കോഴിക്കോട്: സൗദി അറേബ്യയിലെ ജയിലിൽ ഇരുപത് വർഷത്തിലേറെയായി തടവിൽ കഴിഞ്ഞിരുന്ന മലയാളി അബ്ദുൽ റഹീം മോചിതനായി. മോചന ഉത്തരവിൽ സൗദി അധികൃതർ ഒപ്പുവച്ചതോടെയാണ് റഹീമിന്റെ മോചനത്തിന് വഴിയൊരുങ്ങിയത്. ഇമിഗ്രേഷൻ ഉൾപ്പെടെയുള്ള നടപടികൾ പൂർത്തിയാക്കിയ ശേഷം അദ്ദേഹം നാട്ടിലേക്ക് മടങ്ങുമെന്നാണ് വിവരം.
സൗദി പൗരന്റെ 15 വയസ്സുകാരനായ മകൻ മരിച്ച സംഭവവുമായി ബന്ധപ്പെട്ട കേസിലായിരുന്നു അബ്ദുൽ റഹീമിന് ശിക്ഷ ലഭിച്ചത്. തുടർന്ന് വർഷങ്ങളോളം ജയിലിൽ കഴിഞ്ഞ റഹീമിനെതിരേ വധശിക്ഷയും വിധിച്ചിരുന്നു. എന്നാൽ ദീർഘകാല നിയമപോരാട്ടങ്ങൾക്കും സാമൂഹിക ഇടപെടലുകൾക്കും ഒടുവിൽ കേസിൽ നിർണായക വഴിത്തിരിവ് ഉണ്ടായി.
മരിച്ച ബാലന്റെ കുടുംബം റഹീമിന് മാപ്പ് നൽകാൻ തയ്യാറാണെന്ന് റിയാദ് ക്രിമിനൽ കോടതിയെ അറിയിച്ചതോടെയാണ് വധശിക്ഷ റദ്ദാക്കാനുള്ള നടപടികൾ ആരംഭിച്ചത്. 34.35 കോടി രൂപ ദയാധനമായി സ്വീകരിച്ച ശേഷമാണ് സൗദി കുടുംബം മാപ്പ് നൽകാൻ സമ്മതിച്ചത്.
റഹീമിന്റെ മോചനത്തിനായി കേരളത്തിലും ഗൾഫ് രാജ്യങ്ങളിലുമടക്കം വ്യാപക ജനകീയ ക്യാംപെയിൻ സംഘടിപ്പിച്ചിരുന്നു. നിരവധി ആളുകളുടെ സഹായത്തോടെ ദയാധന തുക സമാഹരിക്കപ്പെട്ടത് കേസിൽ നിർണായകമായി. മോചനവാർത്ത പുറത്തുവന്നതോടെ റഹീമിന്റെ കുടുംബാംഗങ്ങളും നാട്ടുകാരും ആശ്വാസത്തിലും സന്തോഷത്തിലുമാണ്.
