അബുദാബി: യു.എ.ഇയിലെ ഇന്ത്യൻ പ്രവാസികൾക്കായി അബുദാബി ഇന്ത്യൻ എംബസി മേയ് 29ന് ഓപ്പൺ ഹൗസ് സംഘടിപ്പിക്കുന്നു. അബുദാബിയിലെ ഇന്ത്യൻ എംബസി ആസ്ഥാനത്ത് ഉച്ചയ്ക്ക് രണ്ട് മുതൽ നാല് മണിവരെയാണ് പരിപാടി നടക്കുക. പ്രവാസി ഇന്ത്യക്കാർ നേരിടുന്ന വിവിധ പ്രശ്നങ്ങളും നിർദേശങ്ങളും എംബസി ഉദ്യോഗസ്ഥരുമായി നേരിട്ട് പങ്കുവെക്കുന്നതിനുള്ള അവസരമായിരിക്കും ഓപ്പൺ ഹൗസ്.
അബുദാബി എമിറേറ്റുമായി ബന്ധപ്പെട്ട തൊഴിൽ പ്രശ്നങ്ങൾ, കോൺസുലർ സേവനങ്ങൾ, വിദ്യാഭ്യാസം, ക്ഷേമ പദ്ധതികൾ തുടങ്ങിയ വിഷയങ്ങളിലെ പരാതികളും നിർദേശങ്ങളും പരിപാടിക്കിടെ അവതരിപ്പിക്കാമെന്ന് എംബസി അധികൃതർ അറിയിച്ചു. പ്രവാസി സമൂഹത്തിന്റെ പ്രശ്നങ്ങൾ നേരിട്ട് കേട്ട് പരിഹാര മാർഗങ്ങൾ കണ്ടെത്തുന്നതിനുള്ള ഇടപെടലായാണ് ഈ പരിപാടിയെ വിലയിരുത്തുന്നത്.
അതേസമയം, പാസ്‌പോർട്ട് പുതുക്കൽ, സർട്ടിഫിക്കറ്റ് അറ്റസ്റ്റേഷൻ, മറ്റ് കോൺസുലർ സേവനങ്ങൾ എന്നിവ ഓപ്പൺ ഹൗസിനിടെ ലഭ്യമാകില്ലെന്നും അധികൃതർ വ്യക്തമാക്കി.
വെർച്വലായി പങ്കെടുക്കാൻ ആഗ്രഹിക്കുന്നവർ അവരുടെ പരാതികളുടെയോ നിർദേശങ്ങളുടെയോ ചുരുക്കം മേയ് 27 വൈകിട്ട് മൂന്ന് മണിക്കകം ca.abudhabi@mea.gov.in എന്ന ഇമെയിൽ വിലാസത്തിലേക്ക് അയയ്ക്കണമെന്ന് എംബസി അറിയിച്ചു.
പ്രവാസി ഇന്ത്യക്കാരുടെ പ്രശ്നങ്ങൾ കൂടുതൽ ഫലപ്രദമായി പരിഗണിക്കാനും സേവനങ്ങൾ മെച്ചപ്പെടുത്താനും എംബസി നടത്തുന്ന സ്ഥിരം ഇടപെടലുകളുടെ ഭാഗമായാണ് ഓപ്പൺ ഹൗസ് സംഘടിപ്പിക്കുന്നത്.
