഷരങ്ങളിലൂടെയും സ്നേഹത്തിലൂടെയും പണിതുയർത്തിയ ഈ ദീർഘകാല ബന്ധം സ്വദേശത്തേക്ക് മടങ്ങിയാലും തന്നോടൊപ്പം ഉണ്ടാകുമെന്ന് അദ്ദേഹം വികാരാധീനനായി പറഞ്ഞു. സക്കരിയ നരിക്കുനി സ്വാഗതവും നൗഷീർ നന്ദിയും പറഞ്ഞ ചടങ്ങ്, ദുബായിലെ മലയാളം മിഷൻ പ്രവർത്തകരുടെയും സാംസ്കാരിക പ്രവർത്തകരുടെയും സാന്നിധ്യം കൊണ്ട് ശ്രദ്ധേയമായി.
