ദുബായ്: സൗദി ജയിൽ ആയിരുന്ന അബ്ദുൾ റഹീമിന്റെ മോചന സഹായത്തിനായുള്ള ആഗോള പ്രചാരണവുമായി ബന്ധപ്പെട്ട പ്രചോദനാത്മകമായ പൊതുജന പിന്തുണ സമാഹരണത്തിനും മാനുഷിക നേതൃത്വത്തിനും ബോബി ചെമ്മണൂരിനെ ആദരിക്കുന്ന ഒരു പ്രത്യേക മാനുഷിക സേവനത്തിനുള്ള അംഗീകാരമായി അറേബ്യൻ വേൾഡ് റെക്കോർഡ്സ് ഔദ്യോഗികമായി പ്രഖ്യാപിച്ചു.
“തടവുകാരുടെ മോചന സഹായത്തിനായുള്ള ഏറ്റവും വലിയ മാനുഷിക പൊതുജന പിന്തുണ സമാഹരണം” എന്ന അംഗീകാര പദവിയോടെയാണ് ബോബി ചെമ്മണൂരിനെ ആദരിക്കുന്നത്. ലോകമെമ്പാടുമുള്ള മലയാളികളെ ഒരു സാമൂഹിക ലക്ഷ്യത്തിനായി ഒന്നിപ്പിച്ച അസാധാരണമായ മാനുഷിക പ്രവർത്തനത്തെ മാനിച്ചാണ് ഈ പ്രഖ്യാപനം.
അറേബ്യൻ വേൾഡ് റെക്കോർഡ്സിന്റെ പ്രതിനിധി ശരത് ദുബായിൽ നടത്തിയ ഔദ്യോഗിക പ്രഖ്യാപനത്തിലൂടെയാണ് പുരസ്കാര വിവരം പുറത്തുവന്നത്. അബ്ദുൾ റഹീമിന്റെ മോചന സഹായത്തിനായി ആഗോള മലയാളി സമൂഹത്തിൽ നിന്ന് ഏകദേശം 45 കോടി രൂപ സമാഹരിക്കാൻ സാധിച്ചതാണ് ഈ പ്രവർത്തനത്തെ ശ്രദ്ധേയമാക്കിയത്.
കാരുണ്യം, ഐക്യം, സാമൂഹിക ഉത്തരവാദിത്തം, ആഗോള മാനുഷിക സ്വാധീനം എന്നിവ ഉയർത്തിപ്പിടിച്ച പ്രവർത്തനമാണ് ബോബി ചെമ്മണൂർ നടത്തിയതെന്ന് അറേബ്യൻ വേൾഡ് റെക്കോർഡ്സ് കമ്മിറ്റി പ്രസ്താവനയിൽ വ്യക്തമാക്കി. പൊതുജന പങ്കാളിത്തം ഉറപ്പാക്കി കൂട്ടായ സാമൂഹിക ഉത്തരവാദിത്തത്തിന്റെ ശക്തമായ മാതൃക സൃഷ്ടിക്കാനായതും അംഗീകാരത്തിന് കാരണമായതായി കമ്മിറ്റി ചൂണ്ടിക്കാട്ടി.
ഈ മാനുഷിക സംരംഭത്തിൽ പങ്കാളികളായ എല്ലാ സംഭാവകരെയും സംഘടന അഭിനന്ദിച്ചു. ലോകമെമ്പാടുമുള്ള മലയാളികൾ പ്രകടിപ്പിച്ച ഐക്യവും സഹകരണവുമാണ് ഈ ദൗത്യത്തെ വിജയത്തിലേക്ക് നയിച്ചതെന്നും അധികൃതർ പറഞ്ഞു.
അംഗീകാരത്തിന്റെ ഔദ്യോഗിക സമ്മാനദാന ചടങ്ങ് മേയ് 31ന് എറണാകുളത്ത് നടക്കും.
