ക്രിപ്റ്റോ.കോം പേ സാങ്കേതികവിദ്യ വഴി എമിറേറ്റ്സിലെ നിവാസികൾക്ക് ക്രിപ്റ്റോ വിനിമയം സാധ്യമാക്കി ദുബായ് എയർപോർട്ട് റീട്ടെയ്ലർ.
ദുബായ്, യു.എ.ഇ — ഓഗസ്റ്റ് 6, 2026:ദുബായ് ഇൻ്റർനാഷണൽ എയർപോർട്ടിലെയും അൽ മക്തൂം എയർപോർട്ടിലെയും ഡ്യൂട്ടി ഫ്രീ ഷോപ്പുകളിൽ സാധനങ്ങൾ വാങ്ങാൻ ഇനി ക്രിപ്റ്റോകറൻസിയും ഉപയോഗിക്കാം. പ്രമുഖ ഡിജിറ്റൽ അസറ്റ് പ്ലാറ്റ്ഫോമായ ക്രിപ്റ്റോ.കോമുമായി (Crypto.com) സഹകരിച്ച് നടപ്പിലാക്കിയ ഈ പദ്ധതിയിലൂടെ മിഡിൽ ഈസ്റ്റിൽ നിയന്ത്രിത ക്രിപ്റ്റോ പേയ്മെന്റ് സംവിധാനം അവതരിപ്പിക്കുന്ന ആദ്യ എയർപോർട്ട് റീട്ടെയ്ലറായി ദുബായ് ഡ്യൂട്ടി ഫ്രീ മാറി.
യു.എ.ഇയിൽ റെസിഡൻസി യോഗ്യതയുള്ള ഉപഭോക്താക്കൾക്കാണ് നിലവിൽ ഈ സേവനം ലഭ്യമാകുക. എയർപോർട്ടുകളിലെ നേരിട്ടുള്ള കടകൾക്ക് പുറമെ ഡ്യൂട്ടി ഫ്രീയുടെ ഔദ്യോഗിക വെബ്സൈറ്റ് വഴിയുള്ള ഓൺലൈൻ പർച്ചേസുകൾക്കും ക്രിപ്റ്റോ.കോം പേ (Crypto.com Pay™) ഉപയോഗിച്ച് പണമടയ്ക്കാനാകും.
2025 ജൂലൈയിൽ ദുബായ് ഡ്യൂട്ടി ഫ്രീയും ക്രിപ്റ്റോ.കോമും ഒപ്പുവെച്ച ധാരണാപത്രത്തിന്റെ (MoU) തുടർച്ചയായാണ് ഈ സംവിധാനം സജ്ജമാക്കിയത്. ഉപഭോക്താക്കൾ ക്രിപ്റ്റോ അക്കൗണ്ട് വഴി നടത്തുന്ന വിനിമയങ്ങൾ സുരക്ഷിതമായി യു.എ.ഇ ദിർഹത്തിലേക്ക് (AED) മാറ്റി, തുക നേരിട്ട് ദുബായ് ഡ്യൂട്ടി ഫ്രീയിലേക്ക് ക്രെഡിറ്റ് ചെയ്യുന്ന രീതിയിലാണ് ഇന്റഗ്രേഷൻ ക്രമീകരിച്ചിരിക്കുന്നത്.
എയർപോർട്ട് കൗണ്ടറുകളിൽ സാധനങ്ങൾ വാങ്ങുമ്പോൾ ബിൽ തുകയ്ക്ക് ആനുപാതികമായി പോയിന്റ് ഓഫ് സെയിൽ (POS) മെഷീനിൽ പ്രത്യേകം ക്യു.ആർ കോഡ് രൂപപ്പെടും. ഉപഭോക്താക്കൾ ഫോണിലെ ക്രിപ്റ്റോ.കോം ആപ്പ് ഉപയോഗിച്ച് ക്യു.ആർ കോഡ് സ്കാൻ ചെയ്ത് വിനിമയം ഉറപ്പാക്കുന്നതോടെ സെക്കൻഡുകൾക്കകം പണമടയ്ക്കൽ പൂർത്തിയാകും.
ഉപഭോക്താക്കൾക്ക് കൂടുതൽ സുഗമവും ആധുനികവുമായ പേയ്മെന്റ് സൗകര്യങ്ങൾ ലഭ്യമാക്കുകയാണ് ഇതിലൂടെ ലക്ഷ്യമിടുന്നതെന്ന് ദുബായ് ഡ്യൂട്ടി ഫ്രീ മാനേജിംഗ് ഡയറക്ടർ രമേഷ് ചിദംബി വ്യക്തമാക്കി. ദുബായിയെ ആഗോള ഡിജിറ്റൽ വാണിജ്യ തലസ്ഥാനമാക്കി മാറ്റുന്നതിനുള്ള കാഴ്ചപ്പാടിന് ഈ പുതിയ നീക്കം കരുത്തുപകരുമെന്നും അദ്ദേഹം കൂട്ടിച്ചേർത്തു.
2026 അവസാനത്തോടെ നഗരത്തിലെ 90 ശതമാനം സാമ്പത്തിക ഇടപാടുകളും ക്യാഷ്ലെസ് ആക്കുക എന്ന ദുബായ് ഇക്കണോമിക് അജണ്ടയുടെ (D33) ഭാഗമായാണ് പുതിയ മാറ്റം. നേരത്തെ ആപ്പിൾ പേ, അലിപേ, ടെറാപേ തുടങ്ങിയ ഡിജിറ്റൽ പേയ്മെന്റ് സംവിധാനങ്ങളും ദുബായ് ഡ്യൂട്ടി ഫ്രീയിൽ നടപ്പിലാക്കിയിരുന്നു.
