ഉപഭോക്തൃ സേവന നിലവാരത്തിൽ ഉയർന്ന നേട്ടവുമായി ഷാർജ എയർപോർട്ട് അതോറിറ്റി
ഷാർജ, ഓഗസ്റ്റ് 18, 2026:വിമാനത്താവള ഉപഭോക്തൃ സേവന മികവിനുള്ള എയർപോർട്ട് കൗൺസിൽ ഇന്റർനാഷണലിന്റെ (എസിഐ) ലെവൽ 3 അക്രഡിറ്റേഷൻ ഷാർജ അന്താരാഷ്ട്ര വിമാനത്താവളം കരസ്ഥമാക്കി. യാത്രക്കാരുടെ പ്രതികരണങ്ങളും അഭിപ്രായങ്ങളും വിലയിരുത്തി സേവനങ്ങളിൽ വരുത്തിയ സമഗ്രമായ മാറ്റങ്ങളാണ് ഈ അന്താരാഷ്ട്ര അംഗീകാരത്തിന് വിമാനത്താവളത്തെ അർഹമാക്കിയത്.
2022-ൽ ലെവൽ 1 അക്രഡിറ്റേഷനോടെയാണ് ഷാർജ വിമാനത്താവളം എസിഐയുടെ കസ്റ്റമർ എക്സ്പീരിയൻസ് പ്രോഗ്രാമിൽ പങ്കാളിയായത്. യാത്രക്കാരുടെ ആവശ്യങ്ങൾ മനസ്സിലാക്കുന്നതിനും സേവന തൃപ്തി രേഖപ്പെടുത്തുന്നതിനുമുള്ള സംവിധാനങ്ങൾ തുടക്കത്തിൽ ഏർപ്പെടുത്തി. തുടർന്ന് 2023-ൽ ലെവൽ 2 അക്രഡിറ്റേഷനും 2025-ൽ അത് പുതുക്കുകയും ചെയ്ത എയർപോർട്ട്, വ്യവസ്ഥാപിതമായ പ്രവർത്തനങ്ങളിലൂടെയാണ് ഇപ്പോൾ ലെവൽ 3 നേട്ടത്തിലേക്ക് എത്തിയത്.
വിമാനത്താവളത്തിലെത്തുന്ന യാത്രക്കാരുടെ അനുഭവം കൂടുതൽ സുഗമമാക്കാൻ അതോറിറ്റി നടപ്പിലാക്കിയ വിവിധ പദ്ധതികൾക്കുള്ള അംഗീകാരമാണിതെന്ന് ഷാർജ എയർപോർട്ട് അതോറിറ്റി ചെയർമാൻ അലി സാലിം അൽ മിദ്ഫ പറഞ്ഞു. യാത്രക്കാരിൽ നിന്ന് ലഭിക്കുന്ന നിർദ്ദേശങ്ങൾ സൂക്ഷ്മമായി വിശകലനം ചെയ്യാനും, എയർലൈനുകൾ, ഗ്രൗണ്ട് ഹാൻഡ്‌ലിങ് സ്ഥാപനങ്ങൾ, മറ്റ് സേവന പങ്കാളികൾ എന്നിവരുമായി സഹകരിച്ച് പ്രവർത്തിക്കാനും സാധിച്ചതാണ് ഈ നേട്ടത്തിന് പിന്നിലെന്ന് അദ്ദേഹം വ്യക്തമാക്കി.
ടെർമിനലിലെ വിവിധ വിഭാഗങ്ങൾ തമ്മിലുള്ള ഏകോപനം ശക്തമാക്കിയതും, ഉപഭോക്തൃ അഭിപ്രായങ്ങൾ വേഗത്തിൽ പരിശോധിച്ച് നടപടി സ്വീകരിക്കുന്ന സംവിധാനം ഏർപ്പെടുത്തിയതും ലെവൽ 3 മൂല്യനിർണ്ണയത്തിൽ സുപ്രധാന ഘടകങ്ങളായി. വിമാനത്താവളത്തിലെ എല്ലാ ജീവനക്കാരെയും പങ്കാളികളെയും ഉൾപ്പെടുത്തി യാത്രക്കാർക്ക് ഉയർന്ന നിലവാരമുള്ള സേവനം ഉറപ്പാക്കുന്ന പ്രവർത്തനങ്ങൾ തുടരുമെന്ന് അധികൃതർ അറിയിച്ചു.
