ജൂൺ 28-ന് ബർ ദുബായ് മൻഖൂൽ ലൈബ്രറിയിലാണ് പരിപാടി. മലയാളത്തിലും ഇംഗ്ലീഷിലും പ്രസംഗ-നേതൃത്വ കഴിവുകൾ മെച്ചപ്പെടുത്താൻ പ്രൊഫഷണലുകൾക്കും വിദ്യാർത്ഥികൾക്കും സുവർണ്ണാവസരം.
ദുബായ്: പ്രസംഗകലയും നേതൃത്വപാടവവും പ്രായോഗിക പരിശീലനത്തിലൂടെ വളർത്തിയെടുക്കാൻ സഹായിക്കുന്ന പ്രമുഖ ആഗോള സംഘടനയായ ടോസ്റ്റ്മാസ്റ്റേഴ്സ് ഇന്റർനാഷണലിന്റെ ഭാഗമായ ‘ഗോഡ്സ് ഓൺ ടോസ്റ്റ്മാസ്റ്റേഴ്സ് ക്ലബ്’ (മലയാളം & ഇംഗ്ലീഷ്) ദുബായിൽ സൗജന്യ ഓപ്പൺ ഹൗസ് സംഘടിപ്പിക്കുന്നു. 2026 ജൂൺ 28 ഞായറാഴ്ച രാവിലെ 9:30-ന് ബർ ദുബായിലെ മൻഖൂൽ പബ്ലിക് ലൈബ്രറിയിലാണ് പരിപാടി നടക്കുക.
ഇന്നത്തെ അതിവേഗം മാറിക്കൊണ്ടിരിക്കുന്ന തൊഴിൽ മേഖലകളിൽ കരിയർ വളർച്ചയ്ക്കും പ്രൊഫഷണൽ വിജയത്തിനും ഫലപ്രദമായ ആശയവിനിമയം, പൊതുപ്രസംഗം (Public Speaking), നേതൃത്വപാടവം, ആത്മവിശ്വാസം, മികച്ച പ്രെസന്റേഷൻ കഴിവുകൾ എന്നിവ അനിവാര്യമാണ്. ഈ പശ്ചാത്തലത്തിലാണ്, ലളിതവും ക്രമബദ്ധവുമായ പഠനപദ്ധതിയിലൂടെ ഈ കഴിവുകൾ വികസിപ്പിക്കാൻ ടോസ്റ്റ്മാസ്റ്റേഴ്സ് ക്ലബ് പൊതുജനങ്ങൾക്ക് അവസരമൊരുക്കുന്നത്.
ഈ ഓപ്പൺ ഹൗസ് പരിപാടിയിലൂടെ പൊതുജനങ്ങൾക്ക് ടോസ്റ്റ്മാസ്റ്റേഴ്സ് പ്രസ്ഥാനത്തിന്റെ പ്രവർത്തനങ്ങളെ നേരിട്ട് കണ്ടറിയാൻ സാധിക്കും. ക്ലബ് മീറ്റിംഗുകൾ എങ്ങനെയാണ് നടക്കുന്നതെന്നും, സ്റ്റേജിൽ ഭയമില്ലാതെ സംസാരിക്കാനുള്ള പരിശീലനം എങ്ങനെയാണ് നൽകുന്നതെന്നും മനസ്സിലാക്കാനും നിലവിലെ അംഗങ്ങളുമായി സംവദിക്കാനും വേദിയിൽ സംസാരിക്കാനുള്ള അവസരം നേരിട്ട് അനുഭവിക്കാനും ഇതിലൂടെ സാധിക്കും.
മലയാളത്തിലും ഇംഗ്ലീഷിലും ഒരേപോലെ ആശയവിനിമയ ശേഷി മെച്ചപ്പെടുത്താൻ ആഗ്രഹിക്കുന്ന പ്രവാസികളായ പ്രൊഫഷണലുകൾ, വിദ്യാർത്ഥികൾ, സംരംഭകർ, മാനേജർമാർ എന്നിവർക്കെല്ലാം ഈ സെഷൻ ഏറെ പ്രയോജനകരമായിരിക്കും. ഔദ്യോഗിക മേഖലകളിൽ കൂടുതൽ തിളങ്ങാൻ ആഗ്രഹിക്കുന്നവർക്ക് ഈ കൂട്ടായ്മ മികച്ചൊരു അടിത്തറ നൽകും.
പരിപാടിയിൽ പങ്കെടുക്കാൻ മുൻപരിചയമോ നിലവിൽ ടോസ്റ്റ്മാസ്റ്റേഴ്സിൽ അംഗത്വമോ ആവശ്യമില്ല. പ്രവേശനം തികച്ചും സൗജന്യമാണ്. താൽപര്യമുള്ള ഏവർക്കും ഈ പരിപാടിയിലേക്ക് സ്വാഗതം. കൂടുതൽ വിവരങ്ങൾക്കും രജിസ്ട്രേഷനും ക്ലബ് പ്രസിഡന്റ് ടോസ്റ്റ്മാസ്റ്റർ എം.സി. നവാസ് (050 432 8819), വിപി എഡ്യൂക്കേഷൻ ടോസ്റ്റ്മാസ്റ്റർ മിനി (050 545 0588) എന്നിവരുമായി ബന്ധപ്പെടാവുന്നതാണ്.
വ്യക്തികളുടെ ആശയവിനിമയ ശേഷിയും നേതൃത്വപാടവവും മെച്ചപ്പെടുത്തുന്നതിനായി ലോകമെമ്പാടും പ്രവർത്തിക്കുന്ന ഒരു അന്താരാഷ്ട്ര ലാഭരഹിത വിദ്യാഭ്യാസ സംഘടനയാണ് ടോസ്റ്റ്മാസ്റ്റേഴ്സ് ഇന്റർനാഷണൽ. 1924-ൽ അമേരിക്കയിൽ സ്ഥാപിതമായ ഈ പ്രസ്ഥാനത്തിന് ഇന്ന് ലോകമെമ്പാടും ആയിരക്കണക്കിന് ശാഖകളുണ്ട്. യുഎഇയിലെ പ്രവാസി മലയാളി സമൂഹത്തിനിടയിലും കോർപ്പറേറ്റ് മേഖലയിലും വ്യക്തിത്വ വികസനത്തിനും കരിയർ വളർച്ചയ്ക്കും ടോസ്റ്റ്മാസ്റ്റേഴ്സ് ക്ലബ്ബുകൾ വലിയ സ്വാധീനമാണ് ചെലുത്തുന്നത്.
