കൊളംബോവിലും മറ്റ് പ്രധാന നഗരങ്ങളിലും ഹൈപ്പർമാർക്കറ്റുകൾ ആരംഭിക്കുന്നതിനുള്ള സാധ്യതകൾ വിലയിരുത്താൻ ലുലു ഉന്നതതല സംഘം ഉടൻ ശ്രീലങ്ക സന്ദർശിക്കും.
ദുബായ്: യു.എ.ഇ.യിൽ ഔദ്യോഗിക സന്ദർശനം നടത്തുന്ന കൊളംബോ ഗവർണ്ണർ ഹാനിഫ് യൂസഫുമായി ലുലു ഗ്രൂപ്പ് ചെയർമാൻ എം.എ. യൂസഫലി കൂടിക്കാഴ്ച നടത്തി. യൂസഫലിയുടെ ദുബായിലെ വസതിയിൽ വെച്ചായിരുന്നു ഈ സുപ്രധാന കൂടിക്കാഴ്ച. ശ്രീലങ്കൻ തലസ്ഥാനമായ കൊളംബോവിലും രാജ്യത്തെ മറ്റ് പ്രധാന പട്ടണങ്ങളിലും ലുലു ഹൈപ്പർമാർക്കറ്റുകൾ സ്ഥാപിക്കുന്നതിനുള്ള സാധ്യതകളാണ് ചർച്ചയിൽ പ്രധാനമായും ഉയർന്നുവന്നത്.
പ്രതിസന്ധികളെല്ലാം അതിജീവിച്ച് ശ്രീലങ്ക ശക്തമായ സാമ്പത്തിക മുന്നേറ്റത്തിന്റെ പാതയിലാണെന്ന് ഗവർണർ ഹാനിഫ് യൂസഫ് കൂടിക്കാഴ്ചയിൽ വ്യക്തമാക്കി. നിലവിൽ രാജ്യത്തെ റീട്ടെയ്ൽ മേഖലയിൽ മികച്ച ബിസിനസ് സാധ്യതകളാണ് നിലനിൽക്കുന്നതെന്നും ലുലു ഗ്രൂപ്പിനെപ്പോലെയുള്ള ആഗോള ബ്രാൻഡുകൾക്ക് അനുകൂലമായ സാഹചര്യമാണ് ശ്രീലങ്കയിലുള്ളതെന്നും അദ്ദേഹം കൂട്ടിച്ചേർത്തു.
ശ്രീലങ്കയിലെ റീട്ടെയ്ൽ വിപണിയിലെ സാധ്യതകൾ കണക്കിലെടുത്ത്, ഇതുമായി ബന്ധപ്പെട്ട തുടർനടപടികൾക്കായി ലുലു ഗ്രൂപ്പിലെ ഉന്നത ഉദ്യോഗസ്ഥരുടെ ഒരു പ്രത്യേക ടീം അടുത്ത് തന്നെ ശ്രീലങ്ക സന്ദർശിക്കുമെന്ന് എം.എ. യൂസഫലി അറിയിച്ചു. നിലവിൽ കൊളംബോയിൽ ലുലു ഗ്രൂപ്പിന് സ്വന്തമായി ഒരു ഭക്ഷ്യ സംസ്കരണ ലോജിസ്റ്റിക്സ് കേന്ദ്രം വിജയകരമായി പ്രവർത്തിക്കുന്നുണ്ട്. ഇതിന് പിന്നാലെയാണ് ഹൈപ്പർമാർക്കറ്റ് ശൃംഖലയും രാജ്യത്തേക്ക് വ്യാപിപ്പിക്കാൻ ലുലു ഒരുങ്ങുന്നത്.
യു.എ.ഇ.യിലെ ശ്രീലങ്കൻ സ്ഥാനപതി ഡോ. ആരുഷ കുരായ്, മുൻ സ്ഥാനപതി ഉദയ ഇന്ദ്രരത്ന, ലുലു ഗ്രൂപ്പ് ഡയറക്ടർ എം.എ. സലീം, ലുലു ഇൻ്റർനാഷണൽ ഹോൾഡിംഗ്സ് ഡയറക്ടർ ഏ.വി. ആനന്ദ് റാം എന്നിവരും ഈ ഔദ്യോഗിക കൂടിക്കാഴ്ചയിൽ പങ്കെടുത്തു.
