633 ദശലക്ഷം ദിർഹത്തിന്റെ അൽ മുസ്തഖ്ബൽ സ്ട്രീറ്റ് വികസന പദ്ധതിയുടെ ഭാഗമായാണ് പുതിയ രണ്ട് വരി പാലം പ്രവർത്തനസജ്ജമാക്കിയത്.
ദുബായ്, ഓഗസ്റ്റ് 14, 2026:
ദുബായ് വേൾഡ് ട്രേഡ് സെന്റർ, വൺ സെൻട്രൽ മേഖലകളിൽ നിന്നുള്ള വാഹനങ്ങൾക്ക് തടസ്സമില്ലാതെ യാത്ര ചെയ്യാൻ സഹായിക്കുന്ന 500 മീറ്റർ നീളമുള്ള പുതിയ മേൽപ്പാലം റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ.ടി.എ) തുറന്നുകൊടുത്തു.
വേൾഡ് ട്രേഡ് സെന്ററിൽ നിന്ന് അൽ മുസ്തഖ്ബൽ സ്ട്രീറ്റ്, സബീൽ പാലസ് സ്ട്രീറ്റ് കവല ഭാഗത്തേക്ക് പോകുന്ന വാഹനങ്ങൾക്ക് ഈ പുതിയ പാലം ഏറെ പ്രയോജനപ്പെടും. വലിയ പ്രദർശനങ്ങളും സമ്മേളനങ്ങളും നടക്കുമ്പോൾ ഈ മേഖലയിൽ അനുഭവപ്പെടാറുള്ള യാത്രാസമയം 10 മിനിറ്റിൽ നിന്ന് വെറും രണ്ട് മിനിറ്റായി കുറയ്ക്കാൻ പുതിയ റോഡ് ശൃംഖലയിലൂടെ സാധിക്കുമെന്ന് അധികൃതർ വ്യക്തമാക്കി.
633 ദശലക്ഷം ദിർഹം ചെലവഴിച്ച് നടപ്പിലാക്കുന്ന അൽ മുസ്തഖ്ബൽ സ്ട്രീറ്റ് വികസന പദ്ധതിയുടെ പ്രധാന ഘട്ടമാണിത്. സബീൽ പാലസ് സ്ട്രീറ്റ് ജംഗ്ഷൻ മുതൽ ഫിനാൻഷ്യൽ സെന്റർ സ്ട്രീറ്റ് വരെയുള്ള റോഡ് വികസനത്തിന്റെ 50 ശതമാനത്തിലധികം പ്രവൃത്തികൾ നിലവിൽ പൂർത്തിയായിട്ടുണ്ട്.
നഗരത്തിന്റെ സാമ്പത്തിക വളർച്ചയ്ക്കും അടിസ്ഥാന സൗകര്യ വികസനത്തിനും ഈ പദ്ധതി നിർണ്ണായകമാണെന്ന് ആർ.ടി.എ ഡയറക്ടർ ജനറലും എക്സിക്യൂട്ടീവ് ഡയറക്ടർ ബോർഡ് ചെയർമാനുമായ മത്തർ അൽ തായർ പറഞ്ഞു.
“ദുബായ് വേൾഡ് ട്രേഡ് സെന്റർ, ദുബായ് ഇന്റർനാഷണൽ ഫിനാൻഷ്യൽ സെന്റർ (ഡി.ഐ.എഫ്.സി) തുടങ്ങിയ സുപ്രധാന കേന്ദ്രങ്ങളെ ബന്ധിപ്പിക്കുന്ന മേഖലയിലാണ് ഈ പദ്ധതി നടപ്പിലാക്കുന്നത്. ഡൗൺ ടൗൺ ദുബായിയെയും ബിസിനസ് ബേയെയും തമ്മിൽ ബന്ധിപ്പിക്കുന്നതിൽ ഇതിന് വലിയ പങ്കുണ്ട്,” അൽ തായർ വ്യക്തമാക്കി.
അൽ മുസ്തഖ്ബൽ സ്ട്രീറ്റിൽ 3.5 കിലോമീറ്റർ ദൂരത്തിൽ പാത ഇരുവശങ്ങളിലേക്കും നാല് വരികളാക്കി ഉയർത്തുന്ന പ്രവൃത്തികളും പുരോഗമിക്കുകയാണ്. പദ്ധതി പൂർണ്ണതോതിൽ പൂർത്തിയാകുന്നതോടെ മണിക്കൂറിൽ 8,800 വാഹനങ്ങളെ ഉൾക്കൊള്ളാൻ റോഡിന് ശേഷിയുണ്ടാകും. ഇതുവഴി മേഖലയിലെ മൊത്തം യാത്രാസമയം 13 മിനിറ്റിൽ നിന്ന് 6 മിനിറ്റായി കുറയും.
മൊത്തം 2,000 മീറ്റർ നീളമുള്ള പാലങ്ങളും തുരങ്കങ്ങളുമാണ് ഈ പദ്ധതിയിലുള്ളത്. അൽ മുസ്തഖ്ബൽ സ്ട്രീറ്റ് – ട്രേഡ് സെന്റർ സ്ട്രീറ്റ് ജംഗ്ഷനിൽ നിർമ്മിക്കുന്ന 1,500 മീറ്റർ നീളമുള്ള മൂന്ന് ഭൂഗർഭ തുരങ്കങ്ങൾ 2027 ഫെബ്രുവരിയോടെ ഗതാഗതത്തിന് തുറന്നുകൊടുക്കും.
ഇതിനുപുറമേ, കാൽനടയാത്രക്കാർക്കായി അൽ സുക്കൂക് സ്ട്രീറ്റിൽ പുതിയ മേൽപ്പാലം, സൈക്ലിംഗ് ട്രാക്കുകൾ, മെട്രോ സ്റ്റേഷനുകളിലേക്കുള്ള മെച്ചപ്പെട്ട നടപ്പാതകൾ എന്നിവയും പദ്ധതിയുടെ ഭാഗമായി നിർമ്മിക്കുന്നുണ്ട്. അടുത്തുള്ള വേൾഡ് ട്രേഡ് സെന്റർ റൗണ്ട് എബൗട്ട് വികസന പദ്ധതിയുടെ 85 ശതമാനത്തിലധികം ജോലികളും പൂർത്തിയായിട്ടുണ്ട്.
