ദുബായ്: ബലിപെരുന്നാൾ (ഈദ് അൽ അദ്ഹ) അവധിക്കാലത്തെ യാത്രക്കാരുടെ തിരക്കിനിടയിലും ദുബായ് അന്താരാഷ്ട്ര വിമാനത്താവളം (DXB) വഴിയുള്ള യാത്രാനടപടികൾ സുഗമമായി പുരോഗമിക്കുന്നു. പെരുന്നാൾ ദിനത്തിലെ റെക്കോർഡ് തിരക്ക് കാര്യക്ഷമമായി നിയന്ത്രിക്കുന്നതിനായി വിമാനത്താവളത്തിലെ വിവിധ ടെർമിനലുകളിൽ അധികൃതർ വിപുലമായ ക്രമീകരണങ്ങളാണ് ഒരുക്കിയിരിക്കുന്നത്.
പെരുന്നാൾ ആദ്യദിനത്തിൽ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് ദുബായ് മേധാവി ലഫ്റ്റനന്റ് ജനറൽ മുഹമ്മദ് അൽ മർറിയുടെ നേതൃത്വത്തിലുള്ള ഉന്നത ഉദ്യോഗസ്ഥ സംഘം വിമാനത്താവളത്തിൽ നേരിട്ടെത്തി പ്രവർത്തനങ്ങൾ വിലയിരുത്തി. ട്രാഫിക് നിയന്ത്രണങ്ങളും യാത്രക്കാരുടെ സുഗമമായ നീക്കവും ഉറപ്പാക്കാൻ ടെർമിനൽ 1, 2, 3 എന്നിവടങ്ങളിലെ അറൈവൽ, ഡിപ്പാർച്ചർ ഹാളുകളിൽ അദ്ദേഹം പ്രത്യേക പരിശോധന നടത്തി. കൂടാതെ, തിരക്കേറിയ ഈ സമയത്ത് സേവനമനുഷ്ഠിക്കുന്ന വിവിധ ഫീൽഡ് ടീമുകളുടെ സജ്ജീകരണങ്ങളും അദ്ദേഹം പരിശോധിച്ചു.
ജി.ഡി.ആർ.എഫ്.എ ദുബായ് ഡെപ്യൂട്ടി ഡയറക്ടർ ജനറൽ മേജർ ജനറൽ ഉബൈദ് മുഹൈർ ബിൻ സുറൂർ, ദുബായ് പൊലീസിലെ മുതിർന്ന ഉദ്യോഗസ്ഥരായ മേജർ ജനറൽ മർവാൻ ജുൽഫാർ, ബ്രിഗേഡിയർ എക്സ്പർട്ട് ഹമീദ് അൽ ഹാഷിമി എന്നിവരുൾപ്പെടെയുള്ള ഉദ്യോഗസ്ഥരുമായിരുന്നു സംഘത്തിൽ ഉണ്ടായിരുന്നത്.
ഉയർന്ന സുരക്ഷാ മാനദണ്ഡങ്ങൾ പാലിച്ചുകൊണ്ട് തന്നെ യാത്രക്കാരുടെ പരിശോധനകൾ വേഗത്തിൽ പൂർത്തിയാക്കാൻ വിമാനത്താവളത്തിൽ സാധിക്കുന്നുണ്ട്. ജി.ഡി.ആർ.എഫ്.എ ദുബായ്, ദുബായ് പൊലീസ്, മറ്റ് തന്ത്രപ്രധാന വിമാനത്താവള പങ്കാളികൾ എന്നിവർ തമ്മിലുള്ള മികച്ച ഏകോപനമാണ് ഇതിന് സഹായിക്കുന്നതെന്ന് അധികൃതർ വ്യക്തമാക്കി. ആധുനിക സാങ്കേതിക സംവിധാനങ്ങളും തത്സമയ ആശയവിനിമയവും (Real-time coordination) ഉള്ളതിനാൽ യാത്രക്കാർക്ക് വലിയ ക്യൂവിൽ നിൽക്കാതെ തന്നെ എമിഗ്രേഷൻ നടപടികൾ പൂർത്തിയാക്കാൻ സാധിക്കുന്നുണ്ട്.
വിമാനത്താവള കൗണ്ടറുകളിലും ചെക്ക്പോസ്റ്റുകളിലും ഡ്യൂട്ടിയിലുണ്ടായിരുന്ന പാസ്പോർട്ട് ഓഫീസർമാർക്കും മറ്റ് ജീവനക്കാർക്കും ലഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി പെരുന്നാൾ ആശംസകൾ നേർന്നു. അവധിക്കാലത്തെ കഠിനാധ്വാനത്തിന് അദ്ദേഹം ജീവനക്കാരെ പ്രത്യേകം അഭിനന്ദിക്കുകയും ചെയ്തു. ദുബായുടെ ഡിജിറ്റൽ-ഓപ്പറേഷണൽ സംവിധാനങ്ങളുടെ വിജയത്തിന് പിന്നിൽ ഇത്തരം സ്വദേശി പ്രതിഭകളുടെ വൈദഗ്ധ്യമാണെന്ന് അദ്ദേഹം ഓർമ്മിപ്പിച്ചു.
യാത്രക്കാരുടെ സൗകര്യങ്ങൾക്കാണ് ഞങ്ങൾ എപ്പോഴും മുൻഗണന നൽകുന്നത്. ഇന്ന് ദുബായ് എയർപോർട്ടിൽ കാണുന്ന സുഗമമായ യാത്രാനടപടികൾ വിവിധ സർക്കാർ വകുപ്പുകളുടെ മികച്ച ഏകോപനത്തിന്റെയും നമ്മുടെ ജീവനക്കാരുടെ ആത്മാർത്ഥമായ പരിശ്രമത്തിന്റെയും ഫലമാണെന്ന് മേധാവി ലഫ് : ജനറൽ അൽ മർറി പറഞ്ഞു. ദുബായിലെ ജനങ്ങൾക്കും ഇവിടെയെത്തുന്ന സന്ദർശകർക്കും സുരക്ഷിതവും സവിശേഷവുമായ യാത്രാനുഭവം സമ്മാനിക്കാൻ ഞങ്ങൾ പ്രതിജ്ഞാബദ്ധരാണെന്ന് അദ്ദേഹം കൂട്ടിച്ചേർത്തു.
വിമാനത്താവളങ്ങളിൽ “ഈദ് ഇൻ ദുബായ്” സ്പെഷ്യൽ സ്റ്റാമ്പ്.
സന്ദർശന വേളയിൽ വിമാനത്താവളത്തിൽ എത്തുന്ന യാത്രക്കാർക്കായി “ഈദ് ഇൻ ദുബായ്” (Eid in Dubai) എന്ന പ്രത്യേക സ്റ്റാമ്പ് പദ്ധതിക്കും തുടക്കം കുറിച്ചു. ദുബായിൽ വിമാനമിറങ്ങുന്ന യാത്രക്കാരുടെ പാസ്പോർട്ടുകളിൽ പ്രത്യേക ഈദ് തീമിലുള്ള സ്റ്റാമ്പുകൾ പതിച്ചാണ് അധികൃതർ സ്വീകരിക്കുന്നത്. പെരുന്നാൾ അവധിക്ക് ദുബായിൽ എത്തുന്നവർക്ക് ഒരു ഉത്സവപ്രതീതി സമ്മാനിക്കുന്നതിനും, ആതിഥ്യമര്യാദയ്ക്ക് പേരുകേട്ട ദുബായുടെ ആഗോള പ്രതിച്ഛായ കൂടുതൽ വ്യക്തമാക്കുന്നതിനുമാണ് ഈ മനോഹരമായ പദ്ധതിക്ക് തുടക്കമിട്ടിരിക്കുന്നത്.
