ദുബായ് : പുതുവർഷാരംഭത്തോടെ ശൈഖ് റാഷിദ് ഇടനാഴി വികസന പദ്ധതിയുടെ ഭാഗമായി ഔദ് മേത്ത റോഡിന്റെയും അൽ അസായീൽ സ്ട്രീറ്റിന്റെയും വികസന പദ്ധതിയുടെ 60 ശതമാനം പൂർത്തിയായതായി ദുബൈ റോഡ്സ് ആൻഡ് ട്രാൻസ്പോർട് അതോറിറ്റി (ആർ.ടി.എ) പ്രഖ്യാപിച്ചു.4.3 കിലോമീറ്റർ നീളമുള്ള പാലങ്ങളും, 14 കിലോമീറ്റർ ദൈർഘ്യത്തിൽ റോഡുകളും ഉൾപ്പെടുന്ന നാല് പ്രധാന കവലകളുടെ വികസനവും പദ്ധതിയിൽ ഉൾപ്പെടുന്നു. 2030ൽ പദ്ധതി മൊത്തമായി പൂർത്തിയാകുമ്പോൾ 420,000ത്തിലധികം താമസക്കാർക്ക് സേവനം നൽകാനാകും.അൽ അസായീൽ സ്ട്രീറ്റിനും അൽ ഖൈൽ റോഡിനുമിടയിൽ അൽ വസൽ ക്ലബ് സ്ട്രീറ്റ് വഴിയുള്ള കണക്റ്റിവിറ്റിയും ഈ പ്രൊജക്റ്റ് മെച്ചപ്പെടുത്തുന്നു. അതേസമയം, ഔദ് മേത്ത റോഡിലേക്കും അൽ വസൽ ക്ലബ് സ്ട്രീറ്റിലേക്കും പ്രത്യേക എക്സിറ്റ് നൽകുകയും ചെയ്യുന്നു.
അൽ അസായീൽ സ്ട്രീറ്റിൽ നിന്ന് അൽ ഖൈൽ റോഡിലേക്കുള്ള വടക്കുഭാഗത്ത് നിന്നുള്ള ഗതാഗതത്തിന് സൗകര്യമൊരുക്കുന്ന പാലങ്ങളുടെ 70 ശതമാനവും പദ്ധതി കോൺട്രാക്ടർ പൂർത്തിയാക്കിയതായി അധികൃതർ പറഞ്ഞു. ഈ വർഷം ആദ്യ പാദത്തിൽ അത് ഗതാഗതത്തിന് തുറന്നു കൊടുക്കാനുള്ള തയാറെടുപ്പിലാണ് ഇപ്പോൾ പ്രവൃത്തികൾ പുരോഗമിക്കുന്നത്.
ദുബായ് -അൽ ഐൻ റോഡിൽ നിന്ന് അൽ വസൽ ക്ലബ് സ്ട്രീറ്റിലേക്കുള്ള ഗതാഗതത്തിന് സൗകര്യമൊരുക്കുന്ന തുരങ്കത്തിന്റെ നിർമാണ പ്രവർത്തനങ്ങളിൽ ഏകദേശം 60 ശതമാനവും പൂർത്തിയായി. ഈ വർഷം മൂന്നാം പാദത്തിൽ തുറക്കാൻ പോകുന്ന ശേഷിക്കുന്ന റോഡ് വീതി കൂട്ടലുകളുടെയും അനുബന്ധ പാലം ഘടനകളുടെയും പ്രവർത്തനങ്ങൾ പുരോഗമിക്കുകയാണ്.
സാബീൽ, അൽ ജദ്ദാഫ്, ഔദ് മേത്ത, ഉം ഹുറൈർ, ലത്തീഫ ഹോസ്പിറ്റൽ, അൽ വസൽ ക്ലബ് എന്നീ പ്രധാന സേവന-റെസിഡൻഷ്യൽ-വികസന മേഖലകളെയാണ് പദ്ധതി പിന്തുണയ്ക്കുന്നത്.
2030 ആകുമ്പോഴേക്കും ഈ പദ്ധതി നടപ്പാക്കുന്ന പ്രദേശങ്ങളിലെ ജനസംഖ്യ 420,000 കവിയുമെന്ന് പ്രതീക്ഷിക്കുന്നു. ഇരു ദിശകളിലേക്കും മണിക്കൂറിൽ 10,400 വാഹനങ്ങൾ എന്നതിൽ നിന്ന് ഔദ് മൈഥ റോഡിന്റെ ശേഷി മണിക്കൂറിൽ 15,600 വാഹനങ്ങളായി ഈ പദ്ധതി വർധിപ്പിക്കും. ഇത് 50 ശതമാനം വർധനയെ പ്രതിനിധീകരിക്കുന്നു. അതേസമയം, യാത്രാ സമയം 20 മിനുട്ടിൽ നിന്ന് വെറും അഞ്ച് മിനുട്ടായി കുറയ്ക്കുകയും 75 ശതമാനം പുരോഗതി കൈവരിക്കുകയും ചെയ്യും. ആദ്യ കവല
ഔദ് മൈഥ റോഡ്-ശൈഖ് റാഷിദ് റോഡ് കവലയിൽ തുടങ്ങി നാല് പ്രധാന കവലകളുടെ നവീകരണം പദ്ധതിയിൽ ഉൾപ്പെടുന്നു. ഔദ് മേത്ത റോഡിൽ നിന്ന് ശൈഖ് റാഷിദ് റോഡിലേക്ക് അൽ ഖർഹൂദ് പാലത്തിലേക്കുള്ള ഗതാഗതത്തിനായി ഇടത്തേക്ക് തിരിയുന്ന സ്ലിപ്പ് റാംപ് കൂട്ടിച്ചേർക്കൽ, മണിക്കൂറിൽ 1,800 വാഹനങ്ങളുടെ ശേഷി കൂട്ടൽ എന്നിവയും ഇതിൽ ഉൾപ്പെടുന്നു.
നിലവിലുള്ള പാലത്തിനും അൽ സഹ്റാവി സ്ട്രീറ്റ് എക്സിറ്റിനുമിടയിലുള്ള ശൈഖ് റാഷിദ് റോഡിലെ സർവിസ് റോഡ് നവീകരിക്കൽ, നിലവിലുള്ള ഗതാഗത ഓവർലാപ് പരിഹരിക്കൽ, എല്ലാ ഉപയോക്താക്കൾക്കും റോഡ് സുരക്ഷ വർധിപ്പിക്കൽ എന്നിവയും ഈ പരിധിയിൽ ഉൾപ്പെടുന്നു. കൂടാതെ, ശൈഖ് റാഷിദ് റോഡിൽ നിന്ന് ഔദ് മൈഥ റോഡിലേക്ക് ദുബൈ-അൽ ഐൻ റോഡിലേക്ക് നീളുന്ന വലത്തേക്ക് തിരിയുന്ന പാതകളുടെ എണ്ണം രണ്ട് വരിയിൽ നിന്ന് മൂന്ന് വരിയായി (മണിക്കൂറിൽ 4,000 വാഹനങ്ങളായി) വർധിപ്പിക്കും.
അൽ അസായീൽ സ്ട്രീറ്റും അൽ വസൽ ക്ലബ് സ്ട്രീറ്റും വഴി അൽ ഖൈൽ റോഡുമായി ബന്ധിപ്പിക്കുന്ന രണ്ട് പാലങ്ങളുടെ നിർമാണത്തിലൂടെ അൽ അസായീൽ സ്ട്രീറ്റും അൽ വസൽ ക്ലബ് സ്ട്രീറ്റും തമ്മിലുള്ള ഔദ് മൈഥ റോഡ് കവലയുടെ നവീകരണവും പദ്ധതിയിൽ ഉൾപ്പെടുന്നു.
ആദ്യ പാലത്തിൽ രണ്ട് വരികളുണ്ട്. ഓരോന്നിലും 2,400 വാഹനങ്ങൾക്ക് സഞ്ചരിക്കാൻ കഴിയും. അൽ അസായീൽ സ്ട്രീറ്റിൽ നിന്ന് അൽ വസൽ ക്ലബ് സ്ട്രീറ്റിലേക്കുള്ള ഗതാഗതത്തിന് മണിക്കൂറിൽ 3,600 വാഹനങ്ങൾക്ക് സഞ്ചരിക്കാൻ കഴിയുന്ന മൂന്ന് വരിപ്പാലമാണ് രണ്ടാമത്തെ പാലം.
കൂടാതെ, അൽ അസായീൽ സ്ട്രീറ്റിൽ നിന്ന് ഔദ് മൈഥ റോഡിലേക്കുള്ള വാഹനങ്ങൾക്ക് ഇടത്തേക്ക് തിരിയാൻ മണിക്കൂറിൽ 2,400 വാഹനങ്ങൾക്ക് സഞ്ചരിക്കാൻ കഴിയുന്ന ഒരു പ്രത്യേക രണ്ട് വരിപ്പാലത്തിന്റെ നിർമാണവും പദ്ധതിയിൽ ഉൾപ്പെടുന്നു. പ്രധാന ഇടനാഴിയിലെ നിലവിലുള്ള നെറ്റ്വർകിങ്-സ്ട്രെച്ചിങ് മുഖേനയുണ്ടാകുന്ന പ്രശ്നങ്ങൾ പരിഹരിക്കാനായി അൽ വസൽ ക്ലബ്ബിലേക്കുള്ള ആക്സസ് റോഡിന്റെ നവീകരണം, അൽ വസൽ ക്ലബ് സ്ട്രീറ്റിലെ എൻട്രി-എക്സിറ്റ് പോയിന്റുകൾ എന്നിവയും ഈ പരിധിയിൽ ഉൾപ്പെടുന്നു.
അൽ അസായീൽ സ്ട്രീറ്റിൽ നിന്ന് അൽ ഖൈൽ റോഡിലേക്കും ബിസിനസ് ബേ ക്രോസിംഗിലേക്കും മണിക്കൂറിൽ 3,000 വാഹനങ്ങൾക്ക് സഞ്ചരിക്കാൻ കഴിയുന്ന രണ്ട് വരി പാലം നിർമണവും, അൽ വസൽ ക്ലബ് സ്ട്രീറ്റ്-അൽ ഖൈൽ റോഡ് ഇന്റർസെക്ഷൻ നവീകരണവും പദ്ധതിയിൽ ഉൾപ്പെടുന്നു.
അൽ ഖൈൽ റോഡിലേക്കുള്ള എക്സിറ്റ് ശേഷി രണ്ട് വരികളായി വർധിപ്പിക്കൽ, ഇരു ദിശകളിലേക്കും സർവിസ് റോഡുകളുടെ നിർമാണം, പ്രദേശത്തെ ഗതാഗത പ്രവാഹവും പ്രവേശന ക്ഷമതയും വർധിപ്പിക്കാൻ പ്രത്യേക പാർക്കിംഗ് സ്ഥലങ്ങൾ ഒരുക്കൽ എന്നിവ ഉൾപ്പെടെ അൽ വസൽ ക്ലബ് സ്ട്രീറ്റിന്റെ നവീകരണവും ഇതിൽ ഉൾപ്പെടുന്നു.
അൽ ഖൈൽ, ഔദ് മേത്ത റോഡുകളുമായി സാബീൽ പാലസ് സ്ട്രീറ്റ് കവലയുടെ നവീകരണവും പദ്ധതിയിൽ ഉൾപ്പെടുന്നു. അൽ ഖൈൽ റോഡിൽ നിന്ന് ദുബൈ-അൽ ഐൻ റോഡിലേക്കുള്ള ഗതാഗതത്തിന് സർവിസ് റാംപിൽ ഇടത്തേക്ക് തിരിയുന്ന അധിക സ്ലിപ്പ് ലെയ്ൻ കൂട്ടിച്ചേർക്കൽ, മണിക്കൂറിൽ 900 വാഹനങ്ങളിൽ നിന്ന് 1,800 വാഹനങ്ങളായി ശേഷി കൂട്ടൽ എന്നിവ ഇതിലുൾപ്പെടുന്നു.
മണിക്കൂറിൽ 1,200 വാഹനങ്ങൾക്ക് ശേഷിയുള്ള സിംഗിൾ ലെയ്ൻ വാഹന തുരങ്കത്തിന്റെ നിർമാണം, ദുബൈ-അൽ ഐൻ റോഡിൽ നിന്ന് അൽ വസൽ ക്ലബ് സ്ട്രീറ്റിലേക്കുള്ള ഗതാഗതത്തിന് സേവനം നൽകൽ, നിലവിലുള്ള ഗതാഗത ഓവർലാപ് പരിഹരിക്കാൻ സൗകര്യം എന്നിവയും ഇതിൽ ഉൾപ്പെടുന്നു.
അൽ ഖൈൽ റോഡിൽ നിന്ന് ഔദ് മേഥ റോഡിലേക്കുള്ള ഗതാഗതത്തിന് നിലവിലുള്ള പാലത്തിലെ പാതകൾ രണ്ട് വരിയിൽ നിന്ന് മൂന്ന് വരിയിലേക്ക് മാറ്റും. ഇത് പാലത്തിന്റെ ശേഷി മണിക്കൂറിൽ 2,200 വാഹനങ്ങളിൽ നിന്ന് 3,300 ആയി ഉയർത്തും.
