ദുബൈ: ജബൽ അലി തുറമുഖത്ത് ക്ലിയറൻസ് ലഭിക്കാതെ കെട്ടിക്കിടക്കുന്നതും ഉടമസ്ഥർ ഉപേക്ഷിച്ചതുമായ ഭക്ഷ്യശേഖരങ്ങൾ ആവശ്യക്കാരിലെത്തിക്കാൻ പുതിയ പദ്ധതിയുമായി യുഎഇ. ഭക്ഷ്യവസ്തുക്കൾ പാഴാകുന്നത് തടയുകയും അവ ജീവകാരുണ്യ പ്രവർത്തനങ്ങൾക്കായി പ്രയോജനപ്പെടുത്തുകയും ചെയ്യുക എന്ന ലക്ഷ്യത്തോടെയാണ് യുഎഇ ഫുഡ് ബാങ്കും ഡിപി വേൾഡ് ഫൗണ്ടേഷനും സംയുക്തമായി പദ്ധതിക്ക് തുടക്കമിട്ടിരിക്കുന്നത്.
‘സുസ്ഥിര നന്മ’ (Sustainable Goodness) എന്ന പേരിൽ നടപ്പാക്കുന്ന പദ്ധതിക്ക് ദുബൈ മുനിസിപ്പാലിറ്റി, ദുബൈ കസ്റ്റംസ്, ഡിപി വേൾഡ് എന്നിവയുടെ സഹകരണവുമുണ്ട്. ജബൽ അലി തുറമുഖത്ത് കസ്റ്റംസ് നടപടികൾ പൂർത്തിയാകാതെ കിടക്കുന്ന ഭക്ഷ്യശേഖരങ്ങൾ കണ്ടെത്തി, അവയുടെ ഗുണനിലവാരവും ആരോഗ്യ സുരക്ഷാ മാനദണ്ഡങ്ങളും കൃത്യമായി പരിശോധിച്ച ശേഷമായിരിക്കും വിതരണം നടത്തുക.
പരിശോധനയിൽ സുരക്ഷിതമാണെന്ന് ഉറപ്പുവരുത്തുന്ന ഭക്ഷ്യവസ്തുക്കൾ യുഎഇ ഫുഡ് ബാങ്കിന്റെ മാനുഷിക സഹായ ശൃംഖല വഴി അർഹരായ കുടുംബങ്ങൾക്കും ആവശ്യക്കാർക്കും എത്തിക്കും. ഇതിലൂടെ ഭക്ഷ്യ പാഴ്‌വ്യയം കുറയ്ക്കുന്നതിനൊപ്പം സാമൂഹിക ക്ഷേമ പ്രവർത്തനങ്ങൾക്കും ശക്തമായ പിന്തുണ ലഭിക്കുമെന്നാണ് അധികൃതർ വ്യക്തമാക്കുന്നത്.
ഭക്ഷ്യശേഖരങ്ങൾ സ്വമേധയാ ഉപേക്ഷിച്ച് അവ യുഎഇ ഫുഡ് ബാങ്കിന് സംഭാവന ചെയ്യാൻ തയ്യാറാകുന്ന കമ്പനികൾക്ക് കസ്റ്റംസ് റിലീസ് നടപടിക്രമങ്ങൾ ലളിതമാക്കുന്നതിനും സമയവും ചെലവും കുറയ്ക്കുന്നതിനും പദ്ധതി സഹായകരമാകും. ഇതുവഴി ഉപയോഗപ്രദമായ ഭക്ഷ്യവസ്തുക്കൾ നശിപ്പിക്കപ്പെടാതെ സമൂഹത്തിന്റെ നന്മയ്ക്കായി ഉപയോഗിക്കാനാകുമെന്നാണ് വിലയിരുത്തൽ.
ഭക്ഷ്യവിതരണ ശൃംഖലയിൽ നിലനിൽക്കുന്ന പ്രധാന വെല്ലുവിളികളിലൊന്നാണ് ഉപയോഗയോഗ്യമായ ഭക്ഷണം പാഴാകുന്നത്. ഇത്തരം ഭക്ഷ്യശേഖരങ്ങളെ ജീവകാരുണ്യ പ്രവർത്തനങ്ങളിലേക്ക് തിരിച്ചുവിടുന്നത് സുസ്ഥിര വികസന ലക്ഷ്യങ്ങൾ കൈവരിക്കുന്നതിൽ നിർണായകമാണെന്ന് യുഎഇ ഫുഡ് ബാങ്ക് ഫൗണ്ടേഷൻ എക്സിക്യൂട്ടീവ് ടീം മേധാവി മനാൽ ബിൻ യാറൂഫ് പറഞ്ഞു.
ഭക്ഷ്യവസ്തുക്കൾ യുഎഇ ഫുഡ് ബാങ്കിലേക്ക് കൈമാറുന്നതിന് മുമ്പ് അവ ആരോഗ്യ-ഭക്ഷ്യസുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനായി ദുബൈ മുനിസിപ്പാലിറ്റി സാങ്കേതികവും നിയന്ത്രണപരവുമായ പിന്തുണ നൽകുമെന്നും അധികൃതർ അറിയിച്ചു. ഭക്ഷ്യ പാഴ്‌വ്യയം കുറയ്ക്കാനും സാമൂഹിക ഉത്തരവാദിത്തം ശക്തിപ്പെടുത്താനുമുള്ള മാതൃകാപരമായ നീക്കമായാണ് പദ്ധതിയെ വിലയിരുത്തുന്നത്.
