ദുബായ്: പ്രാദേശിക സംരംഭകർക്കും ചെറുകിട വ്യാപാരികൾക്കും കുടുംബ സംരംഭങ്ങൾക്കും അവസരമൊരുക്കുന്ന ദുബായ് മുനിസിപ്പാലിറ്റിയുടെ സൂഖ് അൽ ഫ്രീജിന്റെ അഞ്ചാം സീസണിന് രജിസ്ട്രേഷൻ ആരംഭിച്ചു. ദുബായിലെ മൂന്ന് പാർക്കുകളിലായാണ് ഇത്തവണ വിപണി സംഘടിപ്പിക്കുന്നത്.
ഡിസംബർ 11 മുതൽ 20 വരെ നദ് അൽ ഷെബ റോസ് ഗാർഡനിലും, ഡിസംബർ 25 മുതൽ ജനുവരി 3 വരെ അൽ ബർഷ പോണ്ട് പാർക്കിലും, ജനുവരി 8 മുതൽ 17 വരെ അൽ വർഖ പാർക്കിലുമാണ് പരിപാടി.
ആകെ 50 സ്റ്റാളുകളാണ് ഒരുക്കുന്നത്. ഭക്ഷ്യവിഭവങ്ങൾ, കരകൗശല ഉൽപ്പന്നങ്ങൾ, ഫാഷൻ ഉൽപ്പന്നങ്ങൾ, പരിസ്ഥിതി സൗഹൃദ ഉൽപ്പന്നങ്ങൾ എന്നിവ പ്രദർശിപ്പിക്കാനും വിൽക്കാനും സംരംഭകർക്ക് അവസരം ലഭിക്കും. ഏഷ്യൻ വില്ലേജ്, കുട്ടികൾക്കുള്ള വിനോദമേഖല, Gen Z സോൺ, സിപ്പ്‌ലൈൻ, ഇന്ററാക്ടീവ് ഗെയിമുകൾ എന്നിവയും ഇത്തവണത്തെ പ്രത്യേകതകളാണ്.
എല്ലാ ദിവസവും വൈകിട്ട് 4.30 മുതൽ രാത്രി 10 വരെയാണ് വിപണി പ്രവർത്തിക്കുക. പങ്കെടുക്കാൻ ആഗ്രഹിക്കുന്ന സംരംഭകർക്കും കുടുംബ സംരംഭങ്ങൾക്കും ദുബായ് മുനിസിപ്പാലിറ്റിയുടെ വെബ്സൈറ്റ് വഴി രജിസ്റ്റർ ചെയ്യാം. കഴിഞ്ഞ സീസണിൽ 3,08,842 പേരാണ് സൂഖ് അൽ ഫ്രീജ് സന്ദർശിച്ചത്.
